ރާއްޖޭގެ މަސްވެރިން މަސްވެރިކަމުގައި: އެން ހިފަން ބައެއް މަސްވެރިން ފީނަނީ ރައްކާތެރިކަމުގެ ފިޔަވަޅުތައް ނާޅާ
07 ޑިސެމްބަރ 2018 - 16:16
23 comments
ފީނައިގެން އެން ހިފަން އުޅެނިކޮށް ހިނގާފައިވާ ހިތާމަވެރި ހާދިސާތައް އިތުރު ވުމުގައި އެތައް ބައެއްގެ އިހުމާލު އޮތް ކަމަށް ރާއްޖޭގެ އެންމެ ތަޖުރިބާކާރު އެއް ޑައިވަރު، ހުސެން ރަޝީދު (ސެންޑީ) މިއަދު ބުނެފި އެވެ.
ޑައިވިން ޑީކޮމްޕްރެޝަން ސިކްނަސް (ޑީކޯ) ގެ މައްސަލަ ކުރިމަތިވުން ރާއްޖޭގައި މިހާރު ދަނީ އާންމުވަމުންނެވެ. ހާއްސަކޮށް ވައި ފުޅީގައި ޑައިވްކުރުމުގެ ތަމްރީނު ނެތި އެން ހިފާށާއި ފާނަ ހިފަން ފީނާ މަސްވެރިންގެ އެތައް ބަޔަކު މަރުވެ، އަނެއް ބަޔަކު ޕެރަލައިޒް ވުން ފަދަ ހާލަތާ ކުރިމަތިލާން ޖެހިފައިވެ އެވެ.
ރޭ ފަތިހު ގދ. ގައި އެން ހިފަން ފޭބި ހަތަރު މީހުންގެ ތެރެއިން ތިން މީހެއްގެ ހާލު ސީރިއަސްވެ އޭގެ ތެރެއިން އެކަކު ވަނީ މަރުވެފަ އެވެ.
އެ މީހުން ވަނީ، އާންމުކޮށް ޑައިވަރުން ވެސް ފީނާ ފުން މިން ކަމަށް ވާ 30 މީޓަރުގެ ބަދަލުގައި 44 މީޓަރު އަޑިއަށް ފީނައި، 35 މިނިޓް ހޭދަކޮށްފައި ކަމަށް، އެމްއެންޑީއެފުން ބުނެ އެވެ. ޑައިވް ކުރާތާ 36 އަހަރަށް ވުރެ ގިނަ ދުވަސްވެފައިވާ ސެންޑީ ބުނީ ރާއްޖޭގައި އެފަދަ ހާދިސާތައް ހިނގަނީ ލައިސެންސް ނެތި ފީނުމުގެ ސަބަބުން ކަމަށެވެ. އެކަން ހިނގުމަކީ ދޯނިތަކުގެ ވެރިންނާއި ފިޝަރީޒް މިނިސްޓްރީން ވެސް ޒިންމާ ނަގަން ޖެހޭ ކަމެއް ކަމަށް އޭނާ ބުންޏެވެ.
"އޮޑިވެރިންނަށް އެކަން އެނގި ތިބެ މީހުން ލައްވައި އެފަދަ ނުރައްކާ ކަންކަން ކުރުމަކީ އިހުމާލެއް. އަދި އެކަންކަން އެނގި އޮތޯރިޓީތަކުން ތިބުމަކީ ވެސް އިހުމާލެއް،" ސެންޑީ ބުންޏެވެ.
ޑައިވިން ކުރާ މީހެއްގެ ހަށިގަނޑު ތެރޭގައި ބޮކިތައް އުފެދޭ ގޮތް ދައްކުވައިދޭ ކުރެހުމެއް
އޭނާ ބުނިގޮތުގައި މިހާރުން މިހާރަށް ވެސް ހޭލުންތެރިކުރުމުގެ ޕްރޮގްރާމްތައް މަސްވެރިންނަށް ހިންގަން ޖެހެ އެވެ.
މިއަދު ޑީކޯވި މީހުން 44 މީޓަރުގައި 35 މިނެޓު ހޭދަކޮށްފައި ވާއިރު ބައިނަލްއަގުވާމީ މިންގަނޑުން ބެލިޔަސް ވައި ފުޅީގައި އެ ފުންމިނުގައި އޮވެވޭނީ ނުވަ މިނެޓުހާ އިރު ކަމަށް ސެންޑީ ބުންޏެވެ.
ރާއްޖޭގެ ގަވައިދުތައް ބުނާ ގޮތުން 30 މީޓަރަށް ވުރެ އަޑިއަށް ފީނުމަކީ މަނާކަމެކެވެ.
"އެކި ފުންމިނުގައި އުޅެވޭނީ އެކި ވަރަށް. އަތުގައި އަޅާފައި އޮންނަ ޑައިވިން ކޮމްޕިއުޓަރުން ދައްކާނެ އޮވެވޭނެ ވަރާއި މައްޗަށް އަރަން ޖެހޭ ވަރު. އެ އުސޫލުތައް ފޮލޯ ނުކުރާތީ ހާދިސާ ހިނގަނީ،" ސެންޑީ ބުންޏެވެ.
"މަގުމަތީ ސައިކަލެއް ދުއްވާއިރު ޓްރެފިކް ލައިޓް ރަތްވެފައި އިންދާ ދުއްވީމަ ވާ ގޮތް މިވަނީ. ޓްރެފިކް ރޫލްސް ނޭންގެންޏާ."
ރައްކާތެރިކަމުގެ ފިޔަވަޅު ނާޅައި، އަދި މާ ފުނަށް ފީނުމުގެ ސަބަބުން ފުއްޕާމޭ ފަޅައިގެން ދިއުން ފަދަ ނުރައްކާތައް ދިމާވެ އެވެ.
ޑީކޯ ވަނީ ކިހިނެއް؟
ވައި ފުޅިއާ އެކު ފުނަށް ފީނާ ނިމުމުން މައްޗަށް އަރަން ޖެހެނީ ވަކި ގޮތަކަށެވެ. އެކި ފުން މިނުގައި އެކި ވަގުތަށް މަޑުކޮށްގެން އޮންނަ ޖެހެ އެވެ. އެގޮތަށް އޮންނަންވާ ގޮތުގެ ތަފްސީލް އެނގޭ އާލާތްތައް ހުރެ އެވެ. އެއީ ޑައިވަރުން ބޭނުންކުރަން ޖެހޭ އެއްޗެކެވެ. ޑީކޯ ވަނީ އެއަށް ނުބަލައި މައްޗަށް އެރުމުން ހަށިގަނޑުގެ ތެރޭގައި އުފެދޭ ބޮކިތަކުން ލޭ ހޮޅިތައް ބެދިގެންނެވެ.
ޑީކޯވާ މަސްވެރިންނަށް ވަގުތުން އޮކްސިޖަންގެ ފަރުވާ ދޭން ޖެހޭއިރު މަސް ދޯނިފަހަރުގައި އެމަޖެންސީ އޮކްސިޖަންއެއް ނުހުރެ އެވެ.
ޑީކޯވާ މީހުންނަށް ފަރުވާ ދޭ ހާއްސަ ޗެމްބަރާ ހަމައަށް ގެންދެވެންދެން އޮކްސިޖަން ދޭން ޖެހެ އެވެ. ޑީކޯވާ މީހުންނަށް ފަރުވާ ދެނީ ޗެމްބަރަށް ލައިގެންނެވެ. އެފަދަ ބައެއް ޗެމްބާތައް ރާއްޖޭގެ ބައެއް ރިސޯޓްތަކުގައި ވަނީ ގާއިމްކޮށްފަ އެވެ.
ޑީކޯވެފައިވާ މީހާ ޗެމްބަރަށް ލުމަށް ފަހު މޫދު އަޑީގެ ޕްރެޝަރަށް އޭގެ ތެރެ ބަދަލުކޮށްލަ އެވެ. ލޭ ހޮޅިތައް ބައްދާފައިވާ ބޮކިތައް، އޭގެ ސަބަބުން، ކުޑަވެ ބޭރުކޮށްލަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ނަން
09 December 2018
ޑއަިވަށް ގޮސްގެން މިހާތަނަށް މައްސަލަ ދިމާވެފަހުރި %90 މީހުންނަކީ ހިކި އެއްޗެހި ބޭނުންކޮށްގެން ތިބެގެން ފީނުމުގެ ސަބަބުން މަރުވެ ނުވަތަ އެފަދަ ހާދިސާތަކާ ދިމާވެފަ ތިބި މީހުން. އިއްޔެ މަރުވި މީހާ ފީނިއިރު ފުޅީގައި ހުރީ 30 މިނިޓުގެ ވައި. 40 މީޓަރު އަޑިން ވައި ހުސްވެގެން ނޭވާ ނުލެވެންފެށީމަ ހާސްވެގެން ޖެހިގެން އޮތް މީހާޔާ އޮޅުލައިގަތީ. އެހިސާބުން ދެމީހުންނަށްވެސް ނޭވާ ނުލެވުނީ. ހިކި އެއްޗެހި ބޭނުންކޮށްގެން ފީނުން އަސްލު ސަބަބަކީ.
ތަންދޮރު
08 December 2018
މި ކަމުގެ ތަމްރީނު ލިބިގެން ތިއްބަސް އަދި ވާކަށް ނެތް. އެކަމެއް އެ އޮއްނަ ގަވާއިދާ އުސޫލުތަކާ ހަމަތަކުގެ މަތިން ކުރީމަ މިކަހަލަ ކޭސްތައް މަދުވާނެ. މިކަމުގައި ވިސްނަންޖެހޭ އަނެއް ކަމަކީ ސަޓިފައިޑް ވެ އިންސުއަރެންސް އޮތަސް ގަވާއިދާ އެއްގޮތަށް ޑައިވް ނުކުރާނަމަ އެއްވެސް އިންސުއަރެންސް އެއް ކަވަރ އެއް ނުކުރާނެކަން. އަމިއްލަ މީހާ ނުނަގާ ޒިއްމާއެއް އެހެންމީހަކު ނުނަގާނެ.
އަލީ ރާޖާ
08 December 2018
ރާއްޖޭގައި ޑްރަގް ވިޔަފާރި ކުރިން އަމާޒު ކޮށްފައި އޮތީ މުއްސަދިންގެ ދަރިންނަށް. މިހާރު މަސްވަރިންނަށް. މަސްވެރިކަން ކުރަން ރަށްރަށް އެކި މީސްމީހުން ގޮސް މަސްވެރިންނަށް ޑްރަގް އެބަ ތަޢާރަފު ކޮށްދޭ. މިކަން މިހެން ހިނގާތާ ކިތަންމެ ޒަމާނެއް ވެއްޖެ. މަސްތުގެ ހާލަތުގައި ޑައިވް ކުރާ މީހުން އެބަތިބި.
އިކޮނޮމިސްޓް
08 December 2018
ކޮންމެ މަސް ދޯންޏެއްގައި ޗެމްބަރެއް ގާއިމުކުރަމާ
ވިސްނާލާ
08 December 2018
މިއީ މަޖާވާހަކަތަކެއް ލިޔެފައިވާ ޚަބަރެއް ނޫން
ސޭޓް
08 December 2018
ލަަަަަަައިސަން ނެތި ޑައިވް ކުރުވާ ދޯނި ތަކުގެ ކައްޕިން 25 އަހަރައް ޖަލައް ހުކުމް ކުރާގޮތައް ހަދާބަލަ ނިކަން، ފަލުވެރިން ލައްވާ މި ފާޑަަަަައް ޑައިވް ކުރާތޯ ބަލަން.
ޙިމާރުލް ވަތަން
08 December 2018
ތީ ހައްލެއްނޫން. އެކަކުވެސް އޭނާ މަރުވާވަރުގެ ކަމެއްކަން އެނގޭނަމަ މަޑެއް ނުކުރާނެ. ޢެންމެ މުހިއްމަި ހޭލުންތްެރިކުރުވުން. ދަސްކޮށްދިނުން. މަސައްކަތުގެ މާޙއުލުގައި ހިފަހައްޓަން ޖެހޭ އަޚުލާޤު ހިފަހައްޓަން ދަސްކޮށްދިނުން.
ގަވާއިދު
07 December 2018
ދިވެހިރާއްޖެގައި ޑައިވް ކުރުމުގެ ގަވާއިދެއް އޮންނަނީ ހަމައެކަނި ފަތުރުވެރިކަމުގެ ދާއިރާގެ ކަންތައްތަކަށް ނުވަތަ ފަތުރުވެރިކަމުގެ މިނިސްޓްރީގައި ރަޖިސްޓްރީ ކުރެވިފައިވާ ޑައިވް ސެންޓަރުތަކައް އެކަނި ބާރު ހިނގާ ގޮތައް. އެހެންކަމުން މުޅި ދިވެހިރާއްޖޭގައި ހިނގާ ޑައިވް ގަވާއިދެއް ނުވަތަ ޑައިވް ކުރެވޭ ފުންމިނެއް އޮންނަ ކަމަށް ބުނުމަކީ ގޯހެއް.
Mazeed Gasim
07 December 2018
ގަވާޢިދުގައި އޮންނަ ގޮތައް އެން ހިފަން ޑައިވް ކުރުމަކީ ކުރަން ވަރަށް އުދަގޫ ކަމެއް ، ވީމާ އެންހިފަން ޑައިވް ކުރުން މަނާ ކުރަންވީ .
ރައްޔިތުން ސަރުކާރު
07 December 2018
މިސަރުކާރުން މިކަން ހައްލުކުރަން އޮޑިވެރިންނާ މަސްވެރިންނާ އެކު އެއްޕުލެޓް ފޯމެއްގަ ވާހަކަ ދައްކާ ތަމްރީނާ ހޭލުންތެރިކުމުގެ ޕްރޮގުރާމްތައް ހިންގުން ވަރައް މުހިއްމު? އަދި އޮކްސިން ޗެމްބާރސްތައް އެކިސަރަހައްދު ތަކުގަ ގާއިމް ކުރުން މުހިއްމު!
ދޮކާދިން
07 December 2018
ކޮންޕުރެޝަން ސިކްނެސް ވާގޮތަކީ އަޑީގައި އޮވެ މައްޗައް އަރަން އުޅުމުން ފެނުގެ ޕޮރެޝަރާ ހެދި ލެޔައް ޑިޒޯލް ވެފަ ހުންނަ ނައިޓްރަޖަން ލޭގެ ތެރޭގައި ގޭހައް ބަދަލު ވަނީ. އޭގެ ސަބަބުން ލޭގައި ބަބްލްސް ފޯރމް ވަނީ. މިގޮތައް ގޭސް ފޯރމު ވެއްޖެނަމަ ލޭހޮޅިތައް ބެދުން ފަދަ ނުރައްކާ ތެރި ކަންކަމާ ކުރިމަތި ވެދާނެ. އެންމެ އާންމުކޮށް އަންނާނީ ބެންޑްްސް. އެއީ ހުޅު ހުޅުގައި ރިއްސުން. މިހާ ފުފުން. ޑައިވް ކުރުމައް ފަހު ފުލައިޓައް އެރުމަކީވެސް ކޮންޕުރެޝަން ދިމާވެދާނެ
ނަން
07 December 2018
ސިންޑީ އަށް އެނގޭބާ މިކަހަލަ ހާދިސާތައް އަސްލު ހިނގާ ސަބަބު؟ ކޮންމެ ކަމެއް ކުރިއަސް އެކަން ހައްލެއް ނުކުރެވޭނެ. ކުރެވޭނެހާވެސް ކަމަކީ ޗެމްބަރ ހެދުން. ކާކު އެކަން ކުރަނީ؟
ޗެމްބާރސް/އާސެންލް
07 December 2018
"ނަން" އަށް އެނގޭބާ ޚަބަރުގައި އޮތީ ޕްރޮފެޝަނަލް ޑައިވަރ ސެންޑީ ގެ ވާހަކަ ކަން.. ކޮން ސިންޑީއެއް ބާ ތި ސުވާލަށް ޖަވާބު ދޭން ޖެހެނީ؟
ޖުހާބެ
07 December 2018
ކޮބައިތަ ތިޔަބު އަސްލު ސަބަބަކީ؟
ބައޯކަލޯ
08 December 2018
ޢެނާ އެބުނަނީ ސިންޑީ ކްރޮފޯރޑްގެ ވާހަކަ...
ތަންދޮރު
08 December 2018
ހައްލަކީ ޗެންބަރ އެއްނޫން. މި ކަމުގެ ތަމްރީނު ލިބިގެން ތިއްބަސް އަދި ވާކަށް ނެތް. އެކަމެއް އެ އޮއްނަ ގަވާއިދާ އުސޫލުތަކާ ހަމަތަކުގެ މަތިން ކުރީމަ މިކަހަލަ ކޭސްތައް މަދުވާނެ. މިކަމުގައި ވިސްނަންޖެހޭ އަނެއް ކަމަކީ ސަޓިފައިޑް ވެ އިންސުއަރެންސް އޮތަސް ގަވާއިދާ އެއްގޮތަށް ޑައިވް ނުކުރާނަމަ އެއްވެސް އިންސުއަރެންސް އެއް ކަވަރ އެއް ނުކުރާނެކަން. ފުރަތަމަ ޒިންމާއަކީ ތިމާ ކަމުގާ ހަދާ.
އަބޫބަކުރ އަލީ
08 December 2018
ތިއީ ކޮންމެ ރަށެއްގައި ހޮސްޕިޓަލެއް އެޅުން ކަހަލަ ވިސްނުމެއް. ކިތަންމެ ގިނައިން ޑީކޯ ޗެމްބަރ ހެދިޔަސް، ޑައިވް ކުރުމުގައި ބަލަންޖެހޭ ހަމަތަކާއި މިންގަނޑުތަކަށް ނުބަލާ ޑައިވް ކުރަންޏާ ނުރައްކާތެރި ހާދިސާ ހިގާނެ. ބައެއްފަހަރު ޗެމްބަރާ ހަމަޔަށް ގެންދެވޭއިރު ވެސް ވަރަށް ބޮޑު ގެއްލުމެއް ވެދާނެ. އަދި ޗެމްބަރަށް ލީމާ އެހިސާބުން އެމީހާ މުޅިން ފިޓްވީއެއް ނޫން. ޑައިވް ކުރުމުގެ މިންގަނޑުތަކަށް ނުބަލާ ޑައިވްކުރުމުގެ ނުރައްކާތެރިކަން ބޮޑަށް ކިޔާދޭންވީ.