މުސާރައިގެ ހޭދަ ބޮޑުވަމުން ދިއުމަކީ ފިސްކަލް ހާލަތު ހަމައަކަށް އަޅުވަން އޮތް ގޮންޖެހުން: ފިނޭންސް

ޕޭ ހާމަނައިޒޭޝަން ސިޔާސަތާ އެކު ވެސް މުސާރަތައް އެތައް ގުނައެއް ބޮޑުވެފައި ވާއިރު، މިހާރު އެކަމަށް ކުރާ ހޭދަ އިތުރަށް ބޮޑުވާ ނަމަ ފިސްކަލް ހަރަދު ނުހިފެހެއްޓޭ މިންވަރަކަށް ދިއުމުގެ ފުރުސަތު އެބައޮތް ކަމަށް ފިނޭންސް މިނިސްޓްރީން ބުނެފި އެވެ.

ރައްޔިތުންގެ މަޖިލީހުގެ އަންނަ އަހަރަށް ލަފާކުރާ ދައުލަތުގެ ބަޖެޓްގެ ދިރާސާކުރާ ކޮމިޓީގައި، މިނިވަން މުއައްސަސާތަކަށް ކަނޑައަޅާފައިވާ ބަޖެޓުތަކާ ގުޅޭގޮތުން ފިނޭންސް މިނިސްޓްރީގެ ޑެޕިއުޓީ މިނިސްޓަރު އަހުމަދު ސާއިދު މުސްތަފާ ވިދާޅުވީ މުސާރައަށް ކުރާ ހޭދަ ކޮންމެ އަހަރަކު ބޮޑުވަމުން ދިއުމަކީ ދައުލަތުގެ ފިސްކަލް ހާލަތު ހަމައަކަށް އަޅުވަން އޮތް އެންމެ ބޮޑު ގޮންޖެހުން ކަމަށެވެ. އަދި ބަޖެޓްގެ ނިސްބަތުން ބޮޑު އަދަދެއް މުސާރައަށް ހޭދަކުރަން ޖެހޭ ކަމަށް އޭނާ ވިދާޅުވި އެވެ.

އޭނާ ވިދާޅުވީ ހަމައެކަނި މުސާރައަށް އަންނަ އަހަރުގެ ބަޖެޓުގައި 14.8 ބިލިއަން ރުފިޔާ ހޭދަ ކުރާއިރު، ޕެންޝަނަށް ދައްކަންޖެހޭ އަދަދާ އެކު އެ އަދަދު 17 ބިލިއަން ރުފިޔާއަށް އިތުރުވާ ކަމަށެވެ. އެހެންވެ، އެއީ ބަޖެޓުގެ ޖުމްލަ އަދަދުގެ ނިސްބަތުން ވަރަށް ބޮޑު އަދަދެއް ކަމަށް އޭނާ ވިދާޅުވި އެވެ.

"މިހާރު އަންދާޒާ މިކުރެވޭ މުސާރައަށް ކުރެވޭ ހޭދަ މިހާރު ކަނޑައަޅާފައިވާ ވަރަށް ވުރެ ބޮޑުވަމުންދާ ނަމަ އަޅުގަނޑުމެންނަށް ފިސްކަލީ ހަރަދު ހިފެހެއްޓުމުގައި، ހަމަ ނުހިފެހެއްޓޭ ލެވެލްއަށް ދިއުން އެކަށީގެންވޭ،" އޭނާ ވިދާޅުވި އެވެ.

ސާއިދު ވިދާޅުވި ކަސްޓަމްސް އާއި އެންޓި ކޮރަޕްޝަން ކޮމިޝަން (އޭސީސީ) އާއި އެހެން އިދާރާތަކުން ވެސް މުވައްޒަފުން އިތުރަށް ބޭނުންވާ ކަމަށް ފާހަގަ ކުރާއިރު، އެ އިދާރާތަކުގެ މިހާރު ވެސް އެންމެ ބޮޑު ހަރަދެއް ދަނީ މުވައްޒަފުންނަށް ކަމަށެވެ. އަދި އެފަދަ މުއައްސަސާތަކުގައި އެހެން ގާނޫނީ ޒިންމާތައް އަދާކުރުމަށް ބަޖެޓު ކުޑަވަނީ ވެސް މުވައްޒަފުންނަށް ކަނޑައަޅަންޖެހޭ ބަޖެޓު އިތުރުވުމުގެ ސަބަބުން ކަމަށް އޭނާ ވިދާޅުވި އެވެ.

"ފާއިތުވި އަހަރުތަކަށް ބަލާއިރު، ފާއިތުވި 15 އަހަރު ބަޖެޓު ފޮތްތަކުން ވެސް ފެންނާނެ އަދިވެސް އެ މައުލޫމާތު އެބަހުރި ބަޖެޓް ފޮތުގައި ވަރަށް ބޮޑުތަނުން މުވައްޒަފުންގެ އަދަދު އެބަ އިތުރުވަމުން އާދޭ. މީގެ ނަތީޖާއަކަށް ވަނީ އިގްތިސާދީ ދާއިރާތަކަށް ކުރަން ހުންނަ ހަރަދު ހަނިވަމުން އައުން،" އޭނާ ވިދާޅުވި އެވެ.

ދައުލަތުން ޕީއެސްއައިޕީ އާއި މަޝްރޫއުތަކަށް ކުރާ ހޭދަ ކުޑަވާ ސަބަބަކީ ވެސް މުވައްޒަފުންނަށް ކުރަން ޖެހޭ ހަރަދުތައް ބޮޑުވަމުން ދިއުން ކަމަށް އޭނާ ވިދާޅުވި އެވެ.

އޭނާ ވިދާޅުވީ މިއަހަރު ވެސް ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލާ އެކު ކަސްޓަމްސްއަށް އާ މުވައްޒަފުން ނަގަން ފުރުސަތުތައް ދީފައިވާ ކަމަށެވެ. އަންނަ އަހަރު ބައެއް އިދާރާތަކާ ވާހަކަ ދައްކައިގެން ޕާފޯމަންސް ބަޖެޓްތަކެއް ހެދުމަށް ވިސްނަމުންދާ ކަމަށް ވެސް ސާއިދު ވިދާޅުވި އެވެ.

"ފިސްކަލް އެފެއާޒް ޑިމާޓްމެންޓަށް މިއީ ބަޖެޓު ހެދުމުގައި މިއީ ދިމާވި އެންމެ ބޮޑު ގޮންޖެހުން. އެކަމަށް ރިއާޔަތްކޮށް އަޅުގަނޑުމެންނަށް ފެނޭ ބަޖެޓް ވަރަށް ބޮޑަށް މެނޭޖްކޮށްގެން ކޮންޓްރޯލް ކޮށްގެން ގެންދަން ޖެހޭ އަހަރަކަށް ވާނެ ކަމަށް،" އޭނާ ވިދާޅުވި އެވެ.

ސަރުކާރުގެ އެކި އިދާރާތަކުގައި މަސައްކަތްކުރާ 54،000 މުވައްޒަފުންގެ މުސާރައަށް 17.1 ބިލިއަން ދޭން ބަޖެޓުގައި ހިމަނައިފައިވެ އެވެ. އެއީ މިއަހަރަށް ވުރެ ގާތްގަނޑަކަށް 7،000 މުވައްޒަފުން އިތުރު އަދަދެކެވެ. އަދި އަންނަ އަހަރުގެ ބަޖެޓުގައި ޕޭ ހާމަނައިޒް ކުރުމަށް ވެސް 1.7 ބިލިއަން ރުފިޔާ ހިމަނާފައިވެ އެވެ.

އަންނަ އަހަރަށް ސަރުކާރުން ހުށަހަޅާފައިވަނީ 64.2 ބިލިއަން ރުފިޔާގެ ބަޖެޓެކެވެ. އަދި އެ ބަޖެޓުގެ ގާތްގަނޑަކަށް 30 ޕަސެންޓް ހަރަދު ކުރަނީ މުވައްޒަފުންގެ މުސާރަ އާއި އިނާޔަތްތަކަށެވެ. ދަރަނި އަދާކުރުމަށް 29 ޕަސެންޓް ހޭދަ ކުރާއިރު ޖުމްލަ ބަޖެޓުގެ 62 ޕަސެންޓް ހޭދަކުރަނީ ރިކަރަންޓް ހަރަދަށެވެ.