އަމީނީމަގުގައި ހަދާފައިވާ މާލޭ ސްކްއާ ފްލެޓްތައް: އެތަނުން ނުވިކި ހުރި ފްލެޓްތައް ވިއްކަން އެޗްޑީސީން ވަނީ ހުޅުވާލާފައި.
15 އެޕްރީލް 2018 - 13:19
8 comments
މާލޭގައި ހަދާފައިވާ ޓާޓާ ފްލެޓް ގަންނަން ކުރިމަތިލާއިރު، ބޭންކު ލޯނަށް ޝަރުތު ހަމަވިކަން އަންގައިދޭ ލިޔުން ހުށަހަޅަން ޖެހޭ އިތުރު ފޯމެޓެއް ހަދައި، ކުރިން ކުރިމަތިލި ފަރާތްތައް ވެސް އެ ފޯމެޓަށް ލިޔުން ހުށަހަޅަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ފުރުސަތު ދީފި އެވެ.
އެ ކުންފުނިން ބުރާސްފަތި ދުވަހު ނެރުނު އިއުލާނެއްގައި ބުނެފައި ވަނީ ކުރީގެ އަރަބިއްޔާ ހުރި ތަނުގައި ހަދާފައިވާ މާލޭ ގްރޭންޑާއި ގާކޮށީގައި ހަދާފައިވާ "މާލޭ ސްކްއާ"ގައި ހަދާ ފައިވާ ފްލެޓް ގަންނަން އެޕްލިކޭޝަނާ އެކު ހުށަހަޅަން ޖެހޭ ލޯނަށް ޝަރުތު ހަމަވިކަމުގެ ލިޔުމުގެ އިތުރު ފޯމެޓެއް ބަލައިގަންނަ ގޮތަށް ހަމަޖައްސާފައިވާ ކަމަށެވެ. އަދި އެ ފޯމެޓްގައިވާ ސިޓީތައް ބަލައިގަންނަން ހަމަޖެހިފައި ވަނީ ބޭންކްތަކާ މަޝްވަރާކުރުމަށް ފަހު ކަމަށް ވެސް އެ އިއުލާނުގައި ބުނެފައިވެ އެވެ.
އެޗްޑީސީން ބުނީ އެ ފޯމެޓަކީ ކުރިން އިއުލާންކުރެވިފައި ނުވާ ފޯމެޓަކަށްވާތީ، އޮންލައިން ޕޯޓަލް މެދުވެރިކޮށް އެ ފޯމެޓްގައިވާ "ލޯން އެލިޖިބިލިޓީ ލެޓާ" ހުށަހަޅާފައިވާ އެޕްލިކޭޝަންތައް ރިޖެކްޓްކޮށްފައިވާ ކަމަށެވެ. ނަމަވެސް އެ ގެނައި އިސްލާހާ އެކު އެ ފަރާތްތަކަށް އަލުން ފްލެޓް ގަތުމަށް ފުރުސަތު ހުޅުވާލާފައިވާ ކަމަށް ވެސް އެ ކުންފުނިން ބުންޏެވެ.
އެ ކުންފުނީގެ އިސް އޮފިޝަލަކު މިއަދު ވިދާޅުވީ އެ ކުންފުނިން ޓާޓާ ފްލެޓް ވިއްކަން މިފަހަރު ހުޅުވާލިއިރު ލޯނަށް ޝަރުތު ހަމަވިކަން އަންގައިދޭ ލިޔުން ހުށަހަޅާނެ ފޯމެޓް ތައްޔާރުކުރީ ބޭންކުތަކާ މަޝްވަރާކުރުމަށް ފަހު ކަމަށެވެ. ނަމަވެސް އެ ކުންފުނިން އިއުލާންކުރި ފަހުން ބޭންކަކުން އެ ފޯމެޓަށް ބަދަލު ގެނެސްފައިވާތީ، އެ ބަދަލާ ގުޅިގެން އަލުން އިއުލާން ކުރަން ޖެހުނީ ކަމަށް ވެސް އޭނާ ވިދާޅުވި އެވެ.
"އެ ފޯމެޓަކީ ހުރިހާ ބޭންކާއެކު މަޝްވަރާއެކު މަޝްވަރާކުރުމަށް ފަހު ހެދި ފޯމެޓެއް. ނަމަވެސް އަޅުގަނޑުމެން ހެދި ފޯމެޓާ ހިލާފު ފޯމެޓަކަށް ސިޓީތައް އަންނަކަން މިތަނުގެ ސޭލްސް ޓީމަށް ފާހަގަކުރެވިގެން އެކަން އަޅުގަނޑުމެންގެ ސަމާލުކަމަށް ގެނައީ،" އެ އޮފިޝަލް ވިދާޅުވި އެވެ.
އޭނާ ވިދާޅުވީ ފްލެޓް ގަންނަން ހުށަހެޅި ފަރާތްތަކުގެ ތެރެއިން ރިޖެކްޓްކޮށްފައި ވަނީ ވަރަށް މަދު ފޯމެއް ކަމަށެވެ. އަދި އެ ފަރާތްތަކަށް މިހާރު ބޭންކުން ދޫކުރާ ލިޔުން ބަލައިގަންނާނެ ކަމަށް ވެސް އެ އޮފިޝަލް ވިދާޅުވި އެވެ.
"އަޅުގަނޑުމެން ބަލައި ނުގަންނަ ފޯމެޓަކަށް ހަދާފައިވާ ލިޔުމަކަށްވާތީ އަޅުގަނޑުމެން ބޭންކުގައި އެދުނީ އެ ފޯމެޓަށް ބަދަލުތަކެއް ގެންނަން. އެ ބަދަލާ އެެއްގޮތަށް އެ ބޭންކުން އެ ލިޔުން މިހާރު ދޫކުރަމުން ދަނީ،" އޭނާ ވިދާޅުވި އެވެ.
އިންޑިޔާގެ ޓާޓާ ކުންފުނިން މާލޭގައި އެޅި ފްލެޓްތަކުގެ ތެރެއިން ވިއްކަން އިއުލާންކުރި 161 ފްލެޓްގެ ތެރެއިން މިހާތަނަށް ނުވިކި ހުރި 47 ފްލެޓް ވިއްކަން އެޗްޑީސީން ހުޅުވާލީ މިދިޔަ އަންގާރަ ދުވަހު އެވެ.
އެ ކުންފުނިން އަލުން ވިއްކަން ހުޅުވާލާފައި ވަނީ ކުރިން އަރަބިއްޔާ ސްކޫލް ހިންގި ބިމުގައި ހުރި 10 ފްލެޓަކާއި ގާކޮށިން 37 ފްލެޓެވެ. އަދި އެ އިން ކޮންމެ ފްލެޓެއް ވިއްކަން ހަމަޖެހިފައި ވަނީ ދެ މިލިއަން ރުފިޔާ އަށް ކަމަށް ވެސް އެޗްޑީސީން ބުނެފައިވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބީއެ
15 April 2018
ކަނޑައެޅިގެން ގަސްދުގައި ވަކި ބަޔަކަށް ބޭންކްތަކުން ނުބައިކޮށް ލޭޓަރ ދިން ކަމަށް ބެލެވެނީ
މާރުކޭޓް
15 April 2018
ހުސްކުރާ ސޭލް އަޅުވާފަ ގެދޮރު ވިއްކުމަކީ ބަލައިގަނެވޭނެ ކަމެއްނޫން. ކުރިޔަށް ދުރާލާ އިޢުލާން ކުރަން ޖެހެނޭ ފްލެޓް ގަންނަން ހުޅުވާލާ ތަރީޚް، އެއީ އެންމެންނަށް ވެސް ތައްޔާރުވުމުގެ ގޮތުން ފުރުސަތުދޭން. މިހާރު އެޗްޑީސީ އިން ވަކި ބަޔަކު ލާރި ހަމަކޮށްފައި ބުނީމަ އިއުލާންކުރަނީވެސް. ދެން އަނެއްކަމަކީ ކުރިން ފޯމްލާ މީހަކަށްނޫން ލިބެންޖެހޭނީ. އޭގޭ ބަދަލު ގަނެވިއްކުން ހުއްޓާލަން ޖެހޭނީ ކުރިން ކަނޑައެޅިފައި އޮންނަ ތާރީހެއްގައި. ދެން މީހުން ގިނައިން ގަންނަށް ކުރިމަތިލައިފިނަމަ ގުރުއަތު ނެގުން ރަނގަޅު. މިހާރު އޮތްގޮތުން ކުރިން ކުރިމަތިލީ މީހެއް ފަހުން ލީ މީހެއް ނޭނގޭ. ކިހިނެތް އެޗް.ޑީ.ސީ އިން ބުނި އެއްޗެއް ނޫނީ ފޯރޓަލްއިން ފެންނަ އެއްޗެއް ޤަބޫލުކުރާނީ މަކަރާ ހީލަތް އިންތިހާއަށް އިތުރު ޒަމާނެއްގައި. މިހާރު އޮތްގޮތުން ފަގީރުންވެސް ހިމެނޭގޮތަށް ނެގި ޓެކްސް ފައިސާއިން ފަގީރުންނަށް ދޭން ކަމަށް ބުނެ އެޅި ފްލެޓް ލިބެނީ މުއްސަންދިންނަށް.
ބޯހިޔާވަހިކަން ޔަޤީން
15 April 2018
މިދެން އަރަތެއްނު. އެއްފަހަރު ބުނާނެ ވިކި ހުސްވެއްޖެއޭ. އަނެއްދުވަހު އަނެއްކާ ހުޅުވާލާނެ 47 ފްލެޓް އެބައިނޭ ކިޔާފަ. ފްލެޓަށް ސިޓީލާފަ މެ** އޮފީހަށް ގޮސް އާދޭސްކުރާހާ ވަގުތެއް އަދި އެކަހަލަ ހަމައެއްލަމައެއް ނެތް ސިކުނޑިއެއްވެސް އަޅުގަނޑަށް ދެއްވާފައެއް ނުވޭ. އުޅޭނެ ތަނެއް ނެތިގެން ބުރިޖު ދަށުގައި ކުނާއަޅައިން ނިދަން ޖެހުނަސް، ތިޔަ ސިޔާސީ މީހުންގެ އަތްދަށުވާން ފްލެޓަށް އާދޭސްކުރާކަށް ނުދާނަންކަން ޔަޤީން.
މުއިއްޒު-ވުން
15 April 2018
ސަހަލު ގޮތަކަށް ހަމަ އެއްމެކަމެއްވެސް އެބަ ކުރެވޭތަ؟
ރައްޔިތު އަހައްމަދު
15 April 2018
އެޗް.ޑީ.ސީ އިން މި 47 ޔުނިޓް އިއުލާންކުރީ އެޕްރިލް 10 ވަނަ ދުވަހު ހެނދުނު. އެޕްރިލް 11 ވަނަދުވަހު ހެނދުނު ނުވިކޭކަމަށް ލިސްޓްކޮށްފައިވަނީ 4 ޔުނިޓް. އަދި އެޕްރިލް 12 (ބުރާސްފަތި) ދުވަހު ބީ.އެމް.އެލް އިން ދީފައިވާ ލިއުންތަކުގެ މައްސަލަ ޖެހި، އެދުވަހުގެ ރޭގަނޑު 9:48 ގައި އެލިއުންތަކުގެ ފޯމެޓް ބަލައިގަންނަން ނިންމާ އިއުލާނުކުރި. ނަމަވެސް، މިއަދު އެޕްރިލް 15 ދުވަހު އެއަށް ވަދެވި ރެޖިސްޓަރ ކުރެވުނީ 6 މީހުނަށް. ރެޖިސްޓަރ ކުރެވެނީ ހަމަ އެކަނި ބާކީ ހުރިކަމަށް ލިސްޓްކޮށްފައިވާ ޔުނިޓް ތަކުގެ އަަދަދަށް. މިސާލަކަށް އެއްވެސް ލިޔުމެއް ނެތް މީހަކު ރެޖިސްޓަރ ކުރިޔަސް ކޮންމެވެސް 1 ޔުނިޓް 24 ގަޑި އިރަށް ބަންދުވީ. މިހެންކަމުން، 30-40 ދެމެދު އަދަދެއްގެ ޔުނިޓުތަކަށް ވީނުވީއެއް ނޭނގެ. އަދި ހަމަ މިއާއެކު ކުރީފަހަރާ ޚިލާފަށް ޕޯޓަލް ރެޖިސްޓްރޭޝަން އަދި އެހެނިހެން އުސޫލުތައް ހިތުހުރި ގޮތަކަށް ބަދަލުކޮށްފައިވޭ. އެެންމެ މަސްލަހަތު ރަނގަޅު އަދި އިންސާފުވެރި ގޮތަކީ އަލުން މި 47 ފްލެޓަށް ކުރިމަތިލުމަށް ހުޅުވާލުން.
ރަށްވެހި މީހާ
15 April 2018
ތީ މިހާރު ވިކިފަ ހުރި ފުލެޓްތަކެއް. އެކަން އެޗްޑީސީ އިން އެބަޖެހޭ ޢާއްމުކުރަން. އެހެންނޫނީ އެތައް ބަޔަކު ބޭންކުތަކަށް ދުވެ އާދޭސްކޮށްގެން ލޯން އެލިޖިބިލިޓީ ލެޓާ ހޯދުމުގަ ވަގުތު ބޭކާރު ކުރާނެ. ޢާއްމުރައްޔިތުންނަށް ހުވަފެންދައްކާފަ ގަނެތެޅުވުން ހުއްޓާލެއްވުން އެދެން.
ކަރަންކާ
15 April 2018
ތިއީ ވަރަށް ބޮޑު ތެދުފުޅެއް، އަޅުގަނޑުވެސް ކޮންމެހަފަރަކުވެސް ބެންކް ލެޓާ ހޯދާތަނުން މިއޮންންނަނީ ބަނަދު ކޮށްފަ، މިއީ ވަރަށް ދެރަކަމެއް.
ފްލެޓް ނުލިބުނު މީހެއް
15 April 2018
ވަރަށް ދެރަކޮށް މި ބުރު ދިޔައީ. ކުރިން ފަހަރު ބޭންކް ލެޓަރ ލިބުން މީހުން އަވަހަށް ފްލެޓަށް އެދެވުނު. ނަމަވެސް އަލުން މިފަހަރު ބޭންކް ލެޓަރ ހޯދައިގެން ހުށަހަޅަން ބެލިއިރު ހުރިހާ ފްލެޓެއް ހުރި ވިކިފައި. އަދި މި ފަހަރުގެ ބީ.އެމް.އެލް ލެޓަރ ހުށަހެޅީމަ ރިޖެކްޓް ވީމަ އަސްލު ރަނގަޅު ގޮތަކީ އަލުން މި 47 ފްލެޓަށް ކުރިމަތިލުމަށް ހުޅުވާލުން.