އަގަށް އެސައިންމަންޓް ހަދައިދޭ ލަންކާ ޓީޗަރަކު ޑީޕޯޓްކުރުމުން ވެސް ނުހުއްޓުވުނު

އަގަށް އެސައިންމަންޓް ހަދައިދޭ ސްރީ ލަންކާ މީހެއްގެ މައްސަލަ ފުލުހުންނަށް ހުށަހެޅުމުން އެ މީހާ ޑީޕޯޓްކޮށްފައިވާ ކަމަށާއި އެކަމަކު އެ މީހާ އަދިވެސް އެކަން ނުހުއްޓާ ކުރިއަށް ގެންދާތީ އެކަމުގައި އިތުރަށް އެޅޭނެ ފިޔަވަޅެއް ނެތް ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ ފިޒާނާ ރަޝީދު ވިދާޅުވެއްޖެ އެވެ.

އެހެން މީހުން ލައްވައި ނުވަތަ އަގު ދީގެން އެސައިންމަންޓް ހެއްދުވުމަކީ ގާނޫނީ ކުށެކެވެ. ފައިސާ އަށް އެސައިންމަންޓް ހައްދައިދޭ ކަމަށް ބުނާ އިޝްތިހާރުތައް ސޯޝަލް މީޑިއާގެ އެކި ޕްލެޓްފޯމްތަކުގައި އަބަދު ވެސް ދައުރުވެ އެވެ.

މިދިޔަ ބުރާސްފަތި ދުވަހު އެމްކިޔުއޭއިން ބޭއްވި ނޫސްވެރިންގެ ބައްދަލުވުމުގައި މިކަމާ ބެހޭ ގޮތުން "މިހާރު" އިން ސުވާލުކުރުމުން ފިޒާނާ ވިދާޅުވީ އަގަށް އެސައިންމަންޓް ހަދައިދިނުން ހުއްޓުވޭނެ ގޮތެއް އަދި ނެތް ކަަމަށާއި އެކަމަކު އެކަން ވަރަށް ބޮޑަށް ކޮންޓްރޯލް ކުރެވިފައިވާ ކަމަށެވެ.

އޭނާ ވިދާޅުވީ އެސައިންމަންޓް ހަދައިދޭން އިޝްތިހާރުކޮށް ޕޭޖުތައް ހިންގާ ލަންކާ މީހެއްގެ މައްސަލަ ޕޮލިހަށް ހުށަހެޅުމުން ޑީޕޯޓްކޮށްފައި ވިޔަސް އޭނާގެ ނަމްބަރުން ޓެލެގްރާމާއި ވައިބާގެ އިތުރުން ވަޓްސްއެޕާއި ފޭސްބުކްގައި ޕޭޖުތައް ހަދައިގެން އެކަން އިޝްތިހާރުކޮށް އަދިވެސް އެކަން ކުރިއަށް ގެންދާ ކަމަށެވެ.

"މިިދިޔަ އަހަރު މިނިސްޓްރީން ހުށަހެޅި މައްސަލައަކަށް ފުލުހުން އެބަ އޮތް ޖަވާބު ދެއްވާފައި. އޭނާ އަކީ ލަންކާގެ ޓީޗަރެއް އޭރު އޭނާ ކިޔަވައިދެމުން ދިޔައީ ވެސް މިކޮޅުގައި [ރާއްޖޭގައި]. މިހާރު އޭނާ ވަނީ ޑީޕޯޓުކޮށްލާފައި. އެކަމަކު އޭނަގެ ނަމްބަރާއި އެފްބީ ޕޭޖެއް ބްލޮކެއް ނުކުރެވޭ. އެ ހުއްޓުވޭނެ ގޮތެއް ނެތިގެން މި އުޅެނީ. އެއް ޕޭޖު ހުއްޓުވާއިރަށް އަނެއް ޕޭޖު ހަދާ. އޭނާގެ ނަމްބަރު ނުވަތަ އެފްބީ ޕޭޖު ބްލޮކެއް ނުކުރެވޭ. އެއްވެސް ގޮތެއް ނެތް އޭނަ ނަމްބަރު ވެސް އަދި އެފްބީ ޕޭޖު ވެސް ބްލޮކް ކުރެވޭނެ،"" ފިޒާނާ ވިދާޅުވި އެވެ.

އެމްކިޔުއޭގެ ސީއީއޯ، ފިޒާނާ ރަޝީދު މިދިޔަ ބުރާސްފަތި ދުވަހު ނޫސްވެރިން ބައްދަލުކުރައްވަނީ-- ފޮޓޯ: މިހާރު

"އެއީ ސެންސިޓިވް ކޮންޓެންޓް ނޫންވީމާ ނޫނީ އެކަހަލަ ކޮންޓެންޓެއް ނޫންވީމާ ނީނދޭ ކަންނޭގެ ބްލޮކް ކުރެވޭނެ އެއްވެސް ގޮތެއް. އެހެންވެ ވަރަށް ބައިވަރު ޕޭޖުތައް އެބަ އުޅޭ މިހާރު. ހުއްޓުވޭނެ ގޮތެއް ނެތިގެން އަދިވެސް މި އުޅެނީ. އެއް ޕޭޖު ހުއްޓުވާއިރަށް އަނެއް ޕޭޖު އެބަ އާދޭ."

ފިޒާނާ ވިދާޅުވީ މަތީ ތައުލީމު ދޭ މަރުކަޒުތަކުން ހިންގާ ކޯސްތަކުގެ ހުރިހާ އެސައިންމަންޓަކުން 50 ޕަސެންޓު ފާސްވާން ޖެހޭ ގޮތަށް އެމްކިއުއޭގެ އެކްރިޑޭޝަން އުސޫލަށް ބަދަލު ގެނައުމުން އެސައިންމަންޓް ވިއްކުން ވަރަށް ބޮޑަށް ކޮންޓްރޯލް ކުރެވިފައިވާ ކަމަށެވެ.

ފައިސާ އަށް އެސައިންމަންޓް ހަދައިދޭ ކަމަށް ބުނެ އިޝްތިހާރު ޖަހައިފައި ހުރި ބައެއް މީހުންނަށް ގުޅައިގެން އެއްކުރި މައުލޫމާތުތަކުން އެނގުނު ގޮތުގައި އާންމުކޮށް އެސައިންމަންޓެއް ހަދައިދޭ އަގު އުޅެނީ 2،000ރ. އިން މަތީގަ އެވެ.

މީގެ ހަތަރު އަހަރު ކުރިން 2021 ގައި އަމަލު ކުރަން ފެށި މަތީ ތައުލީމުގެ ގާނޫނުގައިވާ ގޮތުން މަތީ ތައުލީމު ފޯރުކޮށްދޭ މަރުކަޒެއްގައި ތައުލީމު ހާސިލުކުރަމުން އަންނަ ދަރިވަރަކު އަމިއްލައަށް ފުރިހަމަކުރަންޖެހޭ މަސައްކަތެއް އެހެން މީހަކު ލައްވައި ކުރުވައިފި ނަމަ 5،000ރ. އިން އެ ދަރިވަރަކު ޖޫރިމަނާކޮށް، އަގަށް އެފަދަ މަސައްކަތްތައް ކޮށްދޭ މީހުން 10،000ރ. އިން ޖޫރިމަނާ ކުރާނެ އެވެ.

އެފަދަ އަމަލުތަކަށް ފާރަވެރިވުމަށް ތައުލީމުދޭ މަރުކަޒުތަކުގައި ހަރުދަނާ ނިޒާމެއް ގާއިމުކުރަންޖެހޭ ކަމަށް އެ ގާނޫނުގައި ބަޔާން ކޮށްފައިވާއިރު، ޖޫރިމަނާގެ އިތުރުން ވެސް އެކަށީގެންވާ ފިޔަވަޅު އެޅުމަށް ހުރަހެއް ނެތް ކަމަށް ބުނެފައިވެ އެވެ. ނަމަވެސް މިހާތަނަށް އެއްވެސް ދަރިވަރަކަށް ނުވަތަ އެފަދަ ކަންކަން ކޮށްދޭ މީހަކަށް ވެސް އެއްވެސް ފިޔަވަޅެއް އެޅިކަމެއް އެނގޭކަށް ނެތެވެ.