އިޒްރޭލުން ސީރިއާގެ ކަންކަމާ ނުބެހެން ޓްރަމްޕު އިންޒާރު ދީފި

އެމެރިކާގެ ރައީސް ޑޮނަލްޑް ޓްރަމްޕް (ވ) އާއި ސީރިއާގެ ރައީސް އަހްމަދު އަލް ޝަރާ ވައިޓް ހައުސްގައި. -- ފޮޓޯ: އޭއެފްޕީ

02 ޑިސެމްބަރ 2025 - 10:30

އިޒްރޭލުން ސީރިއާގައި ހިންގި އޮޕަރޭޝަނެއްގައި 13 މީހަކު މަރާލިތާ އެއް ދުވަސް ފަހުން އެމެރިކާގެ ރައީސް ޑޮނަލްޑް ޓްރަމްޕު އިޒްރޭލަށް އިންޒާރު ދެއްވައިފި އެވެ.

ސީރިއާގެ އެތެރޭގެ މައްސަލަތައް ގޯސްވާނެ ކަންކަން ނުކުރުމަށާއި އެ ގައުމުގެ އާ ސަރުކާރަށް ގޮންޖެހުން ކުރިމަތިވާނެ ކަންކަން ނުރުމަށް ޓްރަމްޕު އިންޒާރު ދެއްވިތާ ގިނަ އިރުތަކެއް ނުވެ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ވަނީ ޓްރަމްޕު ފޯނުން ގުޅައި ނަތަންޔާހޫއާ ވާހަކަ ދެއްކެވި ކަމަށާއި އެމެރިކާއަށް އައުމަށް އަނެއްކާވެސް ދައުވަތު ދީފައިވާ ކަމަށް ބުނެފަ އެވެ.

"އިޒްރޭލުން ސީރިއާއާ އެކު ރަނގަޅު ގޮތުގައި އަދި ތެދުވެރިކަމާ އެކު މަޝްވަރާ ކުރިއަށް ގެންދިއުމަކީ ވަރަށް މުހިންމު ކަމެއް. އަދި ސީރިއާ އަކީ ފުދުންތެރި ދައުލަތަކަށް ބަދަލުވުމަށް ހުރަސް އެޅޭނެ އެއްވެސް ކަމެއް ހިންގައިގެން ނުވާނެ،" ޓްރަމްޕު އޭނާގެ ޓްރޫތު ސޯޝަލް ޕްލެޓްފޯމްގައި ވިދާޅުވި އެވެ.

ސީރިއާގެ ވެރިކަމުން ބައްޝާރުލް އަސަދު ދުރުކޮށް، ކުރިން އެމެރިކާއިން ޓެރަރިސްޓް ޖަމާއަތެއްގެ ލީޑަރެއްގެ ގޮތުގައި ބަލަމުން އައި އަހްމަދު އަލް ޝަރާ ވެރިކަމާ ހަވާލުވި ފަހުން އެމެރިކާއިން ގެންދަނީ އިޒްރޭލާއި ސީރިއާ އެއްބަސްވުމަކަށް ގެނެވޭތޯ މަސައްކަތްކުރަމުންނެވެ. އެމެރިކާގެ ޓެރަރިސްޓް ލިސްޓުން ޝަރާގެ ނަން އުނިކޮށް އޭނާއާ އެކު ވައިޓް ހައުސްގައި ޓްރަމްޕު ވަނީ މިދިޔަ މަހު ބައްދަލު ވެސް ކުރައްވައިފަ އެވެ.

ނަމަވެސް އިޒްރޭލުން ސީރިއާ ސަރަހައްދަށް ހަމަލާދިނުން ހުއްޓުމަކަށް ނާންނާތީ މަސްރަހު ހޫނުކޮށް އޮއްވައި މިދިޔަ ހުކުރު ދުވަހުގެ ރޭ އިޒްރޭލުން ދިން ހަމަލާތަކެއްގައި 13 މީހަކު މަރުވުމާ އެކު ހާލަތު ވަނީ އިތުރަށް ގޯސްވެފަ އެވެ.

އިޒްރޭލުގެ މި އަމަލަކީ ހަނގުރާމައިގެ ޖަރީމާ ކަމަށް ސީރިއާއިން ބުނާއިރު އިޒްރޭލުން ބުނަމުންދަނީ ހަމަލާ ދިނީ ހަނގުރާމަވެރި ޖަމާއަތަކަށް ކަމަށެވެ.

ޓްރަމްޕު ވިދާޅުވެފައިވާ ގޮތުގައި ޝަރާގެ ލީޑަޝިޕްގައި ސީރިއާއަށް ގެންނަމުންދާ ބަދަލުތަކާ މެދު އޭނާ ވަރަށް ބޮޑަށް ހިތްހަމަޖެހެ އެވެ. ޝަރާ މަސައްކަތްކުރައްވަނީ ސީރިއާ ރައްޔިތުންނަށާއި އިޒްރޭލަށް ވެސް ރަނގަޅު ގޮތް ވުމަށް ކަމަށް ޓްރަމްޕު ވިދާޅުވި އެވެ.

ޒަމާންވީ ދާހިލީ ހަނގުރާމައަށް ފަހު ސީރިއާ އަލުން އާރާސްތުކުރުމަށް އެމެރިކާއިން ހުރިހާ ގޮތަކުން ވެސް އެހީތެރިކަން ދޭނެ ކަމަށް ޓްރަމްޕު ވަނީ ޔަގީކަން ދެއްވައިފަ އެވެ. -- އޭއެފްޕީ

ސީރިއާ ޑޮނަލްޑް ޓްރަމްޕް އިޒްރޭލް ރައީސް ޑޮނަލްޑް ޓްރަމްޕް އަހްމަދު އަލް ޝަރާ

1 ކޮމެންޓް, 3 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

އަސަރު68

02 December 2025

ތިޔަމީހަކު ދުވަހަކު ދެކޮޅު ޖެހޭ ވާހަކައެއް ދައްކާތަ. ހިތާދެކޮޅަށް އެއްޗެކޭބުނެފާ ތިމީހަކު އެމީހުން ލައްވާ ކުރާނެހާ ނުބައިކަމެއް ކުރުވަނީ. ޖާހިލުކަން އިންތިހާއަށް ގޮސްފާ ހުރިމީހެއް ތިއީ. ތިޔަ ދެމީހުން ކުރެ އެކަކުވެސް މުސްލިމުންނަކަށް ރަނގަޅެއްނުވާނެ. އެމެރިކާ ސުލްހަވާން ބޭނުންވާ ދުވަހަކީ މުޅި ދުޔެ ސުލްހަވާނެ ދުވަހެއް. އެކަމަކު ޔަހޫދީންނަކީ ހަމަ ޔަހޫދީން. ބުނާއެއްޗަކާ އަމަލަކާ ދިމާނުވާނެ.