ގާނޫނީ ވަކީލުންތަކެއް ނޫސްވެރިންގެ ބައްދަލުވުމުގައި ބައިވެރިވެވަޑައިގަންނަވަނީ. - ފޮޓޯ: މިހާރު
26 އޮކްޓޯބަރ 2017 - 10:11
3 comments
ޝަރުއީ ދާއިރާއާ މެދު ކަންބޮޑުވުން ފާޅުކޮށް، ސުޕްރީމް ކޯޓަށް ޕެޓިޝަން ހުށަހެޅި މައްސަލާގައި ސަސްޕެންޑުކުރި ވަކީލުންގެ ތެެރެއިން އަށް ވަކީލެއްގެ ސަސްޕެންޝަން އިއްޔެ އުވާލައިފި އެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ކުރި އިއުލާނެއްގައި ބުނީ މިދިޔަ މަހުގެ 10 އިން ފެށިގެން ރާއްޖޭގެ ކޯޓުތަކުގައި ވަކާލާތު ކުރުން މަނާކޮށްފައިވާ ވަކީލުންގެ ތެރެއިން މި އަށް ވަކީލުންގެ ސަސްޕެންޝަން އުވާލީ އެ މީހުންނާ ގުޅޭ މައްސަލަ ބެލުމަށް ފަހުގައި ކަމަށެވެ. ނަމަވެސް އިތުރު ތަފްސީލެއް ޑީޖޭއޭ އިން ނުދެ އެވެ.
ސަސްޕެންޝަން އުވާލި ވަކީލުންގެ ތެރޭގައި ކުރީގެ ނައިބު ރައީސް އަހުމަދުގެ އަދީބުގެ ވަކީލު މޫސާ ސިރާޖާއި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ވަކީލުންގެ ޓީމުގައި ހިމެނިވަޑައިގަންނަވާ މަސްތޫރު ހުސްނީ އާއި އަހުމަދު އަބްދުﷲ އަފީފް ހިމެނެ އެވެ. ދެން ހިމެނެނީ އަބްދުﷲ ހުސެއިން، ރުޝްދުﷲ އިބްރާހިމް، މުހައްމަދު ފަރީދު، ސަފްއަތު ހަބީބު އަދި ހަސަން ވަހީދެވެ.
ޑީޖޭއޭ އިން އެންމެ ފުރަތަމަ ސަސްޕެންޑު ކުރީ 54 ވަކީލެކެވެ. އޭގެ ތެރެއިން 29 ވަކީލެއްގެ ސަސްޕެންޝަން މީގެ ކުރިން ވަނީ އުވާލައިފަ އެވެ. އެހެންވެ، ކޯޓުތަކުގައި ވަކާލާތު ނުކުރެވޭ ގޮތަށް މިހާރު ސަސްޕެންޝަންގައި ތިބޭނީ 17 ވަކީލެކެވެ.
މީގެތެރެއިން ގިނަ ވަކީލުންނަކީ ސިޔާސީ އެކި ބޭފުޅުންގެ މައްސަލަތަކުގައި ވަކާލާތު ކުރެއްވި، އަދި މިހާރު ވެސް ވަކާލާތު ކުރައްވަމުން ގެންދަވާ ބޭފުޅުންނެވެ. މިއީ ރާއްޖޭގައި މިހާ ގިނަ ވަކީލުންތަކެއް އެއްފަހަރާ ސަސްޕެންޑްކުރި ފުރަތަމަ ފަހަރެވެ.
އެއްފަހަރާ ގިނަ އަދަދެއްގެ ވަކީލުން ސަސްޕެންޑު ކުރުމުން ބައިނަލްއަގްވާމީ ބައެއް ޖަމާއަތްތަކާއި އިދިކޮޅު ޕާޓީތަކުން ވަނީ އެކަމަށް ފާޑު ކިޔައިފަ އެވެ. އެކަމަކު ވެރިކަން ކުރާ ޕީޕީއެމުން އެ ނިންމުމަަށް ކުރީ ތައުރީފެވެ.
ޖުޑިޝަލް އެޑްމިނިސްޓްރޭޝަނުން އެ ވަކީލުން ސަސްޕެންޑްކުރީ ކޯޓުތަކުގެ ނިންމުންތަކާ ޚިލާފް ޣައިރު ގާނޫނީ ލިޔުމެއްގައި ސޮއިކުރުމާއި ފަނޑިޔާރުންނާއި ކޯޓުތަކުގެ މިނިވަންކަމަށް ހުރަސް އެޅޭ ގޮތަށް ސުޕްރީމް ކޯޓު ކައިރިއަށް އެއްވި ކަމަށް ބުނާ މައްސަލައެއް ބަލަމުންދާ ކަމަށް ބުނެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަލީ_
26 October 2017
މައްސަލަ ބަލާ ސާބިތުވީމާ ނޫންތޯ އަދަބު ދެނީ؟ ފުރަތަމަ އަދަބު ދީފައި ދެން މައްސަލަބަލަނީ؟
އަޑަފި
26 October 2017
ޕެޓިޝަންހަދައި ސުޕްރީމް ކޯޓުކައިރިއަށް އެއްވުމާ ގުޅިގެން ވަކީލުން ސަސްޕެންޑް ކުރުމުން، ރިޒްގް ދެއްވަނީ ސުޕްރީމް ކޯޓުން ނޫންކަމަށާ، އިސްލާހީ މަސައްކަތުގައި ކުރިއަށް ދާނެކަމަށް ވިދާޅުވި، ބޭފުޅާގެ ސަސްޕެންޝަން މިވަނީ އުވާލާފައެވެ. އަޑު އިވޭ ގޮތުގައި ސަސްޕެންޝަން އުވާލަނީ، އެކަމަށް މާފަށްއެދި ދެން އެފަދަ ކަމެއް ނުކުރާނެކަމަށް ބަޔާންކޮށް ސިޓީލުމުން، ބަޔާން ނެގުމަށްފަހުގައެވެ. އަޅުގަނޑުގެ ސުވާލަކީ، ވަރަށް ގަޓްހުރެގެން ވާހަކަ ދެއްކެވި މޫސާ ސިރާޖްވެސް ހަމަ މާފަށްއެދި ސިޓީލީތޯއެވެ.
ބޭސް
26 October 2017
ކޯޓް ތަކުގެ މިނިވަންކަމަށާއި ފަޑިޔާރުން (ހާއްސަކޮށް ސްޕްރީމް ކޯޓްގެ) އެޑްމިނިސްޓްރޭޓިވް މަސައްކަތް ދޫކޮށްލައި ކޯޓަށް ހުށަހެޅޭ މައްސަލަތައް ގާނޫނީ އިލްމީ ބުއްދީގެ ހަމަތަކުން ބެލުމަށް ގޮވާލާ ޕެޓީޝަނެއްގައި ސޮއިކުރަން ފެނެއެވެ.