އެނާޖީ މިނިސްޓަރު ތޯރިގު އަދި ސްޓޭޓް މިނިސްޓަރު މަތީން ނޫސް ކޮންފަރެންސްގައި މަޝްވަރާއެއްކުރައްވަނީ. ފޮޓޯ: ނިޝާން އަލީ /މިހާރު
02 ޖުލައި 2017 - 18:07
31 comments
ތެލުގެ އަގު ހެޔޮވުމާ ގުޅިގެން މިމަހުން ފެށިގެން ފިއުލް ސާޗާޖު އުނިކުރުމުން ކަރަންޓުގެ އަގު މިމަހުން ފެށިގެން 10- 15 ޕަސެންޓާ ދެމެދުގެ މިންވަރަކަށް ހެޔޮވާނެ ކަމަށް ބުނެފި އެވެ.
ދިވެހިރާއްޖޭގެ އަޑުގެ ސެނަކޯ މާލަމްގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެނާޖީ މިނިސްޓަރު ތޯރިގު އިބްރާހިމް ވިދާޅުވީ ފިއުލް ސާޗާޖަށް ގެނައި ބަދަލާއެކު ސްޓެލްކޯ އާއި ފެނަކަ މެދުވެރިކޮށްދޭ ކަރަންޓު ދޭ ހުރިހާ ރަށެއްގެ އަގު ވެސް އެ ބަދަލާއެކު ހެޔޮވެގެންދާނެ ކަމަށެވެ.
"ކުދި އަދި މެދުފަންތީގެ ވިޔަފާރިތަކަށް އަދި ޖުމްލަކޮށް ހުރިހާ ވިޔަފާރިތަކަށް ވެސް ކަރަންޓުގެ އަގަށް ބަދަލު ގެނެވިފައި އޮންނާނެ. އަދި މި ބަދަލުތައް ދެން ބިލް އަންނައިރު އޮންނާނީ އިމްޕްލިމެންޓްވެފައި. އަގު ބަދަލު ގެންނަން ވާހަކަދައްކަނީ އެއް ނޫން،" ތޯރިގު ވިދާޅުވި އެވެ.
މިނިސްޓަރު ވިދާޅުވީ މިހާރު ގެނައި ބަދަލާ ގުޅިގެން ސްޓެލްކޯ އާއި ފެނަކަ އަށް ލިބޭ އާމްދަނީން އަހަރަކު ގާތްގަނޑަކަށް 270 މިލިއަން ރުފިޔާ ރައްޔިތުންނަށް ދޫކޮށްލެވޭ ކަމަށެވެ. އަދި އެ ކުންފުނިތަކަށް ލިބޭ އާމްދަނީ ކުޑަވުމުން ހިންގުން ހަރުދަނާކުރަން ފިޔަވަޅުތަކެއް އަޅަން ނިންމާފައިވާ ކަމަށް ވެސް ތޯރިގު ވިދާޅުވި އެވެ.
ކަރަންޓުގެ އަގަށް ގެނައި ބަދަލާ ބެހޭ ކަރަންޓުގެ ހިދުމަތްދޭ ކުންފުނިތަކުގެ އިސްވެރިންނާއެކު އެނާޖީ މިނިސްޓަރު ތޯރިގު ނޫސްވެރިންނާ މިއަދު ބައްދަލުކުރައްވަނީ. ފޮޓޯ: ނިޝާން އަލީ /މިހާރު
"މި ގެނައި ބަދަލާ ގުޅިގެން ހުރިހާ ރައްޔިތުންނަށާއި ވިޔަފާރިތަކަށް ފައިދާކުރާނެ. މީގެ ސަބަބުން ސަރުކާރުގެ ކަރަންޓް ޔުނިޓިލިޓީ ކުންފުނިތަކަށް އަހަރަކު ލިބެމުންދިޔަ 270 މިލިއަން ރުފިޔާގެ ސޭވިން އެއް ރައްޔިތުންނަށް މިދެނީ. ކުރިޔަށް އޮތްތަނުގައި އެ ކުންފުނިތަކުގެ އެފިޝަންސީ ވަރުގަދަކޮށްގެން މިއަށްވުރެ ހެޔޮ ބަދަލު އަދިވެސް ގެނެވޭނެ،" މިނިސްޓަރު ވިދާޅުވި އެވެ.
ކަރަންޓުގެ އަގު ހެޔޮކުރަން ނިންމި ގޮތުގެ ތަފުސީލެއް އެ ކުންފުނިތަކުން ހާމައެއްނުކުރެ އެވެ. އަދި އެ ކުންފުނިތަކުން ބުނީ ތަފުސީލްތައް ކުރިޔަށް އޮތް ހަފުތާއެއްހާ ދުވަހުގެ ތެރޭގައި އާއްމުކުރާނެ ކަމަށެވެ.
މިނިސްޓަރު ތޯރިގު ވިދާޅުވީ ކަރަންޓުގެ އަގަށް ބަދަލު ގެނައިއިރު ޓެރިފަށާއި ފިއުލް ސާޗާޖު ނަގާ ބޭންޑަށް އެއްވެސް ބަދަލެއް ގެންނަން ނިންމާފައިނުވާ ކަމަށެވެ.
"ސާޗާޖުގެ ބޭންޑަށް އެއްވެސް ބަދަލެއް ގެންނާކަށް އަދި ނިންމާފައެއް ނެތް. ކުރިން އޮތް ގޮތަށް އޮންނާނީ،" ތޯރިގު ވިދާޅުވި އެވެ.
މިނިސްޓަރު ވިދާޅުވީ ކަރަންޓުގެ އަގަށް ބަދަލު ގެންނަން ނިންމީ ދާދިފަހުން ތެލުގެ ޑިއުޓީ ފަސް ޕަސެންޓަށް ކުޑަކުރުމާ ގުޅިގެން ކަމަށެވެ. އަދި އެ ބަދަލާ ގުޅިގެން ސްޓެލްކޯއަށާއި ފެނަކައަށް ތެޔޮ ލިޓަރެއް ވިއްކާ އަގު މިހާރު 7.94ރ. އަށް ހެޔޮކޮށްފައިވާ ކަމަށް ވެސް ތޯރިގު ވިދާޅުވި އެވެ.
"ފިއުލް ސާޗަށް ބަދަލުތަކެއް އައިސްގެން އަގުހެޔޮކުރެވިގެން ދަނީ. ފިއުލް ސާޗާޖު ނަގަނީ 8ރ. އިން ފެށިގެން މައްޗަށް ދިއުމުން،" މިނިސްޓަރު ވިދާޅުވި އެވެ.
ތޯރިގު ވިދާޅުވީ އެސްޓީއޯ އިން ކަރަންޓު ކުންފުނިތަކަށް ތެޔޮ ވިއްކާ އަގަކީ ވަރަށް ހާއްސަ އަގެއް ކަމަށެވެ. އަދި އެ އަގު އެގޮތުގައި ހިފެހެއްޓުމަށް ސަރުކާރުން މަސައްކަތްކުރާނެ ކަމަށް ވެސް މިނިސްޓަރު ވިދާޅުވި އެވެ.
ސަރުކާރުން ވަނީ ކަރަންޓުގެ ހިދުމަތްދޭ ކުންފުނިތަކަށް ޑީސަލް ލީޓަރެއް ގަންނަ އަގު 8ރ. އަށް ވުރެ ބޮޑުވާ ނަމަ ކޮންމެ ދިހަ ލާރިއަކުން ތިން ލާރި ފިއުލް ސާޗާޖުގެ ގޮތުގައި ނެގުމަށް ހުއްދަ ދީފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބާބޫ
04 July 2017
ތިގޮތަށްތަ އަގުހެޔޮކުރަނީ ؟ ތެލުގެ އަގުބޮދުވީމާ އިތުރައްނަގާއެއްޗެއް ތެލުގެއަގުހެޔޮވީމާ ކަޑާފައި ތިބުނަނީ އަގުހެޔޮކުރިވާހަކަ ؟
މޫސަބެ
03 July 2017
ކަރަންޓާއި ފެނުގެ ޚިދުމަތަކީ ރައްޔިތުންނަށް ލިބެންޖެހޭ އަސާސީ ޚިދުމަތެއް. އެޚިދުމަތްތައް ހެޔޮ އަގުގަ ރައްޔިތުންނަށް ލިބެންޖެހޭ. އެ ޚިދުމަތްތައް ދޭ ތަންތަން ހިންގަން ޖެހެނީ ދިރާގު ހިންގާހެން ބޮޑު ފައިދާ ހޯދާކަށް ނޫން.
މާލިކު
04 July 2017
މޫސަބޭ ވޭސްޓަށް ފޮނުވާލާ އެއްޗެއް ބޭނުންކޮށްގެންތޯ އިންޖީނުތައް ހިންގަނީ؟
ޒެޑް
03 July 2017
ފިއުލް ސަރޗާޖް ނަގަން ހަމަޖެހިފައިވާ ވަރަށްވުރެ ތެލުގެ އަގު ދަށަށް ދިއުމުން ފިއުލް ސަރޗާޖްގެ ގޮތުގަ ކުރިން ބިލުތަކުގަ ހިމެނުނުބައި އުނިވީ. ވީ ގޮތަކީ މިއީ. ދެން ކޯއްޗެއް ކުޑަކުރި ޥާހަކައަކާއި ކޯއްޗެއް ރައްޔިތުންނަށް ދޫކުރި ވާހަކައެއްބާ ތޯރިގް އެކިޔަނީ. ތެލުގެ އަގު ބޮޑުވާ ކޮންމެ ފަހަރަކު ނިއުސް ކޮންފަރެންސް ބާއްވާފަ ކަރަންޓްފީ ބޮޑުވެއްޖެޔޭ، ނުވަތަ ބޮޑުކޮއްފީމޭ ބުނޭބާ.
ކުނޑިބެ
03 July 2017
ތިޔަ ތަސްބީހައެއް ދުވާލަކު 5 ފަހަރު ކިޔަކިޔަ ތިބޭ. ރައްޔިތުންނަށް ކަހެރުވަޔެކޭވެސް ހިޔެއް ނުވޭ.
ނެތީމު
03 July 2017
ފިއުލް ސާޗާޖު އުނިކުރުމުން ކަރަންޓުގެ އަގު 10-15 ޕަސެންޓް ހެޔޮވާނެ ކަމަށް މިނިސްޓަރު ވިދާޅުވެއްޖެނަމަ އެއީ ބުއްދި އަށް ގަބޫލުކުރެވޭނެ ކަމެކެވެ. އެމްޑީޕީގެ ވެރިކަމުގައި އެމެންނަށް މިފެންވަރުގައި ކަންކަން ކުރަން ނޭގުން އެއީ އެމެންގެ ގަމާރު ކަމުން އެމެންނަަށް ނޭގުނީ އޭ މަމެން ބުނަން ނެތީމު ދޯ.
ނެޝަނަލިސްޓް
03 July 2017
މިނިސްޓރ ހީކުރައްވަނީ ރައްޔިތުންނަކީ ގަމާރުން ކަމަށްހެން ހީވަނީ! އެންމެނަށްވެސް އެގޭ ތެލުގެ އަގަށް އަންނަ ބަދަލާ ގުޅިގެން އޮޓޮމެޓިކުން ކަރަންޓް ބިލަށް ބަދަލު އަންނަކަން! ތެލާށް އިމްޕޯޓް ޑިއުޓީ ނުނަގާ ނަމަ އަދި މިއަށްވުރެ މާ އަގުހެޔޮވާނެ!
ޤުއްޓޭ
03 July 2017
ހާދަހާ ހިސާބު ޖަހަން ފުންނާބު އުސް ބޭފުޅުން ކޮލެކޭދޯ މި ތިއްބެވީ. މަމެން ހަމަ ހައިރާންވެ އަންތަރީސްވެއްޖެ.
މީމުޓަވިޔަނި
03 July 2017
ރައްޔިތުންގެ އިތުބާރު ކިހިނެތް ހޯދާނީ ބޮޑާ ކޮރަޕްޓް އެމްޑީން ނާއިއެކު. ގޭސް ކުންފުނިންވެސް ހަމަ ހުސް ގޭސް އަނބުރަނީ. ދުވަހެއް އަންނާނެ ކަން ހަނދާން ކުރާ މީހެއް ނެތް.
ގާބޭ
03 July 2017
ކަރަންޓު ހިލޭ ކުރިޔަސް ކާޑު ހިލޭ ކުރިޔަސް ކުންފުނި ތަކުގެ އެމްޑީން ލައްވާ އަނބުރާގޭސް ތަކުގެ ސަބަބުން ވޯޓަށް ނުކުންނަ ރައްޔިތުން ވޯޓުދޭނީ އިދިކޮޅު ކެންޑިޑޭޓަށް. ޥ ޔަގީން.
ހަމަހޭ
02 July 2017
ކަރަންޓް އަގުހެޔޮކުރަނީޔޭ ކިޔާފަ އަދިވެސް އަނދުން އެޅުވޭތޯބަލަނީ. މުޅިދުނިޔޭގަ ތެޔޮ އިންތިހާޔައް އަގުހެޔޮވެގެންދިޔައިރުވެސް ދިވެހިރާއްޖޭގަ ތެޔޮލިޓަރެއް 8 ރުފިޔާއައްވުރެ ހެޔޮނުކޮއްފަ، ޔުނިޓަކައްނަގާ ބޮޑުއަގުގެ އިތުރުން މިޔޮއްހުރިހާ ދުވަހުދިޔައީ ފިއުލްސަރޗާޖްގެ ނަމުގައި ރައިއްޔަތުން ދަމަމުން. އެސްޓީއޯއިން ސްޓެލްކޯއައް ތެޔޮލިބޭވަރު ބޮޑުވީމައޭކިޔާފަ. ދެންމިހާރު ތެޔޮލިޓަރެއް 7.94 އައް ބަދަލުކޮއްފަ މިކިޔަނީ ކަރަންޓްބިލް އަގުހެޔޮކުރިއްޔޭ. ހަމައެކަނި އަންނާނެބަދަލަކީ ފިއުލްސަރޗާޖްގެ ނަމުގަ ޔުނިޓަކައްޖެހޭވަރައްވުރެ އުތުރައް ނަގަމުންދިޔަބައި ކެނޑުން. މިވެރިކަމުގައި ކަރަންޓް ޔުނިޓްއަގުބޮޑުކުރިގޮތައް ހަމަ އެއަގުގައޮތީ. 2018 ކީއްކުރަން 3000 ހަމަޔައްވެސް ތިހިރީ ހޮވިފަ.