ބެން އެމާސަންއާ އުއްތަމަ ފަނޑިޔާރު ބައްދަލު ކުރައްވައިފި

އިނގިރޭސި ވިލާތުގެ މަޝްހޫރުގެ ގާނޫނީ ވަކީލް ބެން އެމާސަންއާ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ބައްދަލު ކުރައްވައިފި އެވެ.

ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ކުރި ޓްވީޓެއްގައިވާ ގޮތުން އެމާސަންގެ އިތުރުން ބައިނަލްއަގްވާމީ ވަކީލެއް ކަމަށް ފަވަލީ ލީޑައާ ވެސް އުއްތަމަ ފަނޑިޔާރު ބައްދަލު ކުރެއްވީ އިއްޔެ އެވެ. އެ ބައްދަލުވުމާ ގުޅޭ އިތުރު ތަފްސީލެއް ޑީޖޭއޭ އިން އަދި ހާމައެއް ނުކުރެ އެވެ.

ކުރީގެ ރައީސް މުހައްމަދު ނަޝީދުގެ ބައިނަލްއަގްވާމީ ވަކީލުންގެ ޓީމުގައި ވެސް ހިމެނިވަޑައިގަތް އެމާސަން އަކީ އިންސާނީ ހައްގުތަކާބެހޭ ވަކީލެއްގެ ގޮތުގައި މަޝްހޫރު ބޭފުޅެކެވެ. ކުރީގެ ސަރުކާރުގެ ދުވަސްވަރު އިދިކޮޅު ކޯލިޝަންގެ ލީގަލް އެޑްވައިޒަރެއްގެ ގޮތުގައި ވެސް އެމާސަން ހަރަކާތްތެރިވި އެވެ.

ބައިނަލްއަގްވާމީ ކޯޓުތަކުގައި ދިގު މުއްދަތެއް ވަންދެން ވަކާލާތު ކުރުމުގެ ތަޖްރިބާ ލިބިވަޑައިގެންފައިވާ އެމާސަން ވަނީ ބައެއް ގައުމުތަކުގައި ހިނގި ހަނގުރާމައިގެ ޖަރީމާތައް ތަހުގީގު ކުރުމަށް އދ. އިން އެކުލަވާލި ޓީމްތަކުގައި ވެސް މަސައްކަތް ކުރައްވައިފަ އެވެ.