ރައީސް ޑރ. މުހައްމަދު މުއިއްޒު، މާލެ ރަށްވެހީންގެ ޖަމިއްޔާގެ މެމްބަރުންނާ މިއަދު ބައްދަލުކުރައްވައިފި އެވެ.
އެ ބައްދަލުވުން ބޭއްވީ ރައީސްގެ ރަސްމީ ގެކޮޅު، މުލީއާގޭގަ އެވެ.
މާލެ ރަށްވެހީންގެ ޖަމިއްޔާއިން ބުނީ، ހުޅުމާލެ އާއި ގުޅިފަޅާއި ގިރާވަރުފަޅު އަދި ރަސްމާލޭގެ ތަރައްގީއާ މެދު މުހިއްމު މަޝްވަރާތަކެއް ރައީސާއެކު ކުރި ކަމަށެވެ.
ނަމަވެސް އެ މަޝްވަރާތަކުގެ ތަފުސީލެއް އެއްވެސް ފަރާތަކުން އަދި މީޑިއާއާ ހިއްސާއެއް ނުކުރެ އެވެ.
މާލެ ރަށްވެހީންގެ ޖަމިއްޔާ އިން ސޯޝަލް މީޑިއާ އަށް ދޫކޮށްލި ފޮޓޯތަކުން ފެންނަ ގޮތުގައި އެ ބައްދަލްވުމުގައި މާލޭގެ ޑެޕިއުޓީ މޭޔަރު މުހައްމަދު އަރީޝް އާއި ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ މޫސާ އަލީ ޖަލީލްގެ އިތުރުން އެ ޕާޓީގެ ޕީޖީ ގުރޫޕްގެ ލީޑަރު އިބްރާހިމް ފަލާހް ވެސް ބައިވެރިވެވަޑައިގެންނެވި އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ގިނަ ބަޔަކަށް ގޯތި ދޫކުރި ކަމުގެ ލިޔުން ހަވާލުކުރި ނަމަވެސް ހުޅުމާލެ 3 އާއި ގުޅިފަޅާއި ގިރާވަޅުފަޅު ހިއްކައި ނުނިމެ އެވެ. އެހެންވެ، މިހާތަނަށް ވެސް ގޯތި ހަވާލުކުރުމުގެ މަސައްކަތް އޮތީ މަޑުޖެހިފަ އެވެ.
މި ސަރުކާރުން ހުޅުމާލެ 3 ހިއްކުމުގެ މަސައްކަތް މި ހަފުތާގައި ނިންމާފައިވާއިރު، ދެން އެންމެ އަވަހަށް ފަށަން ކަނޑައަޅާފައި ވަނީ ގިރާވަރުފަޅު ހިއްކުމުގެ މަސައްކަތެވެ. އަދި ގުޅިފަޅުން ކުރިން ހިއްކަން ހަމަޖެހިފައި އޮތް ސަރަހައްދަށް ވުރެ ބޮޑު ސަރަހައްދެއް މިހާރު ވަނީ ހިއްކައި ގޯތިތައް ދޭން ފަށައިފަ އެވެ.