ރައީސް ޔާމީން، އާރަށުގައި ދިރިއުޅުއްވަން ހެދި ގެކޮޅުގެ ފޮޓޯ އާއްމުކޮށްލައިފި

ރައީސް އަބްދުﷲ ޔާމީން، ހަފުތާ ބަންދާއި ޗުއްޓީ ދުވަސްތަކުގައި ދިރިއުޅުއްވަން އާރަށުގައި ހެދި ގެކޮޅުގެ ފޮޓޯ އާއްމުކޮށްލައިފި އެވެ.

ސޯޝަލް މީޑިއާގައި، ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް އާއްމުކުރެއްވި ފޮޓޯ އިން ފެންނަނީ، އާރަށުގައި ޓެރަސްއަކާ އެކު ތިން ބުރި އަށް ހަދާފައިވާ އިމާރާތެކެވެ. އެއީ، ގަދަބާރުން ވެރިކަން ކުރެއްވުމުގެ ނިޔަތުގައި ސިފައިން ލައްވައި ހެއްދެވި ތަނެއް ކަމަށް ތުހުމަތު ކުރައްވައި، އެ ގެކޮޅު މަހްލޫފް ސިފަކުރެއްވީ "ގަނޑުވަރެއް"ގެ ގޮތުގަ އެވެ.

އާރަށުގައި، ރައީސް ޔާމީނަށް ޚާއްސަކޮށް ހެދި ގެކޮޅު.

އާރަށުގައި ހެދި ގެކޮޅުގެ ފޮޓޯ އާއްމުވެ ފާޑުކިއުން އަމާޒުވިއިރު، މީގެކުރިން މި އިމާރާތުގެ ވާހަކައެއް ރަސްމީކޮށް، ރައީސް އޮފީހުން ހާމަކޮށްފައެއް ނުވެ އެވެ.

ރައީސް ޔާމީންގެ އަރިސް ބައެއް ބޭފުޅުން ވިދާޅުވާ ގޮތުގައި ރަސްމީ ބަންދު ދުވަސްތަކާއި ހަފުތާ ބަންދު އެމަނިކުފާނު ގިނައިން ހޭދަކުރައްވަނީ އާރަށުގަ އެވެ. ސަރުކާރުގެ ބައެއް ބޮޑެތި ނިންމުންތަކާ ގުޅޭ ބައްދަލުވުންތައް ވެސް އާރަށުގައި ކުރިއަށް ގެންދަވާ ކަމަށް އެ ބޭފުޅުން ވިދާޅުވި އެވެ.

އާރަށުގައި ހަދާފައިވާ މި އިމާރާތާ ގުޅޭގޮތުން، ރައީސް އޮފީހުގެ ބަހެއް އަދި ނުލިބި އެވެ.

ރައީސް ޔާމީނާއި އެމަނިކުފާނުގެ އާއިލާ މިހާރު ދިރިއުޅުއްވަނީ ހިލާލީގޭގަ އެވެ. ވެރިކަމާ ހަވާލުވެވަޑައިގަތުމަށް ފަހު ކުރިން އެމަނިކުފާނު އުޅުއްވަމުން ގެންދެވީ އަމިއްލަ ގެކޮޅު ދޫވެހީގަ އެވެ. ރައީސަކު ދިރިއުޅުއްވަން އެކަށީގެންވާ މިންވަރަށް އެތަނުގައި ސަލާމަތާއި ރައްކާތެރިކަން ގާއިމްކުރަން، އެތަން މަރާމާތުކުރަން ދައުލަތުގެ ބަޖެޓުން ބޮޑު ހޭދައެއް ވެސް ހިނގި އެވެ.

އޭގަފަހުން، ހިލާލީގެއަށް ބަދަލުވެވަޑައިގަތީ، ބޮޑުތަކުރުފާނުމަގުގައި ހުންނަ ހ.ނޫފަރުގެ އާއި ދޫވެހި ބަދަލުކުރުމުގެ ދުވަސްކޮޅެއް ކުރިންނެވެ.

އާރަށުގައި ރައީސް ޔާމީން ދިރިއުޅުއްވި ގެކޮޅު

ރައީސް ޔާމީންގެ އަމިއްލަ ގެކޮޅުގެ ނިންމުމުގެ މަސައްކަތް ބާރަށް ކުރިއަށް އެބަދެ އެވެ. ބުރިބުރި އަށް ހަދާ އެ އިމާރާތުގެ ފުރަތަމަ ދެ ފަންގިފިލާ ގާތްގަނޑަކަށް މިހާރު ވަނީ ނިމިފަ އެވެ. އަންނަ ހޮނިހިރުދުވަހު އިންތިޚާބީ ރައީސް އިބްރާހިމް މުހައްމަދު ސޯލިހް (އިބޫ) ހުވާކުރައްވާއިރު، ރައީސް ޔާމީން ހިލާލީގެއިން ބަދަލުވެވަޑައިގަންނަވާނެ ކަމަށް ބެލެވެ އެވެ. އެއީ، ހިލާލީގެއަކީ ރައީސާއި ނައިބު ރައީސް ދިރިއުޅުއްވަން ޚާއްސަކޮށްފައިވާ ގެކޮޅަކަށް ވާތީ އެވެ.