އައްޑޫ އިކުއެޓޯރިއަލް ކޮންވެންޝަން ސެންޓަރު (އީސީސީ) 100 އެނދުގެ ހޮސްޕިޓަލަށް ބަދަލު ކުރުމުގެ މަޝްރޫއު ވަރަށް ބާރަށް ކުރިއަށްދާ ކަމަށާއި މަސައްކަތް ކުރިއަށް ދަނީ ތާވަލާ ވެސް އެއްގޮތަށް ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވެއްޖެ އެވެ.
ޓީވީއެމަށް ދެއްވި އިންޓަވިއުއެއްގައި މިނިސްޓަރު ވިދާޅުވީ ހޮސްޕިޓަލްގެ ކޮންސްޓްރަކްޝަން މަސައްކަތް އަހަރުގެ ފުރަތަމަ ކުއާޓަރުގައި ނިންމައިލެވޭނެ ކަމަށެވެ. އީސީސީ ހޮސްޕިޓަލަކަށް ބަދަލު ކުރަން ސަރުކާރުން އެލިއާ ކޮންސްޓްރަކްޝަނާ 161.8 މިލިއަން ރުފިޔާ އަށް މަޝްރޫއު ހަވާލު ކުރީ ނޮވެމްބަރު 14، 2016 ގަ އެވެ. އެއީ މަސައްކަތް ފަށާތާ 18 މަސް ދުވަހުގެ ތެރޭގައި ނިންމައި ލަސްވެގެން މެއި 8، 2018 ގައި ހަވާލު ކުރާ ގޮތަށެވެ.
ނާޒިމް ކުރިން ވިދާޅުވެފައިވާ ގޮތުގައި ހޮސްޕިޓަލްގެ މަސައްކަތް އެއްކޮށް ނިންމައި މި އަހަރުގެ ޖުލައި މަހުގެ ތެރޭގައި ރަސްމީކޮށް ހުޅުވައި ހިދުމަތް ދޭން ފަށާނެ އެވެ.
"އަޅުގަނޑު އުއްމީދު ކުރަނީ ތާވަލާ އެއްގޮތަށް މިކަންކަން ގޮސް، މި އަހަރުގެ ތެރޭގައި ޓާޝަރީ ފެންވަރުގެ ހޮސްޕިޓަލެއް އައްޑޫގައި ގާއިމުވެގެން ދާނެ ކަމަށް. މިއީ ވަރަށް ގިނަ ސަރުކާރުތަކަކުން ކުރަން އުޅެ، ނުވެފައި އޮތް ކަމެއް. އެހެން ނަމަވެސް މިއަދު އައްޑޫގެ ރައްޔިތުން ވަރަށް ޝުކުރުވެރިކަމާ އެކު ބަލައި ގަނެ، ފާހަގަ ކުރަނީ މި ހޮސްޕިޓަލްގެ މަސައްކަތް ވަރަށް ބާރަށް ކުރިއަށް ދާކަން،" މިނިސްޓަރު ވިދާޅުވި އެވެ. "އަޅުގަނޑަށް ވަރަށް ކަށަވަރުކަމާ އެކު ދަންނަވަން ކެރިދާނެ މި ހޮސްޕިޓަލްގެ މަސައްކަތް ނިންމައި، އެތަނުގެ ޚިދުމަތް މި އަހަރުގެ ތެރޭގައި، އައްޑު އާއި ދެކުނުގެ ހުރިހާ ރައްޔިތުންނަށް ލިބިގެންދާނެކަން."
އައްޑޫ އާ ހޮސްޕިޓަލަކީ ސައުދީ ފަންޑް ފޮ ޑިވެލޮޕްމަންޓާއި އޯޕެކް ފަންޑް ފޮ އިންޓަނޭޝަނަލް ޑިވެލޮޕްމަންޓް (އޮފިޑް) އިން ދީފައިނާ ލޯނުގެ އެހީގައި ހިންގާ މަޝްރޫއެކެވެ. އަދި މުޅި ޕްރޮޖެކްޓަށް 21 މިލިއަން ޑޮލަރު ހަރަދު ވާނެ ކަމަށް ހެލްތު މިނިސްޓްރީން ބުނެފައިވެ އެވެ.
އެގޮތުން އެ ހޮސްޕިޓަލަށް ބޭނުންވާ އިކްޕްމެންޓާއި މެޝިނަރީތަކާއި ފަރުނީޗަރުތައް ހޯދަން ވެސް މިދިޔަ އަހަރުގެ އޮކްޓޯބަރު މަހުގެ ތެރޭގައި ވަނީ ބީލަމަށް ލައިފަ އެވެ.
ސަރުކާރުން ބުނާ ގޮތުގައި އައްޑޫ އާ ހޮސްޕިޓަލްވެގެން ދާނީ މާލޭން ވެސް ނުލިބޭ ސިއްހީ ގިނަ ހިދުމަތްތަކެއް ލިބޭ ތަނަކަށެވެ.
