ރާއްޖޭގައި ވިމެންސް ސެންޓަރެއް ހުޅުވައިފި

އަންހެނުންގެ އެކި މައްސަލަތަކަށް އެހީ އާއި ފަރުވާ ދޭ ސެންޓަރެއް އަމިއްލަ ފަރާތަކުން ރާއްޖޭގައި ފުރަތަމަ ފަހަރަށް ހުޅުވައިފި އެވެ.

ޔޫލިއާ ޕްރައިވެޓް ލިމިޓެޑުން ހުޅުވި މި ސެންޓަރަކީ ނަފްސާނީ، އިޖްތިމާއީ އަދި އިގްތިސާދީ ގޮތުންނާއި ޖިސްމާނީ ގޮތުން އަންހެނުން ދުޅަހެޔޮ ބަޔަކަށް ހެދުމަށްޓަކައި ތަފާތު ގިނަ ހިދުމަތްތަކަކާ އެކު ހުޅުވި ސެންޓަރެކެވެ.

މި ދާއިރާތަކުގައި މިހާރު ވެސް ހަރަކާތްތެރިވެ ވަޑައިގަންނަވާ ހައްވާ ލީޝާ އާއި، ޒުނީނާ ހަބީބާއި އާމިނަތު އާސިފާ ހިންގަވާ ޔޫލިއާ ކުންފުނީގެ މި ސެންޓަރާ ބެހޭ ގޮތުން ލީޝާ ވިދާޅުވީ އެފަދަ ތަނެއް ހުޅުވުމުގެ ޚިޔާލު އައީ އަންހެނުންނަކީ ބާރުވެރި ބަޔަކަށް ހެދުމަށްޓަކައި މުޖްތަމައުގައި ހުރި ހުރަސްތައް ނައްތާލުމަށް ޓަކައި ކަމަށެވެ.

"ހަގީގަތުގައި އަޅުގަނޑުމެންގެ މުޖްތަމައުގައި އެބަހުރި އަންހެނުންނަށް ގިނަ ފުރުސަތުތަކެއް. އެކަމަކު އެ ފުރުސަތުގެ ބޭނުން ހިފުމަށްޓަކައި ބައިވަރު ހުރަސްތަކެއް އެބަހުރި. ނުވަތަ ލެކްވާ ކަންތައްތަކެއް އެބަހުރި. އެހެންވެ އެ ހުރަސްތައް ނައްތާލުމަކީ އަޅުގަނޑުމެންގެ އެންމެ ބޮޑު އެއް ބޭނުން،" ލީޝާ ވިދާޅުވި އެވެ.

ޔޫލިއާ ކުންފުނީގެ ތިން ބައިވެރިންގެ މަންމަ ވިމެން ސެންޓަރު ހުޅުވައިދެނީ

މިދިޔަ ހަފުތާގެ ހޮނިހިރުދުވަހު ހުޅުވި މި ސެންޓަރުގެ ޚިދުމަތްތައް މައިގަނޑު ގޮތެއްގައި ބަހާލައިފައި ވަނީ ހަތަރު ދާއިރާއަކަށެވެ. އެއީ ފިޓްނަސް އާއި، ޗައިލްޑް ކެއާ، މެންޓަލް ހެލްތު، ކައުންސިލިން އަދި ޓްރެއިނިން އެވެ.

އުމުރުން އެއް އަހަރާއި ހަތް އަހަރާ ދެމެދުގެ ކުދިންނަށް ޗައިލްޑް ކެއާގެ ޚިދުމަތް ހެނދުނު 7:30 ފެށިގެން ރޭގަނޑު 10 އަކަށް ވިމެން ދޭއިރު، ޚިދުމަތް ހޯދާ ގަޑިތަކަށް ޚާއްސަކޮށްގެން ވަކި ޕެކޭޖްތަކެއް ހެދިފައި ހުރެއެވެ. އަދި އެހެނިހެން ޑޭކެއާ ސެންޓަރުތަކާ ޚިލާފަށް މި ސެންޓަރުގައި ކުދިންނަށް ދޭ ޗައިލްޑް ކެއާގެ ޚިދުމަތަކީ ވަކި ކަރިކިއުލަމެއްގެ ދަށުން، ޚާއްސަ ކޮލިފައިޑް ޓީޗަރުންނާއި، ވަރަށް ބޮޑަށް ސްކްރީން ކުރެވިގެން ހޮވޭ ސްޓާފުންގެ ބެލުމުގެ ދަށުން ދެވޭ ޚިދުމަތެއް ކަމަށް އެތަނުން ބުނެ އެވެ.

މީގެއިތުރުން ސެންޓަރުގައި ހުޅުވާފައިވާ އަންހެނުންނަށް ޚާއްސަ ފިޓްނަސް ސްޓޫޑިއޯ އަށް ދާ ފަރާތްތަކަށް ވެސް ކްލާސްތައް އޮންނަ ގަޑީގައި ދަރިފުޅު ބެލުމުގެ އިންތިޒާމް ޗައިލްޑް ކެއާ އިން ވަނީ ހަމަޖައްސައިފަ އެވެ.

ވިމެން ސެންޓަރުގައި ކައުންސިލިންގެ ޚިދުމަތް ދޭ ކޮޓަރި ފޮޓޯ-- ހުސެއިން ވަހީދު/މިހާރު

މީގެ އިތުރުން މާބަނޑު މީހުންނަށް ޚާއްސަކޮށްގެން، ޕްރީނޭޓަލް ކްލާސްތަކާއި، ވިހެއުމާ ގުޅޭގޮތުން މައުލޫމާތު ދިނުމާއި، ނިއުޓްރިޝަން އާ ބެހޭ ސެޝަންތަކާއި ވިހެއުމަށްފަހު ދިމާވާ ކަންތައްތަކަށް ވެސް ޚާއްސަ ކްލާސްތަކެއް ވަނީ ރާވައިފަ އެވެ.

މި ޚިދުމަތްތަކާ އެކު، ރާއްޖޭގައި ފުރަތަމަ ފަހަރަށް ސަޕޯޓް ގްރޫޕް ސާވިސްގެ ޚިދުމަތް ދޭން ވެސް މި ސެންޓަރުން ވަނީ ހަމަޖައްސައިފަ އެވެ. މިގޮތުން ޑިޕްރެޝަން އާއި، ޕޭރެންޓިން އާއި ގެވެށި އަނިޔާ ފަދަ މުހިންމު ދާއިރާތަކާ ބެހޭގޮތުން ސެޝަންތައް ބާއްވަން ވަނީ ނިންމައިފަ އެވެ.