މައުމޫންގެ ހެކިންގެ ލިސްޓް ޕްރިންޓް ކޮށްފައި އޮތްގޮތުން އެ ލިޔުންތައް ކޯޓުން އަނބުރާ ފޮނުވާލައިފި

މައުމޫން ފުލުހުންގެ ލޯންޗްގައި: އެމަނިކުފާނުގެ މައްޗަށް ދައުލަތުން ވަނީ ޓެރަރިޒަމްގެ ދައުވާ އުފުލާފައި --ފޮޓޯ/މިހާރު

މުއިއްޒު އިބްރާހިމް، މިހާރު

04 ޖޫން 2018 - 00:01

ކުރީގެ ރައީސް މައުމޫންގެ އަބްދުލްގައްޔޫމްގެ މައްޗަށް ކުރާ ޓެރަރިޒަމްގެ ދައުވާގެ ދިފާއީ ހެކީގެ ގޮތުގައި ހުށަހެޅި މީހުންނާއި ލިޔުންތަކުގެ ލިސްޓް ޕްރިންޓް ކޮށްފައި ހުރިގޮތުން އެ ލިޔުންތައް ކްރިމިނަލް ކޯޓުން އަނބުރާ ފޮނުވާލާފައިވާ ކަމަށް އެމަނިކުފާނުގެ ވަކީލުން މިރޭ ވިދާޅުވެއްޖެ އެވެ.

މައުމޫންގެ މައްޗަށް ކުރާ ޓެރަރިޒަމްގެ ދައުވާއާ ގުޅިގެން އެމަނިކުފާނުގެ ފަރާތުން ވަނީ ދިފާއީ ހެކިންގެ ގޮތުގައި 100 އަށް ވުރެ ގިނަ މީހުންނާއި 28 އަށް ވުރެ ގިނަ ލިޔުން މިއަދު ކޯޓަށް ހުށަހަޅައިފަ އެވެ. މައުމޫންގެ ވަކީލް މައުމޫން ހަމީދު މިރޭ ކުރެއްވި ޓްވީޓެއްގައިވަނީ ދިފާއީ ހެކިންނާއި ލިޔުންތަކުގެ ލިސްޓް ކޯޓުން އަނބުރާ ފޮނުވާލީ އެ ލިޔުން ޕްރިންޓް ކުރިއިރު، ބޯޑަރު ލައިންތައް ޕްރިންޓް ކުރެވިފައި ނެތުމުން ކަމަށެވެ.

Criminal Ct has sent back our witnesses & exhibits lists for, well, colouring outside the lines.

Apparently, when we printed our lists, borders were not drawn on the text boxes & so the form became an unauthorised version.

I guess that's one way for @PGO_MV to dodge a bullet. https://t.co/OOcNnVR1UJ
— Maumoon Hameed (@maanhameed) June 3, 2018

ވަކީލް މައުމޫންގެ ޓްވީޓް

ދިފާއީ ހެކިތަކުގެ އިތުރުން ޝަރީއަތުގެ ކުރީގެ ހުށަހެޅުންތަކުގެ ގޮތުގައި މައުމޫންގެ ފަރާތުން 29 ހުށަހެޅުމެއް ވެސް މިއަދު ހުށަހެޅި އެވެ. އެކަމަކު އެ ހުށަހެޅުންތައް ކޯޓުން އަނބުރާ ފޮނުުވާލާފައެއް ނުވެ އެވެ.

ޓެރަރިޒަމްގެ ދައުވާ ސާބިތުވެއްޖެ ނަމަ މައުމޫންގެ މައްޗަށް 17 އަހަރުގެ ޖަލު ހުކުމެއް އަންނާނެ އެވެ.

ޓެރަރިޒަމްގެ ދައުވާގެ އިތުރުން މައުމޫންގެ ފޯނު ދޭން އިންކާރު ކުރެއްވި ކަމަށް ބުނެ އަދުލު އިންސާފު ގާއިމްކުރަން ހުރަސް އެޅުމުގެ ދައުވާއެއް ވެސް އެމަނިކުފާނުގެ މައްޗަށް ދައުލަތުން ކުރެ އެވެ.