ސްޓާލިން އަނެއްކާ ވެސް ފަހު ވަގުތު ސިޓީ މޮޅުކޮށްދީފި

މެންޗެސްޓާ (ނޮވެމްބަރު 30) - އިނގިރޭސި ޕްރިމިއާ ލީގުގައި ރޭ ފަހު ސިކުންތު ކޮޅުގެ ތެރޭގައި ރަހީމް ސްޓާލިން ޖެހި ގޯލުން 2-1 އިން ސައުތުހެމްޓަން އަތުން މޮޅުވެ މެންޗެސްޓާ ސިޓީ ލީގުގެ އެއް ވަަނައިގައި އަލުން އަށް ޕޮއިންޓުގެ ލީޑު ނަގައިފި އެވެ.

ރޭގެ މެޗަށް ސިޓީ ނުކުތްއިރު އެ ޓީމުގެ ލީޑު އޮތީ ފަސް ޕޮއިންޓަށް ކުޑަވެފަ އެވެ. ރޭ އެ ޓީމު މޮޅުވެ އެއް ވަނައިގައި އޮތީ 14 މެޗުން 40 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ޔުނައިޓެޑަށް 14 މެޗުން 32 ޕޮއިންޓް ލިބިފައިވާއިރު، ތިން ވަނައިގައި އޮތް ޗެލްސީ ވަނީ ރޭ ސްވަންސީ ސިޓީ އަތުން 1-0 އިން ހޯދި މޮޅާ އެކު 14 މެޗުން 29 ޕޮއިންޓް ހަމަކޮށްފަ އެވެ.

ދެ ވަަނަ ހާފް ފެށިތަނުން ކެވިން ޑިބްރޭނާގެ ލަނޑުން ސިޓީން ލީޑުނަގާފައިވަނިކޮށް ސައުތެމްޓަނަށް އެއްވަރުކޮށްދިނީ އޮރިއޯލް ރޮމޭއު އެވެ. މެޗު އެއްވަރުވާން ދަނިކޮށް އިތުރު ވަގުތުގެ ގޮތުގައި ދެއްކި ހަ މިނިޓްގެ ފަހު ސިކުންތު ކޮޅުގެ ތެރޭގައި ޑިބްރޭނާ ދިން ބޯޅަ އަކުން ސިޓީ މޮޅުވި ލަނޑު ޖެހީ ސްޓާލިން އެވެ. މިއީ ސްޓާލިން ފަހު ވަގުތު ލަނޑު ޖަހައިގެން ޖެހިޖެހިގެން ސިޓީ މޮޅުކޮށްދިން ތިން ވަނަ މެޗެވެ.

ގާޑިއޯލާ ބުނީ ސްޓާލިންގެ ފަރާތުން މި ސީޒަނުގައި ފެންނަ ތަފާތަކީ އޭނާ އަމިއްލަ ނަފްސަށް ކުރާ އިތުބާރު ރަނގަޅުވުން ކަމަށެވެ.

"ސްޓާލިން ކުރިން ގަބޫލެއް ނުކުރޭ އޭނަ އަށް ވާނެ ކަމަށް. އެކަމަކު މަޑުމަޑުން އޭނާގެ އިތުބާރު އެބަ ރަނގަޅުވޭ. އެ ތަފާތު މި ފެންނަނީ،" ގާޑިއޯލާ ބުންޏެވެ.

އަމިއްލަ ދަނޑުގައި ސްވަންސީ އަތުން ޗެލްސީ މޮޅުކޮށްދިން ގޯލު ޖެހީ ޖަރުމަނުގެ ޑިފެންޑަރު އެންޓޯނިއޯ ރޫޑިގާ އެވެ. މި މެޗުގައި ރެފްރީގެ ނިންމުންތަކަށް ޝަކުވާ ކުރުމުން ޗެލްސީގެ ކޯޗު އެންޓޯނިއޯ ކޮންޓޭ ވަނީ ބެންޗުން ފޮނުވާލައިފަ އެވެ.

ހަޑްސްފީލްޑް ޓައުން އަތުން 5-0 އިން މޮޅުވެ އާސެނަލް ވަނީ ހަތަރު ވަނަ މަގާމު ދަމަހައްޓައިފަ އެވެ. މެސުޓް އޮޒިލްގެ ފަރާތުން މޮޅު ކުޅުމެއް ފެނުނު މި މެޗުގައި އޭނާގެ އިތުރުން އާސެނަލްގެ ލަނޑުތައް ޖެހީ އަލެކްސަންޑަ ލަކަޒޭ އާއި އަލެކްސިސް ސަންޗޭޒް، ކޮންމެ ކުޅުންތެރިއަކު ލަނޑަކާއި އޮލިވިއޭ ޖިރޫ ދެ ގޯލެވެ.

ރަށުން ބޭރުގައި ސްޓޯކް ސިޓީ އަތުން 3-0 އިން މޮޅުވެ ލިވަޕޫލް އޮތީ ފަސް ވަނައިގަ އެވެ. ލިވަޕޫލަށް ފުރަތަމަ ހާފުގައި ލީޑުނަގައިދިނީ ސަޑިއޯ މާނޭ އެވެ. ދެ ވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުމެ އަނެއް ދެ ގޯލު ޖެހީ ރަނގަޅު ފޯމެއްގައި ހުރި މުހައްމަދު ސަލާހު އެވެ. މި ދެ ލަނޑާ އެކު ސަލާހު ލީގުގެ ލަނޑު ލިސްޓު ކުރީގައި އުޅެނީ 12 ގޯލު ޖަހައިގެންނެެވެ.

އަމިއްލަ ދަނޑުގައި އެވަޓަން ކުޅުނު މެޗުން ވަނީ 4-0 އިން ވެސްޓް ހޭމް ޔުނައިޓެޑް ބަލިކޮށްފަ އެވެ. ވޭން ރޫނީ ހެޓްރިކެއް ހެދިއިރު، އެވަޓަންގެ އަނެއް ގޯލު ޖެހީ އެޝްލީ ވިލިއަމްސް އެވެ. އެވަޓަންއާ ހަވާލުވަން ނިންމާފައިވާ ސޭމް އެލަޑީސް ރޭގެ މެޗު ބަލަން އެވަޓަންގެ ދަނޑު ގުޑިސަން ޕާކަށް ގޮސް ހުއްޓެވެ.

ބޯންމައުތު 2-1 އިން ބަލިކޮށް ބާންލީ ވަނީ ލީގުގެ ހަ ވަަނަ އަށް ޖެހިލައިފަ އެވެ. ރޭގެ މެޗުތަކުގެ ނަތީޖާތަކަށް ފަހު ޓޮޓެންހަމް ވަނީ ހަތް ވަނަ އަށް ވެއްޓިފަ އެވެ.