ޓްރަމްޕުގެ ޣައްޒާ ޕްލޭނާ ގުޅޭ ސަމިޓެއް ސައޫދީގައި ބާއްވަނީ

ފަލަސްތީނުގެ ޣައްޒާ އެމެރިކާގެ ބާރުގެ ދަށަށް ގެންގޮސް އެތަނުން އާންމުން ބޭރުކޮށްލުމަށް އެމެރިކާގެ ރައީސް ޑޮނަލްޑް ޓްރަމްޕު ގެންގުޅޭ ޕްލޭނާ ގުޅޭ ގޮތުން އަރަބި ހަތަރު ގައުމެއް ބައިވެރިވިކޮށްގެން، އަންނަ މަހުގެ 20 ވަނަ ދުވަހު ސައޫދީ އަރަބިއްޔާގައި ސަމިޓެއް ބާއްވަން ނިންމައިފި އެވެ.

މި ކަމުގެ މައުލޫމާތު އެނގޭ މީހުންނާ ހަވަލާދީ އޭއެފްޕީން ބުނީ މިސްރު، އުރުދުން، ގަތަރު އަދި ޔުނައިޓެޑް އަރަބް އެމިރޭޓްސްގެ ލީޑަރުންނާ އެކު މި ސަމިޓް ބާއްވާނީ އޭގެ ހަފުތާއެއް ފަހުން ގާހިރާގައި ބާއްވާ އަރަބި ލީގުގެ ބައްދަލުވުމުގެ ކުރިން ކަމަށެވެ.

ނަން ނުޖެހުމަށް ޝަރުތުކޮށް އެހެން އޮފިޝަލަކު ވިދާޅުވެފައިވާ ގޮތުގައި ފަލަސްތީނުގެ ރައީސް މަހްމޫދު އައްބާސް ވެސް މި ސަމިޓުގައި ބައިވެރިވެވަޑައިގަންނަވާނެ ކަމަށެވެ.

ޣައްޒާ އޮތީ ސުންނާފަތި ވެފައި ކަމަށާއި އެހެންވެ އެތަނުގައި މީހުންނަށް ނޫޅެވޭނެ ކަމަށާއި އެންމެން މިސްރާއި އުރުދުންއަށް ގެންދަންވީ ކަމަށް ޓްރަމްޕް ވަނީ ވިދާޅުވެފަ އެވެ. އަދި އޭގެ ފަހުން ޣައްޒާ އަލުން ބިނާކޮށް ހިތްފަސޭހަ ތަނަކަށް ހަދާނީ ކަމަށް ވެސް އޭނާ ވިދާޅުވި އެވެ. މި ވާހަކަތަކާ އެކު އަރަބި ގައުމުތަކުން ވަނީ އެއީ ފަލަސްތީނުގެ ރައްޔިތުން ގަދަކަމުން ވަޒަނުން ބޭރުކުރުން ކަމަށާއި އެކަމަށް އެއްބަސް ވެވޭނެ އެއްވެސް ގޮތެއް ނޯންނާނެ ކަމަށް ބުނެފަ އެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ބުރާސްފަތި ދުވަހު ވިދާޅުވީ، ޣައްޒާއާ ގުޅޭ އާ ހުށަހެޅުންތަކެއް އަރަބި ސަރުކާރުތަކުން އަޑުއަހަން އެމެރިކާ ޝައުގުވެރިވާ ކަމަށާއި ނަމަވެސް "މިވަގުތު އޮތީ އެ ގައުމުތަކުން ނުރުހުނަސް އެންމެ ޕްލޭނެއް" ކަމަށާއި "އެއީ ޓްރަމްޕުގެ ޕްލޭން" ކަމަށެވެ.

އުރުދުންއަކީ މިހާރު ވެސް ފަލަސްތީނުގެ ދެ މިލިއަނަށްވުރެ ގިނަ ރެފިއުޖީން ދިރިއުޅޭ ގައުމެކެވެ. އެ ގައުމުގެ 11 މިލިއަނުގެ އާބާދީގެ ދެބައިކުޅަ އެއްބަޔަކީ ފަލަސްތީން ނަސްލުގެ މީހުންނެވެ.

ޣައްޒާ އަލުން އާރާސްތުކުރުމަށް މިސްރުން ހުށަހެޅީ ޣައްޒާގައި އާންމުން ތިބެގެން އެކަން ކުރެވޭނެ ގޮތަށެވެ.

ފަލަސްތީނުގެ ރައްޔިތުން ޣައްޒާއިން ބޭރުކުރަން ކުރާ ކޮންމެ މަސައްކަތަކީ، 1948 ވަނަ އަހަރު އިޒްރޭލު އުފެއްދި އިރު ފަލަސްތީނުގެ ރައްޔިތުން ވަޒަނުން ބޭރުކޮށް ޔަހޫދީން އާބާދުކުރަން ހިންގި އަނިޔާވެރި "ނަކްބާ" ގެ އަނދިރި ހަނދާންތައް އާވެގެންދާނެ ކަމެކެވެ.