އާޓިފިޝަލް އިންޓެލިޖެންސް (އޭއައި) އިން ލިޔެފައިވާ ފޭކް ނިއުސްއެއްގެ ނޮޓިފިކޭޝަން ބީބީސީގެ ނަމުގައި އެޕަލްގެ އައިފޯނުތަކަށް ފޮނުވި މައްސަލައިގައި ބީބީސީން ޝަކުވާކޮށްފި އެވެ.
އިނގިރޭސިވިލާތުގައި މި ހަފުތާގައި ތައާރަފްކުރި އެޕަލް އިންޓެލިޖެންސްގައި، އެކި ވެބްސައިޓްތަކުން ގުރޫޕްކޮށްގެން އާޓިފިޝަލް އިންޓެލިޖެންސުން އުފައްދާފައިވާ ޚަބަރުތަކުގެ ނޮޓިފިކޭޝަންތައް އުފައްދަ އެވެ.
އެގޮތަށް އުފެއްދި ޚަބަރެއްގައި، އެމެރިކާގެ ނިއު ޔޯކްގައި ހެލްތްކެއާ އެގްޒެކެޓިވް މަރާލި މައްސަލާގައި ހައްޔަރުކުރި ލުއިޖީ މަންގިއޯނީ އަމިއްލައަށް މަރުވެފައިވާ ކަމަށް ބީބީސީ ބުނެފި ކަމަށް ލިޔެފައިވެ އެވެ.
"ބީބީސީ ނިއުސް އަކީ ދުނިޔޭގެ އެންމެ އިތުބާރު ކުރެވޭ ނިއުސް މީޑިއާ. ބީބީސީގެ ނަމުގައި ޝާއިއުކުރާ އަދި ފޮނުވާ ކޮންމެ ނޮޓިފިކޭޝަނަކީ އޯޑިއަންސަށް އެއާ މެދު އިތުބާރު އޮތް އެއްޗަކަށް ވާންޖެހޭނެ،" ބީބީސީގެ ތަރުޖަމާނު ވިދާޅުވި އެވެ.
ބީބީސީން ބުނީ މި މައްސަލަ އެޕަލްއަށް ހުށަހަޅައި މިކަން ހައްލުކުރުމުގެ މަސައްކަތް މިހާރު ފަށާފައިވާ ކަމަށެވެ. -- އޭއެފްޕީ