އަހަރަކަށް ސްމާޓްފޯނާ ދުރުވެގެން 100،000 ޑޮލަރު ހޯދި ދާނެ

ވިޓަމިންޥޯޓާ އިން ކުރިއަށް ގެންދާ ޗެލެންޖްގެ ބޜނުމަކީ އެއް އަހަރު ދުވަހަށް ފޯނާ ދުރުކުރުން.

އަހުމަދު އަދްޝަން، މިހާރު

17 ޑިސެމްބަރ 2018 - 08:20

ސްމާޓްފޯނާއި ޓެބްލެޓް ފަދަ ވަސީލަތްތަކާ ނުލައި މިހާރު ދިރިއުޅުމުގެ އެންމެ ސިކުންތެއް ވެސް ހޭދަކުރުމަކީ ކުރަން ވަރަށް އުނދަގޫ ކަމަށް ވާނެ އެވެ. އެހެންވީމާ އަހަރު ދުވަހަށް ފޯނާއި ޓެބްލެޓް ގުރުބާންކޮށްލެވޭނީ ކިހިނެއް ހެއްޔެވެ؟

ނަމަވެސް އެ އެއްޗިއްސާ ނުލައި އަހަރު ދުވަހަށް ކެތްކޮށްލެވިދާނެ ކަމަށް ގަބޫލުކުރެވޭ މީހުންނަށް މިއޮތީ ވަރުގަދަ ޗެލެންޖެއް ދީފަ އެވެ. ކުރަން ޖެހޭ ކަމަކީ ކޮކާ ކޯލާ ކުންފުނީގެ ދަށުން ހިންގާ ވިޓަމިންވޯޓާއާ އެއް އަހަރަށް ފޯނާއި ޓެބްލެޓް ހަވާލުކުރުމެވެ. މިކަމަށް ކެތްކޮށްލާ މީހަކަށް އިނާމަކަށް 100،000 ޑޮލަރު ދޭން ވަނީ ނިންމައިފަ އެވެ.

#ނޯފޯންފޮއައިޔާގެ ނަމުގައި ކުރިއަށް ގެންދާ ޗެލެންޖްގައި ސްމާޓްފޯނާއި ޓެބްލެޓް 365 ދުވަސް ވަންދެން މަހުރޫމުވެފައި ހުންނަން ޖެހޭނެ އެވެ. މާނައަކީ އެފަދަ ވަސީލަތްތަކުން އިންޓަނެޓާ ދުރުވާން ވެސް މަޖުބޫރު ވުމެވެ.

we tried to get Brandon to make this deal, but he is too busy – will you turn off your phone for a year instead? #NoPhoneForAYear #contest https://t.co/RVTF0gytnv pic.twitter.com/wFFTXl0PBX
— vitaminwater® (@vitaminwater) December 11, 2018

ވިޓަމިންވޯޓާގެ ޓްވީޓެއް.

މުބާރާތެއްގެ ގޮތުގައި ކުރިއަށް ގެންދާ މި ޗެލެންޖްގެ ދަށުން ވިޓަމިންވޯޓާއާ ފޯނު ހަވާލުކުރާ މީހުންނަށް އޮތް އަނެއް ޝަރުތަކީ އެހެން މީހެއްގެ ފޯނާއި ޓެބްލެޓް ވެސް ބޭނުން ނުކުރުމާއި މިކަމަށް އެއްބަސްވުމެއްގައި ސޮއިކުރުމެވެ.

އަށާރަ އަހަރުން މަތީގެ މީހުންނަށް ހާއްސަކޮށްގެން ކުރިއަށް ގެންދާ މި ޗެލެންޖްގައި ބައިވެރިވާން ފުރަތަމަ ހަދަން ޖެހޭ ގޮތަކީ ފޯނާއި ޓެބްލެޓާ ދުރުވެގެން ހުންނަން ބޭނުންވާ ސަބަބު ލިޔެފައި އޭގެ ފޮޓޯއެއް ނަގައި #ނޯފޯންފޮއައިޔާއާ އެކު ޓްވިޓާ އާއި އިންސްޓަގްރާމްގައި ހިއްސާ ކުރުމެވެ. މި ފުރުސަތު އަންނަ މަހުގެ 8 ވަނަ ދުވަހާ ހަމައަށް އޮންނާނެ އެވެ.

50 US/DC, 18+. ends 1/8/19. see RULES for prize, hashtags, contract opportunity information, and all details.
— vitaminwater® (@vitaminwater) December 12, 2018

ވިޓަމިން ވޯޓާގެ ޓ

މި ޗެލެންޖަށް ބައިވެރިން ހޮވާނީ އެ މީހުން ދެއްކި ސަބަބުތަކަށް ރިއާޔަތްކޮށްފަ އެވެ. ބައިވެރިންގެ ސިލެކްޝަނެއް ހަދައި އެކަން އިއުލާން ކުރާނީ އަންނަ މަހުގެ 22 ވަނަ ދުވަހު އެވެ.

އޭގެ ފަހުން އެ ހޮވުނު މީހުން 365 ވަންދެން އިންޓަނެޓަށް ވަދެވޭ ސްމާޓް ފޯނާއި ޓެބްލެޓް އެއްވެސް ގޮތަކަށް ބޭނުންކޮށްގެން ނުވާނެ އެވެ. އޭގެ ބަދަލުގައި އެ ބަޔަކު ބޭނުން ކުރަން ހަމައެކަނި އަޑުން މުވާސަލާތްކުރެވޭ "އިހުގެ" މޮބައިލް ފޯނެއް ވިޓަމިންވޯޓާއިން ދޭނެ އެވެ

ވިޓަމިންވޯޓާ އިން މި ފުރުސަތު ހުޅުވައިލުމާ އެކު ސޯޝަލް މީޑިއާގައި ގިނަ ބަޔަކު މިހާރު އަންނަނީ މިކަމަށް ވަރަށް ބޮޑަށް ތާއީދުކުރަމުންނެވެ. އަދި މިއީ ސްމާޓްފޯނުގެ ދުނިޔެ އަށް ގެއްލިފައި ތިބޭ މީހުން އިސްލާހުވެލަން ލިބޭ ރަނގަޅު ފުރުސަތެއް ކަމަށް ބައެއް މީހުން ބުނެފައިވެ އެވެ.

ނަމަވެސް ބައެއް މީހުން ބުނެފައި ވަނީ މިއީ ދުވަހުން ދުވަހަށް ނިންމަން ޖެހޭ ކަހަލަ މަސައްކަތްތައް ކުރާ މީހުންނަށް ބައިވެރިވާން ދަތި ޗެލެންޖަކަށް ވާނެ ކަމަށެވެ. ސަބަބަކީ މުއާމަލާތްތަކުގައި ފޯނާއި އިންޓެނެޓް މިހާރުގެ ޒަރޫރީ އެއްޗިއްސަށް ވުމެވެ.