މާދަމާ ފާހަގަކުރާ މި އަހަރުގެ މިނިވަން ދުވަހުގެ މުނާސަބާތުގައި އެމްއެންޑީއެފުން ބާއްވާ ޝަރަފުގެ ހިނގާލުން މި އަހަރު ވެސް ހުޅުމާލޭގައި ބާއްވާ ގޮތަށް ހަމަޖައްސައިފި އެވެ.
އެމްއެންޑީއެފުން ބުނިގޮތުގައި ޝަރަފުގެ ހިނގާލުން އޮންނާނީ އަންނަ ހުކުރު ދުވަހު ހަވީރު ހުޅުމާލޭގަ އެވެ. މިދިޔަ އަހަރުގެ ރޫޓްމާޗް ވެސް އޮތީ ހުޅުމާލޭގަ އެވެ.
ޝަރަފުގެ ހިނގާލުން ކުރިއަށް ގެންދާނީ ހުޅުމާލޭގެ ފިތުރޯނުމަގު އެމްޕީއެލް ސަރަހައްދުން، އަސުރުމާ ހިނގުމުން، ނިރޮޅުމަގުން، ފިނިފެންމާ ހިނގުމުން، ފިތުރޯނުމަގު އެމްޕީއެލް ސަރަހައްދަށް ކަމަށް އެމްއެންޑިއެފުން ބުންޏެވެ.
އެހެން ފަހަރު ތަކެކޭ އެއްފަދައިން މި ފަހަރުގެ ހިނގާލުމުގައި ވެސް ލަޝްކަރު ތިން ސަރަހައްދަކަށް ހުއްޓި، އެމްއެންޑީއެފްގެ ބޭންޑުން އެކި ރާގުތައް ކުޅުމަށް ވަނީ ހަމަޖެހިފަ އެވެ.
މި ހިނގާލުމުގައި ފުރަތަމަ ހުއްޓޭނީ އަސުރުމާހިނގުމާއި ބޯގަންވިލާ މަގު ގުޅޭ ކަންމައްޗަށެވެ. ދެވަނަ އަށް ހުއްޓުމަށް ހަމަޖެހިފައިވަނީ ނިރޮޅުމަގާއި އަސުރުމާ ހިނގުން ގުޅޭ ކަންމަޗަށެވެ. އެއަށް ފަަހު، އެންމެ ފަހުން ލަޝްކަރު ހުއްޓޭނީ ފިނިފެންމާހިނގުން، ހުޅުމާލޭ ސެންޓްރަލް ޕާރކް ސަރަހައްދުގައި ކަމަށް އެމްއެންޑީއެފުން ބުންޏެވެ.