ލަންޑަން (އޭޕްރީލް 3) - އިނގިރޭސި ޕްރިމިއާ ލީގުގައި ރޭ ފަހަތުން އަރައި މެންޗެސްޓާ ޔުނައިޓެޑްގެ މައްޗަށް 2-1 އިން ކުރިހޯދައި އެ ޓީމު އަތުން 20 ދުވަސް ތެރޭ ދެ ވަނަ ފަހަރަށް ވުލްވްސް މޮޅުވެއްޖެ އެވެ.
މިދިޔަ މަހު އެފްއޭ ކަޕް ކުއާޓާ ފައިނަލުން ޔުނައިޓެޑް ކެޓީ ވެސް ވުލްވްސް އަތުން 2-1 އިން ބަލިވުމުންނެވެ. މި ފަހަރު ޕްރިމިއާ ލީގުގައި ޔުނައިޓެޑް ދަނޑުގައި ވުލްވްސްއާ ދެކޮޅަށް ކުޅުނު މެޗު ނިމުނީ 1-1 އިން އެއްވަރުވެގެންނެވެ.
ރޭގެ މެޗުން ބަލިވުމުން ގަދަ ހަތަރަކަށް ވަންނަން ޔުނައިޓެޑަށް ލިބުނު ފުރުސަތު ގެއްލުނުއިރު، މިރޭ ޗެލްސީ ކުޅޭ މެޗުތަކުގެ ނަތީޖާ ނުކުންނަ ގޮތަކުން ޔުނައިޓެޑް ހަ ވަނަ އަށް ވެއްޓުމުގެ ފުރުސަތު އެބައޮތެވެ. ޔުނައިޓެޑް މި ވަގުތު ފަސް ވަނައިގައި އޮތީ 32 މެޗުން 61 ޕޮއިންޓާ އެކު އެވެ. ހަ ވަނައިގައި އޮތް ޗެލްސީ މިރޭ އަމިއްލަ ދަނޑުގައި ބްރައިޓަންއާ ދެކޮޅަށް ކުޅޭއިރު، އެ ޓީމަށް މި ވަގުތު އޮތީ 31 މެޗުން 60 ޕޮއިންޓް ލިބިފަ އެވެ.
ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނީ މިހާރު ހާލަތު އޮތްގޮތުން ލީގުގައި އެ ޓީމަށް ބާކީ އޮތް ހަ މެޗުން ވެސް މޮޅުވަން ޖެހިފައިވާ ކަމަށާއި އެއީ ފަސޭހަކަމެއް ނޫން ކަމުގައި ވިޔަސް އެކަން ހާސިލްކުރަން ކުރެވޭނެ ހުރިހާ މަސައްކަތެއް ކުރާނެ ކަމަށެވެ.
ވުލްވްސްގެ މޮލިނެއުކްސް ސްޓޭޑިއަމްގައި ރޭ ކުޅުނު މެޗު ފަށައިގެން ޔުނައިޓެޑް ވަރަށް މޮޅަށް ކުޅުނެވެ. އަދި އެ ޓީމަށް ކުރިހޯދައިދޭން ރޮމެލޫ ލުކާކޫ ޖެހި ބޯޅަ ވުލްވްސް ކީޕަރު ރުއީ ޕެޓްރީސިއޯ ވަނީ މަތަކޮށްފަ އެވެ. އެކަމަކު މެޗުގެ 13 ވަނަ މިނިޓްގައި ސްކޮޓްލެންޑްގެ މިޑްފީލްޑަރު ސްކޮޓް މެކްޓޮމިނޭ ވަނީ ޔުނައިޓެޑަށް ކުރިހޯދައިދީފަ އެވެ. އޭރިއާ ބޭރުން މެކްޓޮމިނޭ ތިރިތިރިން ޖެހި ބޯޅަ އަމާޒުވީ ގޯލުގެ ދުރުކަނަށެވެ.
ލީޑުފުޅާކުރަން ޔުނައިޓެޑްގެ ޖެސޭ ލިންގާޑަށް ލިބުނު ރަނުގެ ފުރުސަތުގެ ބޭނުން ނުހިފުނުއިރު، ފުރަތަމަ 20 މިނިޓަށް ފަހު ވުލްވްސް މެޗުގެ ތެރެއަށް އައިސް ޔުނައިޓެޑަށް ޕްރެޝަރު ކުރަން ފެށި އެވެ. ނަތީޖާއެއްގެ ގޮތުން ޔުނައިޓެޑްގެ މިޑްފީލްޑަރު ފްރެޑަށް ހެދުނު ގޯހެއްގެ ފައިދާނަގައި މެޗުގެ 25 ވަނަ މިނިޓްގައި ވުލްވްސްގެ ޑިއޯގޯ ޔޮޓާ ވަނީ އެ ޓީމަށް ނަތީޖާ ހަމަހަމަކޮށްދީފަ އެވެ.
ދެ ވަނަ ހާފް ފަށައިގެން 12 މިނިޓް ތެރޭ ޔުނައިޓެޑްގެ ކެޕްޓަން އެޝްލީ ޔަންގަށް ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. އޭގެ ފަހުން ވުލްވްސް އިން ވަނީ ވަރަށް ބޮޑަށް ކުރިއަށް ޖެހިގެން ކުޅެން ފަށައިފަ އެވެ. ވުލްވްސް މޮޅުވި ލަނޑަކީ ޔުނައިޓެޑްގެ ކްރިސް ސްމޯލިން އަތުން މެޗުގެ 77 ވަނަ މިނިޓްގައި ބައިކޮޅަށް ވަން ގޯލެކެވެ.
މި ފަހަރު ޕްރިމިއާ ލީގަށް ޕްރޮމޯޓްވެ ވުލްވްސް އަންނަނީ ޕްރިމިއާ ލީގުގެ ގަދަ ހަ ޓީމާ ދެކޮޅަށް ރަނގަޅު ނަތީޖާތަކެއް ނެރެމުންނެވެ. އަންނަ ސީޒަނުގައި ޔޫރޮޕާ ލީގުގައި ކުޅުމަށް ޓާގެޓްކޮށްފައިވާ ވުލްވްސް ވަނީ އެފްއޭ ކަޕްގެ ސެމީ ފައިނަލުން ވެސް ފުރުސަތު ހޯދައިފަ އެވެ.
ވުލްވްސްގެ ކޯޗު ނޫނޯ އެސްޕިރީޓޯ ސަންޓޯ ބުނީ އެ ޓީމާ ހަވާލުވިއިރު ވެސް އެންމެ ބޮޑު ޓާގެޓަކީ ޔޫރަޕަށް ކޮލިފައިވުން ކަމަށާއި ފުރަތަމަ ސީޒަނުގައި އެކަން ހާސިލްކުރެވޭނެ ކަމުގެ މާ ބޮޑު އުއްމީދެއް ނެތި ސީޒަން ފެށި ނަމަވެސް ކުޅުންތެރިން ދެއްކި ހިތްވަރުން ހުރިހާ ކަމެއް ބަދަލުވެފައިވާ ކަމަށެވެ.
ލީގުގައި ރޭ ކުޅުނު މެޗުން ވަޓްފޯޑް އަތުން 4-1 އިން ބަލިވެ ފުލަމް ވަނީ ރެލިގޭޓްވެފަ އެވެ. ފުލަމް އަކީ މި ފަހަރު ރެލިގޭޓްވި ދެ ވަނަ ޓީމެވެ. އެންމެ ފަހުން ކުޅުނު މެޗަށް ފަހު ހަޑްސްފީލްޑް ޓައުން ވެސް ވަނީ ބާކީ ހަ މެޗު އޮއްވައި ރެލިގޭޓްވެފަ އެވެ.
