ޑްރަގް ވިޔަފާރީގެ ތުހުމަތަށް މާލެއިން މީހަކު ހައްޔަރުކޮށްފި

ޑްރަގް ވިޔަފާރިކުރާ ކަމުގެ ތުހުމަތުގައި މާލެއިން 28 އަހަރުގެ ޒުވާނަކު ހައްޔަރުކޮށްފި އެވެ.

އެ މައްސަލާގައި ހައްޔަރުކޮށްފައި ވަނީ މއ. ހިތްތަލަވިލާ، އަހްމަދު ނަޒްމީން އެވެ.

އޭނާ ތަހުގީގަށް 15 ދުވަހަށް ބަންދުކުރަން ކޯޓުން ނެރުނު އަމުރުގައި ވަނީ މިދިޔަ ބުރާސްފަތި ދުވަހު ހިންގި އެ އޮޕަރޭޝަނުގައި ނަޒްމީން ދިރިއުޅޭ ކޮޓަރިން މަސްތުވާތަކެތި ފެނިފައިވާ ކަމަށާއި އަދި އެ ތަކެތީގެ ވިޔަފާރި ކުރުމަށް ބޭނުންކުރާ ސާމާނު ވެސް ފެނުނު ކަމަށެވެ.

ފުލުހުން ބުނީ 214 ގުރާމުގެ ޑްރަގާއި ބަނގުރާ ކަމަށް ތުހުމަތު ކުރެވޭ 1 ފުޅި އެތަނުން ފެނުނު ކަމަށެވެ.

އެ ކޮޓަރި ހުޅުވީ ނަޒްމީން ގެންގުޅުނު ތަޅުދަނޑިއަކުން ކަމަށާއި އެ ކޮޓަރިން އޭނާގެ އައިޑީ ކާޑާއި ޕާސްޕޯޓާއި ވިސާ ޑެބިޓް ކާޑު ވެސް ފެނިފައިވާ ކަމަށް ކޯޓު އަމުރުގައި ފުލުހުންނާ ހަވާލާދީ ބުނެފައިވެ އެވެ.

ބަންދުގެ މަޖިލީހުގައި ނަޒްމީން ވަނީ އެ މައްސަލާގައި އޭނާގެ މައްޗަށް ކުރާ ހުރިހާ ތުހުމަތަކަށް އިންކާރުކޮށްފަ އެވެ. އޭނާ ބުނީ ޑްރަގް ފެނުނު ކޮޓަރީގައި އޭނާ ނޫން އިތުރު މީހުން ވެސް ދިރިއުޅޭ ކަމަށާއި އެ ތަނުގައި ޑްރަގް ހުރިކަން އޭނާއަށް ނޭނގޭ ކަމަށެވެ.

މަސްތުވާތަކެތި ފެނުނު ތަނާއި ނަޒްމީންއާ ގުޅުމެއް ނެތް ކަމަށް ވެސް ދިފާއުގައި ބުނެފައިވެ އެވެ.