މަސްވެރިކަމުގެ ދާއިރާއިން އިންވެސްޓް ކުރެވޭނެ ފުރުސަތުތައް ޗައިނާގެ ވިޔަފާރިވެރިންނަށް ކިޔައިދީފި

ރާއްޖޭގެ މަސްވެރިކަމުގެ ދާއިރާއިން އިންވެސްޓުކުރެވޭނެ ފުރުސަތުތައް ޗައިނާގެ ވިޔަފާރިވެރިންނަށް ކިޔައިދީފި އެވެ.

ސަރުކާރުގެ ހަބަރުތައް ގެންނަ ވެބްސައިޓުގައި ފިޝަރީޒް މިނިސްޓްރީން އިއްޔެ ބުނީ، ޗައިނާގެ ވިޔަފާރިވެރިންނާ ބައްދަލުކޮށް މެރިކަލްޗާ އަދި ބްލޫ އިކޮނޮމީ ދާއިރާއިން ހުރި ފުރުސަތުތަކާއި ސަރުކާރުން މި ދާއިރާ ކުރިއަރުވަން ކުރާ މަސައްކަތުގެ މައުލޫމާތު ހިއްސާކޮށްފައިވާ ކަމަށެވެ.

އޭގެ ތެރޭގައި ސްޕޯޓްސް ފިޝިން ބަނދަރުތައް ތަރައްގީކުރުމާއި މެރިކަލްޗާ ދާއިރާއިން ކުރާ މަސައްކަތްތައް ހިމެނެ އެވެ.

ފިޝަރީޒް މިނިސްޓްރީގައި ބޭއްވި ބައްދަލުވުމުގައި މިނިސްޓަރު އަހުމަދު ޝިޔާމާއި އެ މިނިސްޓްރީގެ އިސްވެރިން ބައިވެރިވެ ވަޑައިގަތެވެ.

މީގެ އިތުރުން މެރިކަލްޗާ ދާއިރާ އިން ތަމްރީން ދިނުމާއި މަސްވެރިކަމުގެ ދާއިރާއިން ދިރާސާކުރަން ޗައިނާގެ ނެޗުރަލް ރިސޯސަސް މިނިސްޓްރީގެ ފަސްޓް އިންސްޓިޓިއުޓު އޮފް އޮޝަނޮގްރަފީގެ ޓީމަކާ އެކު ވެސް ވަނީ މަޝްވަރާކޮށްފަ އެވެ.

އެ ބައްދަލުވުމުގައި ރާއްޖޭގެ މެރިން ރިސާޗް އިންސްޓިޓިއުޓާއި ޗައިނާގެ އިންސްޓިޓިއުޓާ ދެމެދު އެއްބަސްވުމެއްގައި ސޮއިކުރުމާ ބެހޭ ގޮތުން ވެސް ވާހަކަދެއްކި ކަމަށް މިނިސްޓްރީން ބުންޏެވެ.