"އެއްބަސްވުންތައް ހެދީ އެމްއެމްޕީއާރުސީގެ ހިޔާނާތުގެ ތަހުގީގާއި ގެއްލުނު ފައިސާ ހޯދަން ނަމަވެސް އެއްބާރުލުމެއް ނުދޭ. އެއްބަސްވުމުގެ ސަބަބުން ކުރިއަށް ނުގެންދެވި ހުރި މައްސަލަތައް އަލުން ތަހުގީގު ކުރަން ވެސް ވަނީ ނިންމާފައި."
އަދީބު ފުލުހުންގެ ބެލުމުގެ ދަށުގައި: އެމްއެމްޕީއާރުސީގެ ހިޔާނާތް ސާބިތުވި އަދީބަށް ބޮޑެތި ލުއިތަކެއް ދައުލަތާ އެކު ހެދި އެއްބަސްވުމުގެ ސަބަބުން ލިބުނު.
19 ޖެނުއަރީ 2025 - 19:46
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ހިޔާނާތުގެ މައްސަލަތައް ސާބިތުވި، ކުރީގެ ނައިބު ރައީސް އަހުމަދު އަދީބާއި އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު އިތުރުން ޚިޔާނާތުގެ ފައިސާ ދައުރުކުރި ކަމަށް ތުހުމަތު ކުރެވޭ އެސްއޯއެފްގެ ވެރިންނާ އެކު ހަދާފައިވާ ލުއި ދިނުމުގެ އެއްބަސްވުންތައް އުވާލަން ޕްރޮސިކިއުޓަ ޖެނެރަލްގެ އޮފީހުން ނިންމައިފި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތަށް އިއުތިރާފްވެ ކުށް ސާބިތުވި އަދީބާއި އެކަމުގައި އޭނާގެ ބައިވެރިންނަށް ލުއިދިނީ، ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގަ އެވެ. އެ ތަހުގީގު، ހިންގީ އެސެޓް ރިކަވަރީ ކޮމިޝަންގެ ނަމުގައި ކޮމިޝަނެއް އެކުލަވާލައި ތަހުގީގީ އިދާރާތައް ގުޅިގެންނެވެ.
"އެއްބަސްވުންތައް ނިމުމަކަށް އައުމާ އެކު، މި އެއްބަސްވުންތަކުގެ ސަބަބުން ކުރިއަށް ނުގެންދެވި ހުރި މި މީހުންގެ މައްޗަށް ކުރެވޭ ތުހުމަތުތަކުގެ މައްސަލަތަކުގެ ތަހުގީގު ކުރިއަށް ގެންގޮސް، ޕީޖީ އޮފީހަށް ހުށަހެޅުމަށް އެންޓިކޮރަޕްޝަން ކޮމިޝަން އަދި ފުލުހުންގެ އިދާރާގައި ޕީޖީ އޮފީހުން ވަނީ އެދިފަ އެވެ." -- ޕީޖީ
ޕީޖީ އޮފީހުން މިއަދު ބުނީ، އެމްއެމްޕީއާރުސީގެ ހިޔާނާތާ ގުޅިގެން ހަދާފައިވާ އިމުއިނިޓީ އަދި އެއްބާރުލުން ދިނުމުގެ އެއްބަސްވުން އުވާލަން ޕީޖީ އައްބާސް ޝަރީފް މިއަދު ނިންމަވާފައިވާ ކަމަށެވެ.
އޭގެ ތެރޭގައި އަދީބުގެ އިތުރުން، ރަށްތައް ދޫކޮށްގެން އެމްއެމްޕީއާރްސީއަށް ލިބެން ޖެހޭ ފައިސާތައް އެންމެ ގިނައިން ޖަމާކުރި އެސްއޯއެފްގައި އިސްކޮށް ހުރި މުހައްމަދު އައްލާމް ލަތީފްގެ އިތުރުން އޭނާއާ ގާތް މީހުން ކަމަށްވާ އަހުމަދު އިސްފާހު އަލީ އާއި މުހައްމަދު ހުސައިން (އޮއިއްޓޭ) ހިމެނޭ ކަމަށެެވެ.
ޒިޔަތާ އެކު ދައުލަތުން ހަދާފައިވާ އެއްބަސްވުން 2022 ވަނަ އަހަރުގެ އޮގަސްޓު މަހު އުވާލާފައިވާ ކަން ވެސް ޕީޖީ އޮފީހުން ފާހަގަކޮށްފައިވެ އެވެ.
ކުރީގެ ނައިބު ރައީސް އަހްމަދު އަދީބު
އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު
މުހައްމަދު އައްލާމް ލަތީފް
އަހްމަދު އިސްފާހު
މުހައްމަދު ހުސެއިން (އޮއިއްޓޭ)
ހިޔާނާތުގެ ބައިވެރިންނާ އެކު ދައުލަތުން އެއްބަސްވުން ހެދީ ހިޔާނާތުގެ މައްސަލައިގެ ތަހުގީގުކުރިއަށް ގެންދިއުމަށާއި ގެއްލިފައިވާ ފައިސާ އަނބުރާ ހޯދުމަށް އެއްބާރުލުން ދިނުމަށެވެ. އެކަމަކު ތަހުގީގަށާއި ގެއްލިފައިވާ ފައިސާ ހޯދަން އެއްވެސް އެހީތެރިކަމެއް އެ މީހުންގެ ފަރާތުން ނުލިބޭ ކަމަށް ތަހުގީގީ އިދާރާތަކުން އަންގާފައިވާ ކަމަށް ޕީޖީ އޮފީހުން ބުންޏެވެ.
ބޮޑު ޚިޔާނާތާ ގުޅިގެން ރެޑް ނޯޓިސް ނެރުނު މުހައްމަދު ހުސެއިން (ކ) އިޝްފާހު (މ) އަދި އައްލާމް. އެމީހުން އަދިވެސް ދިރިއުޅެނީ ރާއްޖެ އިން ބޭރުގައި.
އެއްބަސްވުންތައް ނިމުމަކަށް އައުމާ އެކު، މި އެއްބަސްވުންތަކުގެ ސަބަބުން ކުރިއަށް ނުގެންދެވި ހުރި މި މީހުންގެ މައްޗަށް ކުރެވޭ ތުހުމަތުތަކުގެ މައްސަލަތަކުގެ ތަހުގީގު ކުރިއަށް ގެންގޮސް، ޕީޖީ އޮފީހަށް ހުށަހެޅުމަށް އެންޓިކޮރަޕްޝަން ކޮމިޝަން އަދި ފުލުހުންގެ އިދާރާގައި ޕީޖީ އޮފީހުން ވަނީ އެދިފަ އެވެ.
ރަށްތައް ދޫކޮށްގެން އެމްއެމްޕީއާރްސީއަށް ލިބެން ޖެހޭ ފައިސާތައް އެންމެ ގިނައިން ޖަމާކުރީ އެސްއޯއެފްއަށެވެ. އެހެން ފަރާތްތަކަށް އެ ފައިސާ ޖަމާކުރީ އެސްއޯއެފް މެދުވެރިކޮށެވެ. އޭރު އެސްއޯއެފްގެ ފަރާތްތަކާއި ކުރީގެ ނައިބު ރައީސް އަހުމަދު އަދީބާ ދެމެދު ގާތް ގުޅުމެއް އޮތެވެ.
ނަމަވެސް، އިއުތިރާފުގެ އެއްބަސްވުމުގެ ސަބަބުން އެ ކުންފުނީގެ އެއްވެސް މީހަކަށް ދައުވާއެއް ނުކުރެ އެވެ.
އެމްއެމްޕީއާރުސީގެ ހިޔާނާތާ ގުޅިގެން އަދީބާއި އެ ކުންފުނީގެ ކުރީގެ އެމްޑީ އަބްދުﷲ ޒިޔަތުގެ މައްޗަށް ދައުލަތުން ދައުވާ ކުރި އެވެ. އެކަމަކު އިއުތިރާފް އެއްބަސްވުންތަކުގެ ސަބަބުން އަދީބަށް ވެސް ބޮޑެތި ލުއިތަކެއް ލިބުނެވެ.
އަދީބުގެ މައްޗަށް ކުރު މުއްދަތެއްގެ ހުކުމެއް އަންނަ ގޮތަށް ދައުވާ އުފުލީ، އެމްއެމްޕީއާރުސީ މެދުވެރިކޮށް، 54 ރަށް ދޫކޮށްގެން 150 ދައުވާއަކުން 800 އަހަރުގެ ޖަލު ހުކުމް ކުރެވޭނެ ވަރުގެ ހެއްކާއި ގަރީނާ ހުރި ކަމަށް ކުރީގެ ޕްރޮސިކިއުޓަ ޖެނެރަލް ހުސެއިން ޝަމީމް ވިދާޅުވުމަށް ފަހު އެވެ.
ހަތް ދައުވާއެއް އުފުލައި 20 އަހަރުގެ ހުކުމެއް އިއްވީ، އަދީބާއި ދައުލަތާ ދެމެދު ވީ ޕްލީ ބާގެއިން [ކުށަށް އިއުތިރާފްވުމުގެ] އެއްބަސްވުމުގެ ދަށުންނެވެ. މި ހުކުމާ އެކު އައީ އެންމެ ދެ މިލިއަން ރުފިޔާގެ ޖޫރިމަނާއެކެވެ. ބިލިއަނުން ޖޫރިމަނާކުރެވެން އޮއްވައި އެހާ ކުޑަ އަދަދަކުން ޖޫރިމަނާކުރި ސަބަބާ މެދު އޭރު ވެސް ގާނޫނީ ބޭފުޅުން ސުވާލު އުފެއްދެވި އެވެ.
އެ ބޭފުޅުން އޭރު ވެސް ވިދާޅުވި ގޮތުގައި، މަނީ ލޯންޑްރިންގެ ގާނޫނުން، މަނީ ލޯންޑާކުރި އަދަދު ދައްކަން އަންގައި އޭގެ ފަސް ގުނައާ ހަމައަށް ޖޫރިމަނާކުރެވެން އޮއްވައި ކުޑަ އަދަދަކަށް އެއްބަސްވުމަކީ ދައުލަތަށް ފައިދާއެއް ނޫނެވެ.
އަދީބުގެ މައްޗަށް 20 އަހަރުގެ ޖަލު ހުކުމެއް އިއްވި ނަމަވެސް، ކުރީގެ ރައީސް އިބްރާހިމް މުހައްމަދު ސޯލިހް ވަނީ ވެރިކަމުގެ ފަހު ދުވަސްވަރު އަދީބުގެ ޖަލު ހުކުމް އެންމެ ހަތަރު ދުވަހަށް ކުޑަކޮށް ދެއްވައިފަ އެވެ. އެހެންވެ، އެ ނިންމުމާ އެކު އަދީބު ވަނީ މިނިވަންވެފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
އަނެއްކާ
21 January 2025
ތިކަމުގެ ޚަބަރު އެންމެ މައްޗަށް ދިއައިމަ ބަދަލުނުވާނެބާ...
ފަރަންޖީ
20 January 2025
އަދީބު ކޮބާ ހީވެއްޖެ؟ އަތް ދިތްކުރީމައި ނުދެންޏާ ބޮނޑިލިބޭނޭ އޭރުވެސް ބުނީމެއްނު. ބުނާއެއްޗެއް ދިންނަމަ މިހިސާބަކަށް ނުދިޔައީސް... ވިންކް ވިންކް
ޜިނު
20 January 2025
5 އަރުފަހުން އަންނަބަޔަކު އެއްބަސްވުން އައުކުރާނެ. މިއޮތީވާ ކަމެއް
ޓިނު
20 January 2025
ދެންކޮމިސަނެއް ހެދީމަ ނިމުނީ 5އަހަރު ނިމޭއިރު އެންމެ ލޯލާރިއެއް ނުލިބުނަސް ރަގަޅުވާނެ
ލަތީފް ބެ
20 January 2025
ތި ކަމުގެ ބައިވެރިން ބޭރު ގައުމުތަކުގަ އުޅެފަ މިހާރު މާލެތެރެއިން އެބަ ފެނޭ
ޖީހާންް
20 January 2025
އަދީބު މިނިވަންކުރީ އެހެން ވެރިކަމެއް އައިއްސިނަމަ އަދީބް އެއެންމެން ބާނުވާލާނެތީ އެކަމާ ބިރުން. ރައީސް މުއިއްޒު ނޫޅޭ އަދީބުދެކެ މާބިރަކުން.
ހޔަނ
21 January 2025
ދެލޯ ބޮޑުކޮއްގެން ބަލަން މިތިބީ ތިޔަ ފަޅާ ކަރާތައް، މި ގައުމުގަ ސިޔާސީ ކުއްވެރިން ގަޔަކު އަތެއް ނުލެވޭނެ އދބ ބުރޯވެސް އެ ގޮވަނީ.
ޒާހިދްް
20 January 2025
އެމްޑީޕީ ސަރުކާރުން މިމައްސަލަތަށް އޮއްބާލީ އެމީހުންގެ ގިނަ މީހުން މިކަމުގައި ބެދޭތީ. މި މައްސަލަތަށް އަލުން ބަލާ ސާބިތުވާ މީހުންނަށް ފިޔަވަޅު އެޅުން ވަރަށް މުހިންމު.
މިދަހަތްް
20 January 2025
މި ގައުމުގަ ހިނގި އެންމެ ބޮޑު ކޮރަޕްޝަންގެ މައްސަލަ ކުރީގެ އެއްވެސް ސަރުކާރަކަށް ބަލަން ނުކެރުނު.
ހައްޖަ.
20 January 2025
މީ ހަމަ ދައްކާލާ ދަޅައެއް.މީގަ ހޭކިފަ ތިބި މީހުން ތިބީ މިސަރުކާރުގަ.
އަލި
20 January 2025
ކޮންމެ ކަމެއްގައިވެސް އޮންނަނީ ކަރަޕްޝަނެއް ހިންގާފައި. ގައުމަށް ސަލާމަތުގެ އައްސޭރިއެއް ފެންނަ ހިސާބުގައިވެސް ނެތް.