އެންމެބޮޑު ކާމިޔާބީއަކީ އިގުތިސާދު ހަމައަކަށް އެޅުވުން: އަބްދުއްރަހީމް

ޕީއެންސީގެ ސަރުކާރަށް މި އަހަރު ދެ އަހަރުވީ އިރު އެންމެ ބޮޑު ކާމިޔާބީ އަކީ ރާއްޖޭގެ އިގުތިސާދު ހަމައަކަށް އެޅުވުން ކަމަށް އެ ޕާޓީގެ ޗެެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒުގެ ސަރުކާރަށް މިއަދު ދެ އަހަރު ފުރުމާ ގުޅިގެން ޕީއެސްއެމަށް ދެއްވި ހާއްސަަ އިންޓަވިއުއެއްގައި އަބްދުއްރަހީމް ވިދާޅުވީ ރައީސް މުއިއްޒު ސަރުކާރާ ހަވާލުވެވަޑައިގެންނެވިއިރު، ރާއްޖޭގެ އިގުތިސާދު އޮތީ "ހޯދާ ބަލާ ބަޔަަކަށް ވެސް ނުފެންނަހާ އަޑީގައި" ކަމަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހަވާލުކުރި އެކިއެކި މަސައްކަތްތަަކަށް [ކުންފުނިތަކަށް] ދޭންޖެހޭ ފައިސާގެ ތެރެއިން ނުވަ ބިލިއަން ރުފިޔާ ނުދީ އޮތުމަކީ އޭގެ ހެއްއްގެ ގޮތުގައި އަބްދުއްރަހީމް ދެއްކެވި އެވެ. އެ ކަމަކު އެ ފައިސާ ވެސް މި ސަރުކާރުން އޭގެ ހައްގުވެރިންނަށް ދެމުން އަންނަ ކަމަށް އެ މަނިކުފާނު ވިދާޅުވި އެވެ.

"[ރައީސް މުއިއްޒުގެ ސަރުކާރުގެ] ކާމިޔާބީއެއްގެ ގޮތުގައި އެއް ކަމެއް ސިފަކުރާ ކަމަށް ވަންޏާ އަޅުގަނޑު ހަމަ ސިފަކުރާނީ ދިވެހިރާއްޖޭގެ އިގުތިސާދު ހަމައަކަށް އެޅުވި އެޅުވުން،" އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި ރައީސް މުއިއްޒުގެ ވެރިކަން ފެށުމާ އެކު، ވާދަވެރިން ބުނަމުން އައީ ރާއްޖެ ބަނގުރޫޓު ނުވެ ހިފަހައްޓާލެވޭނީ ގިނަ ވެގެން ހައެއްކަ މަހަށް ކަމަށެވެ.

"އެކަމަކު ނުވި ނޫންތޯ؟ ދެ އަހަރު ވެގެން މި ދިޔައީ، ފައިސާ ޗާޕެއް ނުކުރައްވާ، ދަރަނި ނުދެއްްކިގެން ގައުމު ޑިފޯލްޓަކަށް ނުދޭ. ހަމަ ދައްކަން ޖެހޭ ދަރަންޏެއް ދައްކަން ޖެހޭ ވަގުތުގައި ދައްކަވަމުން އެ ގެންދަވަނީ،" އަބްދުއްރަހީމް ވިދާޅުވި އެވެ.

މި ސަރުކާރާ ކުރީގެ ސަރުކާރުތަކާ ދެމެދު ހުރި ތަފާތަކީ ކޮބައިތޯ ޕީއެސްއެމުން ސުވާލު ކުރުމުން އަބްދުއްރަހީމް ވިދާޅުވީ އެއީ ހަމަހަމަކަމާއި ހަމަޖެހުން ގެނައުން ކަމަށެވެ. ހަމަހަމަކަމާއި ރައްކާތެރިކަން ކަށަވަރުކުރުމާ އެކުގައި ތަރައްގީގެ މަގުގައި ކުރިއަށް ދިއުން އެއީ އެހެން ސަރުކާރުތަކާ މި ސަރުކާރާ ދެމެދު ހުރި އެންމެ ބޮޑު ތަފާތުކަމަށް ވެސް އެ މަނިކުފާނު ވިދާޅުވި އެވެ.

"ސިޔާސީ މަސްރަހުގައި އެއްވެސް ކަންބޮޑުވުމެއް ނެތް"

ރާއްޖޭގެ ކޮންމެ ސިޔާސީ ޕާަޓީއަކުން ވެސް ކުރަން ބޭނުންވާ ސިޔާސީ ކޮންމެ މަސައްކަތެއް ކުރުމުގެ ފުރުސަތު މިހާރު އެބަ އޮތް ކަމަށާއި ސިޔާސީ މަޝްރަހުގައި އެއްވެސް ކަންބޮޑުވުމެއް ނެތް ކަމަށް ވެސް އަބްދުއްރަހީމް މިއަދު ވިދާޅުވި އެވެ.

ނަމަވެސް އެ ބަޔަކަށް ހަރަކާތް ހިންގޭނީ އެބަޔަކަށް ތާއީދު އޮންނަ ވަރަކުން ކަމަށާއި މީހުން މަދުވުން އެއީ ސަރުކާރުން ނުފޫޒު ފޯރުވައިގެންވާ ކަމެއް ނޫން ކަމަށް ވެސް އެ މަނިކުފާނު ވިދާޅުވި އެވެ.

"ރާއްޖޭގައި އަޅުގަނޑު ދަންނަވާނީ މިހާރު މި އޮތީ ސިޔާސީ ހަމަޖެހުން ގާއިމްކުރެވިފައޭ. ސިޔާސީ ހަމަޖެހުން ގާއިމްވެފައި މި އޮތީ ދުވަހަކު ވެސް ސިޔާސީ ހަމަޖެހުން ގާއިމް ނުވާ މިންވަރަށް،" އަބްދުއްރަހީމް ވިދާޅުވި އެވެ.

ސިޔާސީ ގޮތުން ކުރަން އުޅޭ މަސައްކަތަކަށް ސަރުކާރުން ހުރަސް އަޅާތީ ނުކުރެވިގެން އުޅެން މިހާރު ނުޖެހޭނެ ކަަމަށް ވެސް އެ މަނިކުފާނު ވިދާޅުވި އެވެ.

ސިޔާސީ ލީޑަރުން ބޭނުން ރަށަކަށް ބޭނުން އިރަކު ވަޑައިގެން ސިޔާސީ މަސައްކަތް ކުރެއްވުމުގެ މިނިވަންކަން މިހާރު އެބަ އޮތް ކަމަށް ވެސް އަބްދުއްރަހީމް ވިދާޅުވި އެވެ. އޭގެ މިސާލެއްގެ ގޮތުގައި ދެއްކެވީ ކުރީގެ ރައީސް އިބްރާހީމް މުހައްމަދު ސޯލިހާއި ކުރީގެ ރައީސް އަބްދުﷲ ޔާމީން ރަށްރަށަށް ކުރެއްވި ދަތުރުފުޅުތަކެވެ.