ނިޝާން އާއި ފަޒްލޫނަށް ކުރާ ދައުވާ ރިވިއުއަށް ހުށަހަޅާފައިވާތީ ޝަރީއަތް މަޑުޖައްސާލައިފި

ގަލޮޅު ދަނޑުގައި ބޭއްވި ޔޯގާ ހަރަކާތެއް ހުއްޓުވަން އެތަނަށް ބަޔަކު ވަދެ ހިންގި ހަމަނުޖެހުމުގައި ބައިވެރިވިކަމުގެ ތުހުމަތުގައި ޝައިޚް ފަޒްލޫން މުހައްމަދާއި ޝައިހް އާދަމް ނިޝާންގެ މައްޗަށް އުފުލާފައިވާ ދައުވާ ރިވިއުކުރަން ހުށަހަޅާފައިވާތީ، އެ މައްސަލާގެ ޝަރީއަތް މަޑުޖައްސާލަން ނިންމައިފި އެވެ.

ނިޝާން އާއި ފަޒްލޫންގެ މައްޗަށް އުފުލާފައިވާ ޓެރަރިޒަމްގެ އަމަލަކަށް ހިތްވަރު ދިނުމުގެ ކުށުގެ ދައުވާ ރިވިއު ކުރަން އެ ދެ މީހުންގެ ފަރާތުން ހުށަހަޅާފައިވަނީ ކުރިން ކޮށްފައިވާ ދައުވާތައް ރިވިއުކޮށް ދޭން ހުށަހަޅަން އާ ޕްރޮސެކިއުޓާ ޖެނެރަލް އައްބާސް ޝަރީފް ހުޅުވާލެއްވި ފުރުސަތުގަ އެވެ.

އަލަށް ޕީޖީކަމާ ހަވާލުވެވަޑައިގެންނެވުމަށް ފަހު އައްބާސް ހުޅުވާލެއްވި ފުރުސަތުގައި ގިނަ ދައުވާތަކެއް ރިވިއުކޮށް ދޭން އެދިފަ އެވެ.

އެ މައްސަލާގައި ކްރިމިނަލް ކޯޓުގައި މިއަދު އޮތް އަޑުއެހުމުގައި ދައުވާ ރިވިއު ކުރަން ހުށަހަޅާފައިވާތީ، ޝަރީއަތް މަޑުޖައްސާލުމަށް ދިފާއުން އެދިފައިވެ އެވެ. އެކަމަށް އިއުތިރާޒު ނުކުރާ ކަމަށް ދައުލަތުން ވެސް ބުންޏެވެ.

އެހެންވެ، އެ މައްސަލަ ބައްލަވާ ގާޒީ ނިންމެވީ ޕީޖީން ގޮތެއް ނިންމަންދެން ޝަރީއަތް މަޑުޖައްސާލުމަށެވެ.

ގަލޮޅު ދަނޑުގައި 2022 ވަނަ އަހަރު ޔޯގާ ހަރަކާތެއް ކުރިއަށް ދަނިކޮށް ދަނޑަށް ބަޔަކު ވަދެ ހިންގި ހަމަނުޖެހުންތަކާ ގުޅިގެން ހައްޔަރު ކުރުމަށްފަހު ޝައިހް ފަޒްލޫނާއި އާދަމް ނިޝާނަށް ދައުވާ ކުރިއިރު، އެ މީހުންގެ ދީނީ ނަސޭހަތް ދިނުމުގެ ހުއްދަ ވެސް ސަސްޕެންޑްކުރި އެވެ.

އެކަމަކު، މި ސަރުކާރުން އެ ހުއްދަ އަލުން ވަނީ ދީފަ އެވެ.

އެ މައްސަލާގައި އިތުރު 16 މީހަކަށް ވެސް ދައުވާ ކުރެ އެވެ. އެ ދައުވާތަކާ ގުޅޭ ޝަރީއަތް ވެސް ކްރިމިނަލް ކޯޓުގައި ކުރިއަށްދެ އެވެ. އެ މައްސަލާގައި ދައުވާލިބޭ މީހުންގެ ތެރޭގައި ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުހައްމަދު އިސްމާއިލް ވެސް ހިމެނެ އެވެ.