ވަޒީފާގެ މައްސަލަތައް އަނބުރާ ގެންދިއުމަށް ފަހު އަލުން ހުށަހެޅޭނީ އެއް ފަހަރަށް ކަމަށް ހަމަޖައްސައިފި

ދައުލަތުގެ އެންމެ ގިނަ އޮފީސްތައް ހުންނަ ވެލާނާގޭ ބިލްޑިންގަށް ބަޔަކު ވަންނަނީ: ވަޒީފާގެ މައްސަލަތައް އަނބުރާ ގެންދިއުމަށް ފަހު އަލުން ހުށަހެޅޭނީ އެންމެ ފަހަރަކު ކަމަށް ވަނީ ހަމަޖައްސާފައި --ފޮޓޯ/މިހާރު

މުއިއްޒު އިބްރާހިމް، މިހާރު

10 ސެޕްޓެމްބަރ 2018 - 15:03

ވަޒީފާއާ ބެހޭ ޓްރައިބިއުނަލަށް ހުށަހަޅާ މައްސަލަތަކުގެ ތެރެއިން އަނބުރާ ގެންދާ މައްސަލަތަކާއި ބާތިލްކުރާ މައްސަލަތައް އަލުން ހުށަހެޅޭނީ އެންމެ ފަހަރަކު ކަމަށް އެ ޓްރައިބިއުނަލުން ހަމަޖައްސައިފި އެވެ.

ވަޒީފާއާ ބެހޭ މައްސަލަތައް ބެލުމަށްޓަކައި، ވަޒީފާއާ ބެހޭ ގާނޫނުގެ ދަށުން އުފައްދާފައިވާ ޓްރައިބިއުނަލްގެ ގަވާއިދު ކުރިން އޮންނަ ގޮތުން އެތަނަށް ހުށަހަޅާ މައްސަލަތަކުގެ ތެެރެއިން އަނބުރާ ގެންދާ މައްސަލަތަކާއި މައްސަލަ ހުށަހަޅާ ފަރާތް ހާޒިރު ނުވެގެން ބާތިލްކުރާ މައްސަލަތައް އަލުން ހުށަހެޅޭނެ ވަކި އަދަދެއް ނޯވެ އެވެ.

އެ ގަވާއިދަށް މިއަދު ގެނައި އިސްލާހުގައި ވަނީ އަނބުރާ ގެންދާ މައްސަލަތަކާއި ބާތިލްކުރާ މައްސަލަތައް އަލުން ހުށަހެޅޭނީ އެއް ފަހަރު ކަމަށެވެ. އަދި އަނބުރާ ގެންދާ މައްސަލަތަކާއި ބާތިލްކުރާ މައްސަލަތައް އަލުން ހުށަހަޅާ ނަމަ 30 ދުވަސް ތެރޭގައި ހުށަހަޅަން ޖެހޭ ގޮތަށް ވެސް އެ އިސްލާހުގައި ވަނީ ހިމަނައިފަ އެވެ.

އެ އިސްލާހުގައިވާ ގޮތުން އެގޮތަށް ހަމަޖެއްސިޔަސް، މައްސަލައިގެ ހާލަތަށް ރިއާޔަތްކޮށް އެފަދަ މައްސަލަތައް އަލުން ހުށަހެޅުމަށް އެއް ފަހަރަށް ވުރެ ގިނަ ފަހަރު ފުރުސަތު ދިނުމުގެ ބާރު ޓްރައިބިއުނަލަށް އޮންނާނެ އެވެ. އަދި ކުރިއެކޭ ވެސް އެއްގޮތަށް، އެފަދަ މައްސަލަތައް އަލުން ހުށަހެޅޭނީ 500ރ. ގެ ފީއެއް ދެއްކުމަށް ފަހު އެވެ.

ވަޒީފާއާ ބެހޭ މައްސަލަތަކުގެ ތެރެއިން ޓްރައިބިއުނަލަށް އިހްތިސާސް ލިބިގެންވާ މައްސަލަތަކަކީ އެ މައްސަލައެއް އުފެދުނު ތާރީޚުން ފެށިގެން ހަ މަސް ތެރޭގައި ހުށަހަޅަންޖެހޭ މައްސަލަތަކެކެވެ. އެކަމަކު އުޖޫރައާ ގުޅޭ މައްސަލަތައް ހުށަހެޅުމުގައި އެ މުއްދަތެއް ނޯވެ އެވެ.