ދިވެހި ކުންފުނިން އުފެއްދި 49،000 ސިނގިރޭޓު ފޮށި ފެނުނު، ގޮތެއް ނިންމަން އިކޮނޮމިކް މިނިސްޓްރީއަށް

ހ. ހުޅުގަލީގައި ހިންގާ ޕްރައިވެޓް އޮފީހެއްގެ ތެރޭގައި ސިނގިރޭޓު އުފައްދާ ކަމުގެ މައުލޫމާތު ލިބިގެން މިދިޔަ ޖެނުއަރީ މަހު ބަލައި ފާސްކުރިއިރު، އެ އެޕާޓްމަންޓުގެ ތެރެއިން 49،000 ސިނގިރޭޓް ފޮށި އަތުލައިގަނެފައިވާ ކަމަށާއި އެ ތަކެތި އަދި ކުންފުންޏާ މެދު ގޮތެއް ނިންމަން އިކޮނޮމިކް މިނިސްޓްރީ އަށް ހުށަހަޅާފައިވާ ކަމަށް ފުލުހުން މިއަދު ބުނެފި އެވެ.

ސިނގިރެޓް އުފައްދާ ކަމަށް ލިބުނު މައުލޫމާތަކާ ގުޅިގެން ފުލުހުން ކޯޓު އަމުރެއްގެ ދަށުން އެ އެޕާޓްމަންޓަށް ވަނީ މިދިޔަ ޖެނުއަރީ 30 ވަނަ ދުވަހުގެ ރޭގަ އެވެ.

ޖެހިގެން އައި ދުވަހު، އެ އިދާރާއިން ބުނީ އެ ގެއިން ކާޑުބޯޑުގެ 103 ފޮށިގަނޑު އަތުލައިގެންފައިވާ ކަމަށެވެ. އޭގެ ތެރޭގައި ދުންފަތް ހުރި ފޮށިގަނޑު ވެސް ހިމެނޭ ކަމަށް އޭރު ބުންޏެވެ.

ފުލުހުންގެ މީޑިއާ އޮފިޝަލަކު "މިހާރު" އަށް މިއަދު ވިދާޅުވީ އެ އެޕާޓްމަންޓުގެ ތެރެއިން 49،000 ސިނގިރޭޓު ފޮށި ފެނުނު ކަމަށެވެ.

Cigarette ufadhhan thibi thanun 103 foshigandu athulaigai: Police

The most trusted news source in the Maldives

Mihaaru

އޮފިޝަލް ވިދާޅުވީ ސިނގިރޭޓު އުފައްދަން އުޅުނީ ރޭޑިއަސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކުން ކުއްޔަށް ނަގާފައިވާ ތަނެއްގައި ކަމަށެވެ.

ސިނގިރޭޓުތައް ނައްތާލުމާ ގުޅޭގޮތުން ހެލްތު މިނިސްޓްރީއަށް އަދި އެ މީހުންގެ ވިޔަފާރިއާ މެދު ގޮތެއް ނިންމަން އިކޮނޮމިކް މިނިސްޓްރީއަށް ސިޓީ ފޮނުވާފައިވާ ކަމަށް ފުލުހުންގެ އޮފިޝަލް ވިދާޅުވި އެވެ. އޭގެ އިތުރު ތަފްސީލެއް އަދި ނުލިބެ އެވެ.

ދުންފަތް ކޮންޓްރޯލް ކުރުމާ ބެހޭ ގާނޫނު ބުނާގޮތުން ދަށުން ރާއްޖޭގައި ދުންފަތް އުފެއްދުމަކީ މަނާކަމެކެވެ. ނަމަވެސް، އޭގެ ބައެއް ބާވަތްތައް އެތެރެކުރެވެ އެވެ.

އެ ގާނޫނުގައި "ދުންފަތުގެ ބާވަތްތައް" ކަމަށް ބުނެފައި ވަނީ ދުންފަތާއި ދުންފަތުގެ ތަނޑި އާއި ނިކޮޓިން އާއި އެ ތަކެތި ހިމަނައިގެން ތައްޔާރުކޮށްފައި ހުންނަ ތަކެއްޗަށެވެ. އެއިން އެއްވެސް ބާވަތެއް އެއްވެސް މިންވަރަކަށް ހިމެނޭ އެއްޗެއް ހަފައިގެން ނުވަތަ ބޮއެގެން، ވަސްދަމައިގެން ނުވަތަ ހަށިގަނޑުގެ ތަނެއްގައި ތަތްކޮށްގެން ނުވަތަ ޖައްސައިގެން ނުވަތަ އުނގުޅައިގެން ވިޔަސް އަދި ހަށިގަނޑަށް ވާސިލުވާ ގޮތަށް ތައްޔާރު ކޮށްފައިވާ ކޮންމެ އެއްޗަކީ ދުންފަތުގެ ބާވަތެއް ކަމަށް ވެސް އެ ގާނޫނުގައި ބުނެފައިވެ އެވެ

ނޯޓް:

މި ޚަބަރު އެންމެ ފުރަތަމަ ޝާއިއުކުރިއިރު، ސިނގިރޭޓު އުފައްދަން އުޅުނީ "ރޭޑިއަސް" ނަމަކަށް ކިޔާ ކުންފުންޏަކުން ކުއްޔަށް ނަގާފައިވާ ތަނެއްގައި ކަަމަށް ލިޔެވިފައި ވަނީ އޮޅުމަކުންނެވެ. ރަނގަޅު ގޮތަކީ ރޭޑިއަސް ޕްރައިވެޓް ލިމިޓެޑެވެ. އަދި "ރޭޑިއަސް" ކުންފުނީގެ ހިއްސާދާރެއްގެ ނަން ފުރަތަމަ ޚަބަރުގައި ޖެހިފައިވާތީ އޭނާ އާއި ކިޔުންތެރިންގެ ކިބައިން މާފަށް އެދެމެވެ.