މާލޭގައި ހިނގި އަލިފާނުގެ ހާދިސާއެއްގައި ދެ ގެއެއްގެ މައި ފެން ހޮޅިއަށް ގެއްލުންވެއްޖެ

މާލޭގައި މިއަދު ހެނދުނު ހިނގި އަލިފާނުގެ ހާދިސާގައި ދެ ގެއެއްގެ ފެން ހޮޅިއަށް ގެއްލުންވެއްޖެ އެވެ.

މި ހާދިސާގައި އެއްވެސް މީހަކަށް އަނިޔާއެއް ނުލިބެ އެވެ.

އަލިފާނުގެ ހާދިސާ ހިނގީ ޝީ ބިލްޑިން ކުރިމަތީގައި ހުންނަ މ. ހައުސް ޕްލާޒާގަ އެވެ. ފަޅަށް ހުންނަތާ ގިނަ ދުވަސްތަކެއްވީ އެ ގެއަކީ މަސްތުވާތަކެތި ބޭނުންކުރާ މީހުން ވަދެ އުޅޭ ތަނެކެވެ. މީގެ ކުރިން ވެސް އެ އިމާރާތުގައި އަލިފާނުގެ ހާދިސާތައް ހިނގާފައިވެ އެވެ.

ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނީ ހައުސް ޕްލާޒާގައި މިއަދު ހިނގި އަލިފާނުގެ ހާދިސާގައި ދެ ގެއެއްގެ މައި ފެންހޮޅިއަށް ގެއްލުން ލިބިފައިވާ ކަމަށެވެ. އެހެންވެ، އެ ހޮޅި މަރާމާތު ކުރެވެން ދެން ދެ ގެއަކުން 55 މީހަކަށް ވަގުތީ ބޯހިޔާވަހިކަން ހަމަޖައްސާފައިވާ ކަމަށެވެ. އޭގެ ތެރޭގައި 20 ބިދޭސީއަކު ވެސް ހިމެނޭ ކަމަށް އެ އޮތޯރިޓީން ބުންޏެވެ.

އެމްއެންޑީއެފުން ބުނީ ހައުސް ޕްލާޒާގައި ރޯވި ކަމުގެ ރިޕޯޓް ލިބުނީ މިއަދު ހެނދުނު 6:35 ހާއިރު ކަމަށެވެ. އަދި ސިފައިންގެ ފަޔަ އެންޑް ރެސްކިއު އިން ކުރި މަސައްކަތުން އޭގެ ގަޑިއެއްހާއިރު ފަހުން އަލިފާންގަނޑު ނިއްވާލާފައިވާ ކަމަށް ބުންޏެވެ.

ސިފައިން ބުނި ގޮތުގައި، ރޯވީ އެ ގޭގައި ހުރި ކުނިތަކެއްގަ އެވެ.