މަސްތުވާތަކެތީގެ މައްސަލައެއް ސާބިތުވެ، 15 އަހަރަށް ޖަލަށް ލާން ކްރިމިނަލް ކޯޓުން މީހެއްގެ މައްޗަށް ކުރި ބޮޑު ހުކުމެއް، ޕްރޮސެކިއުޓާ ޖެނެރަލް (ޕީޖީ) އިން އެދިގެން ހައި ކޯޓުން ބާތިލްކޮށްފި އެވެ.
ޑައިމޯފިނުން މުއާމަލާތް ކުރުމުގެ ކުށް ސާބިތުވެ ކްރިމިނަލް ކޯޓުން މީގެ ތިން އަހަރު ކުރިން 2014 ގައި ޖަލު ހުކުމެއް އިއްވީ އަބްދުލްފައްތާހު ހުސެއިން، ރ. ރަސްމާދޫ ޒަމާނީކުލަ، ގެ މައްޗަށެވެ. އެ ހުކުމާ ގުޅިގެން އެ މައްސަލަ ހައި ކޯޓުގައި އިސްތިއުނާފް ކުރީ ވެސް ޕީޖީންނެވެ.
މިދިޔަ ބުރާސްފަތި ދުވަހު ދަށު ކޯޓުގެ ހުކުމް ބާތިލްކޮށް، ހައި ކޯޓުން ކުރި ހުކުމުގައި ބުނީ ފައްތާހުގެ މައްޗަށް އަލުން ދައުވާކޮށް، ޕީޖީގެ ފަރާތުން އިހްތިސާސް ލިބޭ ކޯޓަކަށް ހުށަހަޅައިފި ނަމަ، އެ މައްސަލައެއް ބެލޭނެ ކަމަށެވެ. ޕީޖީން އެ ހުކުމް ބާތިލްކޮށްދޭން ހައި ކޯޓުގައި އެދުނީ އެ މައްސަލާގައި ޕީޖީން އަމަލުކޮށްފައި ވަނީ އެފަދަ އެހެން މައްސަލަތަކުގައި އަމަލުކުރާ ގޮތާ ހިލާފަށް ކަމަށް ބުނެ އެވެ.
ޕީޖީން ހައި ކޯޓުގައި ފާހަގަކުރި ގޮތުގައި އެތަނުން އަމަލު ކުރަމުން އަންނަ އުސޫލަކީ މަސްތުވާތަކެއްޗަށް ދެވިހިފާފައިވާ މީހެއް ކަމަށް ނުބެލެވޭ ނަމަ އެމީހެއްގެ މައްޗަށް މަސްތުވާއެއްޗެއް މުއާމަލާތް ކުރުމުގެ ކުށުގެ ދައުވާ އުފުލުމެވެ. އެކަމަކު މައްސަލައެއްގައި ފެނުނު މަސްތުވާތަކެއްޗަށް ދައުވާ ލިބޭ މީހާ ޒިންމާ ނެގުމުގެ އިތުރުން އޭނާ އަކީ މަސްތުވާތަކެތި ބޭނުންކުރާ މީހެއް ކަމަށް ޝަރީއަތުގައި އިއުތިރާފުވެއްޖެ ނަމަ، މަސްތުވާތަކެއްޗާ ބެހޭ ގާނޫނުގެ ދަށުން އެ ދައުވާއެއް އަނބުރާ ގެންދެ އެވެ.
އެފަދަ ހާލަތެއްގައި ދެން ކަންތައް ކުރަނީ، ޕީޖީން ބުނި ގޮތުގައި، ދައުވާ ބަދަލުކޮށް މަސްތުވާތަކެތި ބޭނުން ކުރުމުގެ ކުށުގެ ދައުވާ ޑްރަގް ކޯޓުގައި އުފުލުމެވެ.
ޕީޖީން ހައި ކޯޓުގައި އެއްބަސްވީ ފައްތާހު ކުށަށް އިއުތިރާފްވި ނަމަވެސް، އެ އުސޫލާ އެއްގޮތަށް ޕީޖީ އޮފީހުން އަމަލުކޮށްފައި ނުވާ ކަމަށެވެ. ފައްތާހުގެ މައްސަލާގައި ޕީޖީން ކަންތައް ކުރީ މި ބާވަތުގެ އެހެން މައްސަލަތަކުގައި އަމަލުކުރަން ކަނޑައެޅި އިސްތިގުރާރުވެފައިވާ އުސޫލުތަކާ ހިލާފަށް ކަން ހައި ކޯޓުން ފާހަގަކުރި އެވެ.
ފައްތާހު ޖަލަށް ލާން ދަށު ކޯޓުން ހުކުމް ކުރީ މާޗު 19، 2014 ގައި ބޮޑުތަކުރުފާނު މަގު ޕެޓްރޯލް ޝެޑް ކައިރީގައި އަޅާފައި އޮތް ލޯންޗެއްގައި އޭނާ ހުއްޓާ ފެނިގެން ބެލި އިރު އޭނާގެ ފައި ކައިރިން މަސްތުވާތަކެތި ފެނުނު މައްސަލައެއްގަ އެވެ.
ޝަރީއަތުގެ މަޖިލީހުގައި އޭނާ ވަނީ މަސްތުވާތަކެތި ބޭނުން ކުރާ ކަމަށް އެއްބަސްވެފަ އެވެ. އެހެންވެ، ފައްތާހު ޖަލަށްލުމުގެ އިތުރުން 25،000ރ. އިން ޖޫރިމަނާ ވެސް ކުރި އެވެ.
