ސީރިއާގައި ގަތަރުގެ އެމްބަސީ އަލުން ހުޅުވަނީ

ސީރިއާގައި ބައްޝާރުލް އަސަދުގެ ވެރިކަން ވެއްޓުމާ އެކު. ހަނގުރާމަވެރިންގެ ދިދަ ވިހުރުވައި އުފާ ފާޅުކުރަނީ. -- ފޮޓޯ: އޭއެފްޕީ

12 ޑިސެމްބަރ 2024 - 06:42

ސީރިއާގެ ވެރިރަށް ދިމިޝްގުގައި ހުންނަ ގަތަރުގެ އެމްބަސީ ވަރަށް އަވަހަށް އަލުން ހުޅުވާނެ ކަމަށް ގަތަރުން އިއްޔެ ބުނެފި އެވެ.

ދިމިޝްގުގައި ހުންނަ ގަތަރުގެ ޑިޕްލޮމެޓިކް މިޝަން ބަންދުކޮށް ސަފީރު އަނބުރާ ގެންދިޔައީ 2011 ވަނަ އަހަރުގެ ޖުލައި މަހު ބައްޝާރުގެ ސަރުކާރާ ދެކޮޅަށް ފެށި މުޒާހަރާތައް ދާހިލީ ހަނގުރާމައަކަށް ބަދަލުވުމާ ގުޅިގެންނެވެ.

އެމްބަސީ އަލުން ހުޅުވާނެ ކަމަށް އިއުލާނުކުރީ ހަނގުރާމަވެރިން ދިމިޝްގަށް އަރައި ބައްޝާރުގެ ވެރިކަން ނިމުމަކަށް ގެނައުމާ އެކުގަ އެވެ.

ގަލްފުގެ ފޮރިން މިނިސްޓްރީގެ ތަރުޖަމާނު މަޖީދު އަލް އަންސާރީ ނެރުއްވި ބަޔާނެއްގައި ވިދާޅުވީ ސީރިއާގައި އެމްބަސީ ވަރަށް އަވަހަށް ހުޅުވާނެ ކަމަށާއި އެކަމަށް ބޭނުންވާ އިންތިޒާމުތައް ފުރިހަމަ ކުރަމުން އަންނަ ކަމަށެވެ.

މިއީ ދެ ގައުމުގެ ދެމެދުގައި އޮތް ގާތް ތާރީހީ އަދި އަހުވަންތަ ގުޅުން އިތުރަށް ބަދަހިކުރުމުގެ މަގްސަދުގައި އެޅި ފިޔަވަޅެއްކަމަށް އެ ބަޔާނުގައި ބުނެފައިވެ އެވެ.

އަދި ވައިގެ މަގުން ސީރިއާގެ ރައްޔިތުންނަށް ގަތަރުން މިހާރު ފޯރުކޮށްދޭ އިންސާނީ އެހީތައް ފޯރުކޮށްދިނުމަށް ކަމާބެހޭ ފަރާތްތަކާ އެކު އިތުރަށް ގުޅުން ބަދަހިކުރަން ބޭނުންވާ ކަމަށް ވެސް ބުންޏެވެ.

އަރަބި އެހެން ގައުމުތަކާ ހިލާފަށް ގަތަރުން ބައްޝާރުގެ ވެރިކަމުގައި ސީރިއާއާ ސިޔާސީ ގުޅުން އަލުން ގާއިމުކޮށްފައެއް ނުވެ އެވެ.