ހުޅުމާލޭގެ އެކަކާއި ދެއަކުން ދޫކޮށްފައިވާ ގޯތިތަކުގައި އިމާރާތް ކުރެވޭ އުސްމިން 10 ބުރިއަށް ބަދަލުކޮށް، އެ އިމާރާތެއްގެ އެންމެ ތިރީ ފްލޯ ޕާކިން އަށް ހާއްސަަ ކުރަންޖެހޭ ގޮތަށް ހައްދަވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ހުޅުމާލެ 1 ގައި ދިރިއުޅޭ ރައްޔިތުންނާ ބައްދަލުކުރައްވަން ރެހެންދި ސްކޫލްގައި މިހާރު ކުރިއަށް ގެންދާ ޖަލްސާގައި ރައީސް ވިދާޅުވީ، ގޯތީގައި އިމާރާތް ކުރެވޭ އުސްމިނަކީ ޕްލޭނާއި އިންފްރާސްޓްރަކްޗާގެ އިތުރުން އެއީ ފެނާއި ނަރުދަމާ އާއި އެ ތަނުގެ ލޭންޑް ޔޫސް ޕްލޭނާ ވެސް ގުޅިފައިވާ ކަމެއް ކަމަށެވެ.
ރައީސް ވިދާޅުވީ ސަރުކާރުގެ ސިޔާސަތުތަކަށް އަންނަ ބަދަލުތަކުގެ ސަބަބުން އެ ކަމަށް ބަދަލުތަކެއް އަންނާނެ ކަމަށެވެ. އެހެންވެ، އެ މަނިކުފާނު ވައުދުވެވަޑައިގެންފައިވާ ގޮތަށް ހުޅުމާލޭގެ އެކަކާއި ދެއަކުން ދޫކޮށްފައިވާ ގޯތިތަކުގައި އިމާރާތް ކުރެވޭނެ އުސްމިނަކީ 10 ބުރި ކަމަށް ކަނޑައަޅަން ނިންމާފައިވާ ކަމަށް ވިދާޅުވި އެވެ.
މިހާރު އޮންނަ ގޮތުން ހުޅުމާލޭ އެކެއްގައި އެންމެ އުސްކޮށް އިމާރާތް ކުރެވެނީ 8 ބުރިއަށެވެ.
ރައީސް މުއިއްޒު ވިދާޅުވި ގޮތުގައި 10 ބުރިއަށް އިމާރާތް ކުރެވޭ ގޮތަށް ހުއްދަ ދޭނީ ޝަރުތުތަކަކާ އެކު އެވެ. އޭގެ ތެރޭގައި އިމާރާތުގެ އެންމެ ތިރީ ފްލޯއަކީ އެ އިމާރާތުގައި ދިރިއުޅޭ މީހުންގެ ވެހިކަލްތައް ޕާކުކުރުމަށް ހާއްސަ ފްލޯއަކަށް ހަދަން މަޖުބޫރުކުރުން ހިމެނެ އެވެ. އަދި ފުރަތަމަ ފްލޯ ހާއްސަ ކުރަންޖެހެނީ ނޮން ރެޒިޑެންޝަލް ޔޫސް އަށް ނުވަތަ ދިރިއުޅުން ނޫން އެހެން ބޭނުމަކަށް ނުވަތަ ވިޔަފާރިއެއް ކުރާ ތަނެއްގެ ގޮތުގައި ބޭނުން ކުރުމަށެވެ.
އެ މަނިކުފާނު ވިދާޅުވީ ވިޔަފާރީގެ ބޭނުމަކަށް ނުވަތަ އާމްދަނީ ހޯދޭނެ ކޮންމެވެސް ކަމެެއް ކުރުމަށް އެ ފްލޯ ހާއްސަ ކުރަންޖެހޭނެ ކަމަށެވެ.
އެ ޝަރުތުތަކާ އެކު 10 ބުރިއަށް އިމާރާތް ކުރުމަށް ހުޅުވާލާނެ ކަމަށް ރައީސް ވިދާޅުވި އެވެ.
މިރޭގެ ޖަލްސާގައި ރައީސް ފާހަގަކުރެއްވި ގޮތުގައި، ހުޅުމާލެ 1 ގައި ސޯޝަލް ކެޓަގަރީގެ ދަށުން ގުރުނަގައިގެން ގޯތި ދޫކޮށްފައިވެ އެވެ.
ފައިސާ ދައްކައިގެން އެ ބިން މިލްކު ކުރެވޭ ގޮތަށް ދޫކޮށްފައިވާ އެ ތަންތަނަށް މިހާތަނަށް އެއްވެސް މާލީ ލުޔެއް ދީފައި ނުވާތީ ރައީސް ވިދާޅުވީ ގޯތިތައް ލިބިފައިވާ މީހުންގެ އެގްރީމަންޓުގެ ޖުމްލަ އަގުގެ 10 ޕަސެންޓުގެ ޑިސްކައުންޓެއް ދޭން ނިންމަވާފައިވާ ކަމަށެވެ.
އެ މަނިކުފާނު ވިދާޅުވި ގޮތުގައި އެ ބިމުގެ އަގުގެ ބޮޑު ބައެއް ބައެއް ފަރާތްތަކުން މިހާރު ވަނީ ދައްކައިފަ އެވެ. އެހެންވިޔަސް ބާކީ ދައްކަން އޮތް އަގުގެ ތެރެއިން އެ ބައި ކެނޑިގެންދާނެ ކަމަށް ރައީސް ވިދާޅުވި އެވެ.
"މި ގޯތިތަކަށް އެއްވެސް ކަހަލަ ލުޔެއް މާލީ ގޮތުން ސަރުކާރުތަކުން ދީފައެއް ނެތް. މި ކިޔަނީ ބިޑުކޮށް ގަނެފައި ހުރި ގޯތިތަކުގެ ވާހަކައެއް ނޫން. ގުރުއަތުލައިގެން ޕޮއިންޓް ސްކީމުން ގޯތި ލިބިފައި ހުރި ފަރާތްތަކަށް ބަންޑާރަ ގޯތި ލިބިފައިވާ ފަރާތްތަކުގެ އެގްރީމަންޓުގެ ޖުމްލަ އަގުގެ 10 ޕަސެންޓްގެ ޑިސްކައުންޓެއް ސަރުކާރުން ދޭނެ،" ހުޅުމާލޭ 1 ގެ ރައްޔިތުންނާ ބައްދަލުކުރައްވާ ރައީސް ވިދާޅުވި އެވެ.
އެ ގޯތިތަކަށް ދައްކަން ޖެހޭ އަގަށް ލުޔެއް ދިން އިރު މި ފަހުން އެ މަނިކުފާނު ވަނީ 4،000 ފްލެޓުގެ ކުއްޔާއި ޑިޕޮސިޓު ވެސް ވަރަށް ބޮޑަށް ކުޑަކޮށްދީފަ އެވެ.