ހާމަވެގެންދިޔައީ މިއީ ރައީސް އަންގާހާ ގޮތަކަށް މަސައްކަތް ކުރާ މަޖިލީހެއް ނޫންކަން: ފަލާހު

ޕީއެންސީގެ ބޮޑު މެޖޯރިޓީއެއް އޮތް ނަމަވެސް މިހާރު ހިނގަމުން އަންނަ ރައްޔިތުންގެ މަޖިލީހަކީ ރައީސް ޑރ. މުހައްމަދު މުއިއްޒު ނުވަތަ ސަރުކާރުން އަންގާހާ ގޮތަކަށް މަސައްކަތް ކުރާ މަޖިލީހެއް ނޫން ކަން މިއަދު ހާމަވެއްޖެ ކަމަށް އެ ޕާޓީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ.

ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރަން ކޯޓުތަކުގެ ގާނޫނަށް އަވަސް އަރުވާލައިގެން މަޖިލީހުން ގެނައި އިސްލާހުގެ ބިލް ރައީސް މުއިއްޒު ވަނީ ތަސްދީގު ނުކުރައްވައި، އަނބުރާ ފޮނުވާލައިފަ އެވެ. އެ ބިލް އަނބުރާ ފޮނުވާލީ، އޭގެ ބައެއް މާއްދާތައް ގާނޫނުއަސާސީއާ ފުށުއަރާ ކަމަށް ބަންޑާރަ ނައިބު އަހުމަދު އުޝާމް ރައީސަށް ލަފާ އަރުވާފައިވާތީ އެވެ.

އަނބުރާ ފޮނުވާލި ބިލާ މެދު އަމަލުކުރާނެ ގޮތަކާ މެދު ބަހުސް ކުރުމަށް މިއަދު މަޖިލީހުގައި ހުޅުވާލުމުން ފަލާހު ވިދާޅުވީ، ސަރުކާރު ހިންގާ ޕީއެންސީގެ ބޮޑު މެޖޯރިޓީ އޮތަސް، މި މަޖިލީހަކީ ރައީސް އަންގަވާ ކޮންމެ ކަމެއް ފާސްކުރާނެ މަޖިލީހެއް ނޫން ކަން ރައްޔިތުންނަށް ހާމަވެފައިވާ ކަމަށެވެ.

"އިދިކޮޅު ފަރާތްތަކުން މި ދައްކާ ވާހަކަތަކަށް ވެސް މި ބިލްގެ ސަބަބުން ސާފު ޖަވާބެއް ލިބިއްޖެ. ޕީއެންސީގެ ކިތަންމެ ބޮޑު މެޖޯރިޓީއެއް އޮތަސް އަޅުގަނޑުމެން ފާސްކުރާ ކޮންމެ ފާސްކުރުމެއް ރައީސުލްޖުމްހޫރިއްޔާ ގަބޫލެއް ނުކުރައްވާ ކަން ހާމަވަގެން ގޮސްފި،" ފަލާހު ވިދާޅުވި އެވެ.

"މި މަޖިލީހަކީ ސަރުކާރުން އަންގާހާ ގޮތަކަށް ރައީސުލްޖުމްހޫރިއްޔާ ވިދާޅުވާހާ ގޮތަކަށް މަސައްކަތް ކުރާ މަޖިލީހެއް ނޫން ކަން ވެސް ރައްޔިތުންނަށް މިއަދު ހާމަވެގެންދާނެ."

ފަލާހު ވިދާޅުވިގޮތުގައި، ބިލްގައި އޮތް ގޮތުން ފަނޑިޔާރުންގެ އަދަދު ފަހަކަށް މަދުކުރަން ޖެހެ އެވެ. އެކަން ކުރަން ޖެހެނީ ފަސް ދުވަސް ތެރޭގައި ކަމަށް ވިޔަސް ބިލް ފާސްކުރި ފަހުން ކޯޓުގެ ތިން ފަނޑިޔާރުންގެ މައްސަލަ ޖޭއެސްސީން ބަލަން ފަށައި ސަސްޕެންޑް ކުރުމުން މި ވަގުތު ކޯޓުގައި ހަތް ފަނޑިޔާރުން ނެތް ކަމަށް އޭނާ ވިދާޅުވި އެވެ. އެހެންވެ، ބިލް ތަސްދީގު ކުރިޔަސް، ބިލްގައިވާ ގޮތަށް ފަސް ދުވަހުގެ ތެރޭގައި ކޯޓުގެ ފަސް ފަނޑިޔާރުން ކަނޑައެޅޭނެ ގޮތެއް ނެތް ކަމަށް ފަލާހު ވިދާޅުވި އެވެ.

ފަލާހު ހުށަހެޅުއްވީ ބިލް އިތުރަށް ދިރާސާކުރަން ކޮމިޓީއަށް ފޮނުވާށެވެ.

Bill thasdheegu nukuravvan AG lafaa eruvee fandiyaarunge sulookuge usool aa fushu araathee

The most trusted news source in the Maldives

Mihaaru

ނަމަވެސް، ބިލަށް ވޯޓު ނުދެއްވި ހިތަދޫ މެދު ދާއިރާގެ މެންބަރު އަހުމަދު އަޒާން ވަނީ ބިލް ތަޅުމުން ބޭރުކޮށްލަން ހުށަހަޅުއްވައިފަ އެވެ. އޭނާ ވިދާޅުވި ގޮތުގައި، އެ ބިލަކީ ގާނޫނުއަސާސީއާ ފުށުއަރާ ބިލެއް ކަމަށް ބަންޑާރަ ނައިބު ލަފާ ދެއްވާފައިވަނިކޮށް އެ ބިލަށް އިތުރަށް ބަހުސް ކުރުމުގެ ބޭނުމެއް ނެތް ކަމަށެވެ.

ބިލަށް ބަހުސް ކުރައްވަމުން ހުރާ ދާއިރާގެ މެންބަރު ޑރ. އަނާރާ ނައީމް ވެސް ވިދާޅުވީ މަޖިލީހުން ފާސްކުރާ ބިލްތަކަށް އެކަށީގެންވާ ވަގުތު ދީ، ދިރާސާ ކުރުން މުހިންމު ކަމަށެވެ. ނަމަވެސް، މި ބިލް ފާސްކޮށްފައިވަނީ އަވަސް އަރުވާލައިގެން ކަމަށާއި މިފަދަ ބިލެއް ތަސްދީގުނުކޮށް އަނބުރާ ފޮނުވާލުމަކީ އޭނާ މަރުހަބާ ކިޔާ ކަމެއް ކަމަށް ވިދާޅުވި އެވެ.

ކެންދޫ ދާއިރާގެ އެމްޑީޕީގެ މެންބަރު މައުރޫފް ޒާކިރު ވިދާޅުވީ މި ބިލަކީ ގާނޫނުއަސާސީއާ ހިލާފު ބިލެއް ކަމަށް އެ ޕާޓީގެ މެންބަރުން މަޖިލީހުގައި ތަކުރާރުކޮށް ވިދާޅުވަމުން ގެންދެވި ކަމަށާއި ކޮމިޓީއަށް އެތައް ވަކީލުންނެއް ސޮއިކޮށް ޕެޓިޝަނެއް ވެސް ހުށަހެޅި ކަމަށެވެ. އަދި މަޖިލީހުގެ ކައުންސެލާ ޖެނަރަލް ވެސް ބިލް ގާނޫނުއަސާސީއާ ފުށުއަރާ ކަން ފާހަގަކުރައްވާފައިވާ ކަމަށް އޭނާ ވިދާޅުވި އެވެ. ނަމަވެސް، އެކަންކަމަށް ރިއާޔަތް ވެސް ނުކޮށް "ފަޓާސްބަރިއެއްހެން" ބިލް ފާސްކުރީ ރައީސް މުއިއްޒު އެކަން ކުރަން ޕީއެންސީގެ މެންބަރުންނަށް އަންގަވާފައި އޮތުމުން ކަމަށް މައުރޫފް ވިދާޅުވި އެވެ. އަދި، އެއީ ސުޕްރީމް ކޯޓުގައި ކުރިއަށް ގެންދާ ޝަރީއަތެއް ހުއްޓުވަން ހިންގި ޖަރީމާއެއް ކަމަށް ވެސް ވިދާޅުވި އެވެ.

Supreme court ge bench ah badhalu genna bill Majileehun faas koffi

The most trusted news source in the Maldives

Mihaaru

ބައެއް މެންބަރުން ވާހަކަ ދައްކަވަމުން ބިލަކީ ގާނޫނުއަސާސީއާ ހިލާފު ބިލެއް ކަމަށް ވިދާޅުވާތީ، ނިޒާމީ ނުކުތާއެއް ނަގައި ފަލާހު ވަނީ އެފަދައިން ރައީސް ފާހަގަ ކުރައްވާފައި ނުވާ ކަމަށް ވިދާޅުވެފަ އެވެ. އެކަމަކު، ބަންޑާރަ ނައިބު ދެއްވާފައިވާ ލަފާގައިވާ ގޮތުން އެ ބިލް އޮތް ގޮތުން ފަނޑިޔާރުން މަގާމުން ވަކިކުރުމާ ގުޅޭ ގޮތުން ގާނޫނުއަސާސީގައި އޮތް އުސޫލާ ފުށުއަރަ އެވެ.

ރައްޔިތުންގެ މަޖިލީހުން ކޯޓުތަކުގެ ގާނޫނަށް އިސްލާހު ގެނައުމުގެ ބިލް ފާސްކޮށްފައިވަނީ މެންބަރުންގެ ގޮނޑިއާ ގުޅޭ ގޮތުން ގާނޫނުއަސާސީ އަށް ގެނައި އިސްލާހު ބާތިލް ކުރަން ހުށަހެޅި މައްސަލައިގެ ޝަރީއަތް ކުރިއަށް ގެންދަން ނިންމުމާ އެކު އެވެ. އެ ބިލް ފާސްކުރީ އެ މައްސަލައިގެ އަޑުއެހުމެއް ވެސް ބާއްވަން ތާވަލު ކޮށްފައިވަނިކޮށެވެ. ސުޕްރީމް ކޯޓުގެ ފުލް ބެންޗުން ބަލަމުންދާ އެ މައްސަލަ ތިން ފަނޑިޔާރުން ސަސްޕެންޑްކުރުމާ އެކު މި ވަގުތު އޮތީ ހުއްޓިފަ އެވެ.