މޯލްޑިވިއަން އައިޑޮލް އިން މަޝްހޫރުކަން ހޯދި ލަވަ ކިޔުންތެރިޔާ ޝަލަބީ އިބްރާހީމް އޭނާގެ ދެވަނަ މަދަހަ ސީޑީ "ހިދާއީ ނޫރު 2" އިއްޔެ ނެރެފި އެވެ.
އިއްޔެ ހަވީރު ބޭއްވި ހަފުލާއެއްގައި އެ ސީޑީ ނެރެދެއްވީ އުއްތަމަފަނޑިޔާރު އަބްދުﷲ ސައީދެވެ.
"ހިދާއީ ނޫރު 2" ގައި ޝަލަބީގެ އަޑުން ކިޔާފައިވާ ހަތް މަދަހަ އެވެ. މަދަހަތަކުގެ ރާގު ހަދާފައި ވަނީ ވެސް ޝަލަބީ އެވެ.
ސީޑީގައި ހިމެނޭ ހަތް މަދަހައިގެ ތެރެއިން އެންމެ މަދަހައެއް ފިޔަވައި ހުރިހާ މަދަހައެއްގެ ޅެންތައް ހަދާފައި ވަނީ އާދަމް ނަސީރު އިބްރާހީމެވެ. އަނެއް މަދަހަ ހަދާފައި ވަނީ ނަސްމާ އަބްދުލް މުހްސިނެވެ.
މި ހުރިހާ މަދަހަތަކެއް ރިކޯޑްކޮށްފައި ވަނީ ހައުސް އޮފް މިއުޒިކްގެ އެހީތެރިކަމާ އެކުގަ އެވެ. މިއިން އެއްވެސް މަދަހައެއްގައި މިއުޒިކަލް އިސްޓްރޫމަންޓެއް ބޭނުމެއް ނުކޮށް، ހިމަނާފައި ވަނީ ޝަލަބީގެ އަޑު އެކަންޏެވެ.
މި މަދަހަ ސީޑީ އާންމުންނަށް ހިލޭ ބަހާ އިރު، މި މަދަހަތައް ސައުންޑް ކުލައުޑުން ވެސް މިހާރު އަޑު އަހައި ލެވޭނެ އެވެ.