ހއ. އަށް ކުރައްވާ ދަތުރުފުޅުގައި ރައީސް ޑރ. މުހައްމަދު މުއިއްޒު މިރޭ ދިއްދުއަށް ވަޑައިގަތުމުން ހޫނު މަރުހަބާއެއް ކިޔައިފި އެވެ.
ހއ. އަށް މިއަދު ފެއްޓެވި ދަތުރުފުޅުގައި ތިން ވަނަ އަށް މި ރަށަށް ވަޑައިގަތުމާ އެކު ސަގާފީ ނެށުމެއް ހުށަޙައިދިނެވެ. އޭރު ރައީސަށް މަރުހަބާ ދެންނެވުމަށް ގިނަ އަދަދެއްގެ މީހުން ސަފު ހަދާފައި އޮތެވެ.
ދިއްދޫގައި އައިޑީކާޑު ޕްރިންޓްކޮށް ދޫކުރުމުގެ ހިދުމަތް މިރޭ ރައީސް އިފްތިތާހުކޮށްދެއްވައި ރަށު ރައްޔިތުންނާ ބައްދަލު ކުރައްވާނެ އެވެ.
ތިން ދުވަހުގެ މި ދަތުރުފުޅުގައި އެ މަނިކުފާނު ހއ.ގެ 10 ރަށަކަށް ވަޑައިގަންނަވާނެ އެވެ.
މިއަދު ވަނީ ދިއްދޫގެ އިތުރުން މުރައިދޫ އާއި ފިއްލަދޫ އަދި އުތީމަށް ވެސް ވަޑައިގެންފަ އެވެ. މާދަމާ އަދި އަނެއް ދުވަހު ރައީސް ވަޑައިގަންނަވާނީ ހޯރަފުށި، އިހަވަންދޫ، މާރަންދޫ، މޮޅަދޫ، ތަކަންދޫ އަދި އުލިގަމަށެވެ.
އެ މަނިކުފާނުގެ މި ދަތުރުފުޅުގައި، ބައެއް ރަށްރަށުގައި އަލަށް އިމާރާތްކުރަން ހަމަޖެހިފައިވާ ފުލުހުންގެ މަރުކަޒުތަކާއި ކައުންސިލް އިމާރާތްތަކުގެ އިތުރުން ކޯލްޑް ސްޓޯރޭޖް ފެސިލިޓީ މަޝްރޫއުގެ މަސައްކަތް ފައްޓަވައިދެއްވާނެ އެވެ. އަދި އައިޑީކާޑާއި ޕާސްޕޯޓް ދޫކުރުމުގެ ހިދުމަތް ފައްޓަވައިދެއްވުމަށް ވެސް ހަމަޖެހިފައިވެ އެވެ.
ރައީސްގެ އަރިހުގައި ބައެއް މިނިސްޓަރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން މި ދަތުރުގައި ބައިވެރިވެވަޑައިގަންނަވަ އެވެ.
ރައީސް ދިއްދުއަށް ފައިބައިވަޑައިގަތް ވަގުތު އެ މަނިކުފާނާ ދެކޮޅަށް ވެސް ބަޔަކު އަޑު އުފުލި އެވެ.