އަލިފާން ނިއްވަން އުޅުނު ތިން ފުލުހަކަށް ދުމުގެ އަސަރުކޮށްގެން ފަރުވާދެނީ

އެންސިސްގެ ގުދަނުގައި ރޯވި އަލިފާންގަނޑު ނިއްވަން އެމްއެންޑީއެފް ފަޔާމަނުން ހަރަކާތްތެރިވަނީ. އަލިފާނުގެ އަސަރުކުރި ތިން ފުލުހަކަށް އަންނަނީ ފަރުވާދެމުން. ---ފޮޓޯ: ނިޝާން އަލީ| މިހާރު

11 ޖުލައި 2025 - 12:41

2 comments

ހުޅުމާލޭގައި ހުންނަ އެންސިސް ކުންފުނީގެ ގުދަނެއްގައި ރޭ ރޯވި އަލިފާން ނިއްވަން އުޅުނު ތިން ފުލުހަކަށް ދުމުގެ އަސަރުކޮށް ފަރުވާދެމުން އަންނަ ކަމަށް ފުލުސް އޮފީހުން މިއަދު ބުނެފި އެވެ.

ފުލުހުން ބުނީ ހުޅުމާލެ ހޮސްޕިޓަލުގައި ފަރުވާ ދެމުން އަންނަ ތިން މީހުންގެ ހާލު ވެސް މިހާރު ރަނގަޅު ވަމުން އަންނަ ކަމަށެވެ.

އެންސިސްގެ ގުދަނުގައި ރޯވެގެން ސިފައިންނަށް ރިޕޯޓްކުރީ ރޭ އިރާކޮޅެވެ. އޭރު ގުދަނުގައި ވަނީ ވަރަށް ބޮޑަށް ރޯވެފަ އެވެ. އެމްއެންޑީއެފްގެ ފަޔާމަނުންގެ މަސައްކަތުން އަލިފާން އެއްކޮށް ނިއްވާލެވުނީ ރޭ 11 ވެސް ޖެހި ފަހުންނެވެ.

އެ ގުދަނުގައި ރޯވި އަލިފާން ކޮންޓްރޯލްކުރެވުނު އިރު އެ ސަރަހައްދުގައި ވަނީ ދުން ބޯވެފަ އެވެ. އެހެންވެ, އެ ސަރަހައްދުގައި ދިރިއުޅޭ މީހުން މާސްކް އަޅައިގެން ނޫނީ ނުނުކުތުމަށާއި ދުމުން ރައްކާތެރިވާން ފިޔަވަޅު އަޅަން އެޗްޕީއޭ އިން ރޭ އިލްތިމާސްކުރި އެވެ.

އެމްއެންޑީއެފުން ބުނި ގޮތުގައި ރޯވި ގުދަންބަރީގައި ހުރީ ޕެލެޓާއި ލަކުޑި ފަދަ ތަކެއްޗެވެ. މިތަނުގައި ރޯވި ސަބަބެއް އަދި ނޭނގެ އެވެ.