އަހަރެއްގެ ތެރޭގައި ނަފުސާނީ ފުރަތަމަ އެހީ 3،000 އަށް ވުރެ ގިނަ މީހުންނަށް ދީފި

ނަފުސާނީ ފުރަތަމަ އެހީ، އަހަރެއްގެ ތެރޭގައި 3،000 އަށް ވުރެ ގިނަ މީހުންނަށް ދީފި އެވެ.

ހެލްތު މިނިސްޓްރީން ސޯޝަލް މީޑިއާގައި މިއަދު ކުރި ޕޯސްޓެއްގައި ބުނީ 24 ގަޑިއިރު އެހީތެރިކަން ލިބޭ 1677 ހެލްޕްލައިން ތައާރަފްކުރި ފަހުން 3،004 މީހުންނަށް ފުރަތަމަ އެހީ ދީފައިވާ ކަމަށެވެ.

އެ ހެލްޕްލައިން ލޯންޗުކުރީ ފެބްރުއަރީ 21، 2024 ގަ އެވެ. އެ ހިދުމަތަށް އަންނަ މަހު އެއް އަހަރު ފުރޭނެ އެވެ.

މިނިސްޓްރީން އޭރު ބުނީ އެ ހެލްޕްލައިންގެ ބޭނުމަކީ ދިރިއުޅުމުގައި ދިމާވާ ގޮންޖެހުންތަކުން އަރައިގަތުމަށް އެހީތެރިވުމާއި ނަފުސާނީ އެކި އުނދަގޫތައް ކުރިމަތިވާ މީހުންނަށް ފޯނު މެދުވެރިކޮށް ނަފުސާނީ ފުރަތަމަ އެހީ ފޯރުކޮށްދީ ނަފްސާނީ ދުޅަހެޔޮކަން ކުރިއެރުވުން ކަމަށެވެ.

އޭގެ އިތުރުން، ނަފުސާނީ އެކި ގޮންޖެހުންތަކާ ކުރިމަތިލާން ޖެހިފައިވާ މީހުންނަށް އެހީތެރިކަން ފޯރުކޮށްދީ، އެފަދަ އުނދަގޫ އިހުސާސްތައް ކުރިމަތިވާ ދަނޑިވަޅެއްގައި އެ މީހުންނަށް ސައިކޯ ސޯޝަލް ސަޕޯޓުގެ އެހީތެރިކަން ފޯރުކޮށްދީ، ވާހަކަތައް ހިއްސާކުރެވޭނެ ފަދަ މާހައުލެއް ގާއިމްކުރުމަކީ ވެސް ބޭނުމެއް ކަމަށް ބުންޏެވެ.

އެ ހެލްޕްލައިނުން އަންނަނީ ހުރިހާ އުމުރަކަށް ވެސް ނަފުސާނީ ފުރަތަމަ އެހީ ދެމުންނެވެ. އިތުރު ފަރުވާ ބޭނުންވާ ނަމަ ހަދާފައިވާ އުސޫލުތަކުގެ ތެރެއިން ރެފަރަލް ވެސް ހަދައިދެ އެވެ.