ކްލިކް ކޮމްޕިއުޓާސްގެ އާ ޝޯރޫމެއް މަޖީދީ މަގުގައި ހުޅުވައި، އެތަނުގެ ވިޔަފާރި ފުޅާކޮށްފި އެވެ.
އާ ޝޯރޫމް ހުޅުއްވައިދެއްވީ ކްލިކް ކޮމްޕިއުޓާސްގެ ސީއީއޯ މުހައްމަދު ޒާހިރުގެ އަނބިކަނބަލުން، ނާދިޔާ މުހައްމަދެވެ.
އެތަން ހުޅުވީ ކުރިން ވެސް މަޖީދީ މަގުގައި ކްލިކް ކޮމްޕިއުޓާސްގެ ފިހާރަ ހިންގަމުން ދިޔަ މ. ޑައިމަންޑް ވެލީގަ އެވެ. އެކަމަކު ސަންފްރަންޓް ލިވިން ފަރުނީޗާ ސެންޓަރާ ޖެހިގެން ހުންނަ އެ ފިހާރަ އަލުން ހުޅުވީ ކުރިއަށް ވުރެ ބޮޑުކޮށް، އިތުރު ފްލޯއަކާ އެކުގަ އެވެ.
ކްލިކް ކޮމްޕިއުޓާސްގެ ޖެނަރަލް މެނޭޖަރު ރިފާޝާ ފާއިޒް ވިދާޅުވީ އާ ޝޯރޫމް ހުޅުވުމާ ގުޅިގެން އެތަނުން ގަންނަ ކޮންމެ ޕްރޮޑަކްޓަކުން ވަކި ވަރަކަށް ޑިސްކައުންޓް ލިބޭނެ ކަމަށެވެ. އަދި ގަަންނަ ކޮންމެ ޕްރޮޑަކްޓަކާ އެކު ހަދިޔާއެއް ދޭން ވެސް ހަމަޖެހިފައިވާ ކަމަށް އޭނާ ވިދާޅުވި އެވެ.
"މިއީ އަޅުގަނޑުމެން ވަރަށް ދުވަސް ވަންދެން ދެކެމުން ދިޔަ ހުވަފެނެއް. މިތަނާ އެކު، އަޅުގަނޑުމެންގެ ވިޔަފާރި އިތުރަށް ފުޅާވެ، ހިދުމަތްތައް އިތުރަށް ރަނގަޅުވެގެން ދާނެ،" ރިފާޝާ ވިދާޅުވި އެވެ.
އޭނާ ވިދާޅުވީ މި މަސް ނިމުމުގެ ކުރިން ކްލިކް ކޮމްޕިއުޓާސް އިން ވަރަށް ހާއްސަ އާ ޕްރޮޑަކްޓެއް ތައާރަފް ކުރާނެ ކަމަށެވެ. ނަމަވެސް އެ ޕްރޮޑަކްޓާ ބެހޭ ގޮތުން މިވަގުތު އެއްވެސް މައުލޫމާތެއް ހާމަނުކުރެއްވި އެވެ.
ރާއްޖޭގައި އެންމެ ފުޅާކޮށް ކޮމްޕިއުޓަރު ވިއްކަމުން އަންނަ އެއް ކުންފުނި ކަމަށްވާ ކްލިކް ކޮމިއުޓާސް އިން އީދު މިސްކިތް ކައިރީގައި ވެސް ފިހާރައެއް ހިންގަ އެވެ.
