ސްކޫލެއްގައި ޓެބްލެޓް ބޭނުންކޮށްގެން ކިޔަވައިދެނީ.-- ފޮޓޯ: ހުސެއިން ވަހީދު/ މިހާރު
08 އެޕްރީލް 2019 - 09:10
56 comments
ސްކޫލުތައް ޑިޖިޓައިޒްކޮށް ޓެބްލެޓް ބޭނުންކޮށްގެން ކިޔަވައިދޭން ފެށުމަކީ ތައުލީމީ ދާއިރާ އަށް އިންގިލާބީ ބަދަލުތަކެއް އަންނާނެ ކަމެއް ކަމަށް ކުރީގެ ސަރުކާރުން ގަބޫލުކުރި އެވެ. އަދި އެ މަޝްރޫއަށް ކުރީގެ ރައީސް އަބްދުﷲ ޔާމީންގެ ސަރުކާރުން ބޮޑު ހަރަދެއް ވެސް ކުރި އެވެ. އެކަމަކު ޓެބްލެޓުތައް ބޭނުން ނުކުރެވި މިހާރު ބޭކާރުވެފައިވާ ކަމަށް ބައެއް ސްކޫލުތަކުން ބުނެ އެވެ.
ބައެއް ބެލެނިވެރިން ގަބޫލުކުރަނީ ދަބަސް ބަރުވުމުގެ ޒަމާންވީ މައްސަލައަށް ޓެބްލެޓާ އެކު ހައްލެއް އަންނާނެ ކަމަށެވެ. ކުރީގެ ސަރުކާރުގެ ވިސްނުން ވެސް އޭރު ގެންގުޅުނީ އެކަހަލަ ގޮތަކަށެވެ. ނަމަވެސް މިިދިޔަ އަހަރުގެ ފަހު ޓާމުން ފެށިގެން ގިނަ ސްކޫލުތަކުގައި ޓެބްލެޓް ބޭނުންކޮށްގެން ކިޔަވައިދޭން ފެށި ކަމަށް ވިއަސް އެ މަޝްރޫއުގެ ހަގީގީ މަގުސަދު ހާސިލްނުވާ ކަމަށް ތައުލީމީ ދާއިރާގެ ބައެއް ތަޖުރިބާކާރުންނާއި ބެލެނިވެރިން ބުނެ އެވެ.
މިިދިޔަ ސެޕްޓެމްބަރު މަހު ހުރިހާ ދަރިވަރުންނަށް ޓެބްލެޓް ހަވާލުކުރާނެ ކަމަށް ބުންޏަސް، އަދި ވެސް ޓެބްލެޓް ނުލިބޭ އެތައް ދަރިވަރުންނެއް އެބަ ތިއްބެވެ. އަދި ޓެބްލެޓް ހަވާލުކޮށްފައި ވިއަސް އެ ބޭނުންކުރާ ދަރިވަރުންގެ އަދަދު ވެސް މަދެވެ.
ކުރީގެ ސަރުކާރުން ތައުލީމީ ދާއިރާއަށް ގެންނަން އުޅުނު "ބޮޑު އިންގިލާބު"ގައި ބޭނުންކުރަން 70،000 އަށް ވުރެ ގިނަ ޓެބްލެޓް ގެންނަން 2017 ގެ ފަހުކޮޅު ހަވާލުކުރީ މެކްސްކޮމް އެވެ. އަަދި ވާވޭގެ ޓެބްލެޓް ހޯދަން 154 މިލިއަން ރުފިޔާގެ ބަޖެޓެއް ކަނޑައެޅި އެވެ. ޓެބްލެޓް ބޭނުންކޮށްގެން ކިޔަވައިދިނުމާ ގުޅޭ ގޮތުން ބެލެނިވެރިންނާއި ޓީޗަރުން ހޭލުންތެރިކުރުވި އެވެ.
ނަމަވެސް ޓެބްލެޓްގެ ބޭނުންކޮށްގެން ކިޔަވައިދިނުމުގެ ކަންކަން ފެށީ ވެސް ދިމާވެދާނެ ބައެއް މައްސަލަތަކަށް ވިސްނާފައި ކަމަށް، ބައެއް ބެލެނިވެރިންނާއި ސްކޫލްތަކުގެ ބައެއް އިސް ވެރިން ގަބޫލެއްނުކުރެ އެވެ. އެކަމުގެ ކަންބޮޑުވުން ފާޅުކޮށް މާލޭގެ ސްކޫލަކުން ވާހަކަދެއްކެވި އިސް ވެރިއަކު ވިދާޅުވީ ޓެބްލެޓް ބޭނުންކުރަން ފެށުމުގެ ކުރިން ކުރަން ޖެހޭ ވަރަށް ގިނަ މަސައްކަތްތައް އަދިވެސް ހުރީ ނުކޮށް ކަމަށެވެ. އެގޮތުން ސްކޫލުގެ އިންޓަނެޓްގެ ފެންވަރު ރަނގަޅުކޮށް، ޓެބްލެޓުގެ ސެކިއުރިޓީ ވެސް ރަނގަޅުކުރަން ޖެހޭ ކަމަށް އޭނާ ވިދާޅުވި އެވެ.
ސްކޫލެއްގައި ޓެބްލެޓް ބޭނުންކޮށްގެން ކިޔަވައިދެނީ.-- ފޮޓޯ: ހުސެއިން ވަހީދު/ މިހާރު
ބައެއް ސްކޫލްތަކުން ބުނާ ގޮތުގައި އިންޓަނެޓު ގުޅައި އަދި ޓެބްލެޓާ ބެހޭ އެހެން ބައެއް އިންތިޒާމްތައް ހަމަޖައްސާފައިވަނީ އެއްވެސް ރޭވުންތެރިކަމެއް ނެތި އެވެ. މިސާލަކަށް، ޓެބްލެޓަށް އެއް ދުވަހަކު އަޅާ ޕްރޮގްރާމެއް ސަކަރާތްވެގެން އޭގެ އަނެއް ދުވަހު އާ އެހެން އެއްޗެއް އަޅަން ޖެހޭ ކަމަށް ސްކޫލެއްގެ ވެރިޔަކު ވިދާޅުވި އެވެ.
"ވަރަށް ދޯދިޔާކޮށް އެކަންތައް އޮތީ. ބޮޑު ހަރަދެއް ކޮށްގެން ގެނައި އެއްޗެހިތައް ބޭކާރުވެފައިވާ މަންޒަރު މި ފެންނަނީ،" އޭނާ ވިދާޅުވި އެވެ.
އޭނާ ވިދާޅުވީ ހުރިހާ ތަނެއްގައި އެއް ފަހަރާ ޓެބްލެޓު ބޭނުންކޮށްގެން ކިޔަވައިދޭން ފެށުމަކީ ގޮންޖެހުމަކަށް ވާނެ ކަމެއް ކަމަށެވެ. އެހެންވެ މެލޭޝިޔާ އާއި ސިންގަޕޫރު ފަދަ ގައުމުތަކުގައި އޮންނަ އުސޫލުން، މަޑުމަޑުން އެ މަސައްކަތް ފުޅާކުރެވިދާނެ ކަމަށް އޭނާ ވިދާޅުވި އެވެ.
ގްރޭޑު ނުވެއްގައި ކިޔަވާ ދަރިވަރެއްގެ ބެލެނިވެރިއަކު ބުނީ ސްކޫލުން ޓެބްލެޓް ދިންކަމުގައި ވިއަސް އެ ބޭނުންކޮށްފައިވަނީ ތިން ދުވަހު ކަމަށެވެ. އޭގެ ފަހުން ޓެބްލެޓްގެ ބޭނުމެއް ނުކުރެ އެވެ.
"ޓެބްލެޓް ނުގެންދޭ ސްކޫލަކަށް. އެތަނުން ބުނީ ޓެބްލެޓް ގެންދާނެ ކަމެއް ނެތޭ. އެހެންވެ އެ އޮންނާނީ ގޭގައި ބާއްވާފައި،" އެ ބެލެނިވެރިޔާ ބުންޏެވެ.
ގްރޭޑު ތިނެއްގައި އުޅޭ ދަރިވަރެއްގެ ބެލެނިވެރިއަކު ބުނީ އޭނާގެ ހަގު ދަރިފުޅަށް ސްކޫލުން އަދި ޓެބްލެޓް ހަވާލުނުކުރާ ކަމަށެވެ. އަދި ގްރޭޑު އަށެއްގައި އުޅޭ ދަރިފުޅަށް މިދިޔަ އަހަރުގެ ފަހުކޮޅު ޓެބްލެޓް ދިން ނަމަވެސް އޭގެ ބޭނުމެއް ނުކުރާ ކަމަށް އޭނާ ބުންޏެވެ.
"ސްކޫލުން ބުނި އެހެން އެއްވެސް އެޕްލިކޭޝަނެއް ޑައުންލޯންޑެއް ނުކުރެވޭނެއޭ. އެކަމަކު ތިން ކޮއްކޮއަކު މިހާރު ވެސް ފާޑުފާޑުގެ އެޕްލިކޭޝަންތައް އަޅައިގެން ބޭނުން ކުރޭ އެބަ. އަސްލު ވަރަށް ކަޑަކޮށް އެކަންތައް އޮތީ،" ކަންބޮޑުވުން ފާޅުކޮށް ވާހަކަދެއްކި އެ ބެލެނިވެރިޔާ ބުންޏެވެ.
މާލޭގެ ސްކޫލެއްގައި ކިޔަވައިދޭ ޓީޗަރަކު ބުނީ ޓެބްލެޓް ބޭނުންކުރަން ސްކޫލުން އެއްވެސް ގޮތަކަށް މަނާނުކުރާ ކަމަށެވެ. ގިނަ ޓީޗަރުން އެ ބޭނުންކޮށްގެން ކިޔަވައިނުދެނީ އޭގެ މުހިއްމުކަން ނެތުމުން ކަމަށް ވެސް އޭނާ ބުންޏެވެ.
އޭނާ ދެކޭ ގޮތުގައި ގިނަ ކުދިން ގޭގައި ވެސް ވަގުތު ހޭދަކުރަނީ ޓެބްލެޓާއި ޓީވީ ސްކްރީނަށް ބެލުމުގަ އެވެ. އެހެންވެ ސްކޫލުގައި ހޭދަކުރާ ކުޑަ ވަގުތުކޮޅުގައި ޓެބްލެޓް ދީގެން ކިޔަވައިދިނުމަކީ މުހިއްމު ކަމެއް ނޫން ކަމަށް އޭނާ ބުންޏެވެ.
ހއ. ކެލާގެ ޝެއިހު އިބްރާހިމް ސްކޫލުގެ ދަރިވަރުން ޓެބްލެޓާ އެކު ފޮޓޯއަކަށް ހުއްޓިލައިގެން
ބައެއް ކްލާސްތަކުގައި، ޓެބްލެޓުގެ ސެކިއުރިޓީ ބްރޭކްކޮށްގެން ދަރިވަރުން އަމިއްލައަށް އެޕްލިކޭޝަން އަޅައި، ގެއިން ރައުޓާ ގެނެސްގެން ސްކޫލުގައި ބޭނުންކުރާ ކަމަށް ވެސް އޭނާ ބުންޏެވެ.
"ކްލާސްރޫމުތަކުގައި މިހާރު ވެސް ޕްރެޒެންޓޭޝަން ދެއްކޭ. އެހެންވީމަ ބޭކާރު ކަމެއް ކޮންމެ ކުއްޖަކަށް ޓެބްލެޓް ދިނުމަކީ. އަނެއްކާ އެ ރަނގަޅަށް ބޭނުމެއް ވެސް ނުކުރެވޭ، ކޮލެޓީ ދަށް އެއްޗެހިތަކެއް،" އެހެން ޓީޗަރަކު ބުންޏެވެ.
މިހާރުގެ އެޑިއުކޭޝަން މިނިސްޓަރު ޑރ. އައިޝަތު އަލީ ޖެނުއަރީ މަހު ވިދާޅުވީ ކިޔަވައިދިނުމުގައި ޓެބްލެޓް ބޭނުންކުރުމުގެ ވިސްނުންތަކެއް އާ ސަރުކާރުގައި ވެސް އެބަހުރި ކަމަށެވެ. އޭނާ ވިދާޅުވި ގޮތުގަައި އިންފޮމޭޝަން ކޮމިއުނިކޭޝަން ޓެކްނޮލޮޖީ (އައިސީޓީ) އަށް މަންހަޖުގައި ބޮޑު އަހައްމިއްޔަތުކަމެއް ދެ އެވެ.
"އައިސީޓީ މެދުވެރިކޮށް ޓެބްލެޓުން އަޅުގަނޑުމެންނަށް އިތުރަށް އެ މަޝްރޫއު ފުޅާކުރުމުގެ ވިސްނުންތަކެއް އެބަހުރި. އެ ރޭވުންތައް ރާވަމުން މި ދަނީ. އަޅުގަނޑުމެން ގަސްތުކޮށްފައި އޮތީ ޓެބްލެޓް އެއީ ކިޔަވައިދިނުމަށް ބޭނުންކުރާ އިތުރު އެހީއެއްގެ ގޮތުން ޓެބްލެޓް ވެސް ބޭނުންކުރާ ކަހަލަ ގޮތަކަށް،" މިނިސްޓަރު ވިދާޅުވި އެވެ.
އެކަމަކު މިހާރު ފެންނަ ހަގީގަތަކީ 154 މިލިއަން ރުފިޔާގެ މަޝްރޫއުގެ ފައިދާއެއް ނުފެންނަ ކަމެވެ. އެއީ ރަައްޔިތުންގެ ފައިސާ އިން ކުރީ ސަރުކާރުން ކުރި ވަރަށް ބޮޑު އިސްރާފެއް ކަމަށް ބެލުމުގެ ފުރުސަތު އަދި އޮތީ ހުޅުވިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހަސަދު
08 April 2019
އިސްރާފެއް ނޫން. ބަޔަކު މުއްސަދި ކޮށްދެވިއްޖެ. އެޑިޔުކޭޝަން މިނިސްޓްރީ އަކީ ބަގުރޫޓުވާން ތައްޔާރު ވެފައިވާ ކުނަފުނިތައް މުއްސަދި ކޮށްދޭ ތަނެއް.
މުރާސިލު
08 April 2019
އެމަސްރޫއު އަދި އޮތީ ބޭކާރު މަސްރޫއެއްގެ ގޮތުގައެވެ. ޓެބްލެޓް ބޭނުންކޮށްގެން ތުއްތު ކުދިންތައް އުފުލާ ބަރުދަބަސްތައް އުފުލަން ނުޖެހޭނެފަދަގޮތެއް ސަރުކާރުން ހަމަޖައްސަވައިދެއްވުމަށް ގޮވާލަމެވެ. ކޮންމެ ދުވަހަކު އެދަބަސްތައް އުފުލަންޖެހުމަކީ އެކުދިންގެ ސިއްޙަތަށް ވަރަށްބޮޑު ގެއްލުމެއް ލިބިދާނެކަމެއްކަމަށް ފެނެއެވެ.
އިސްރާފް
08 April 2019
އެއްވެސް ދިރާސާއެއްނުކޮށް ރަނގަޅު އިންތިޒާމްތައް ހަމަނުޖައްސާ އަވަސްއަރުވާލާފަ ކަޓު ނަގަން ކުރާ ކަންކަމުގެ ނަތީޖާ. މިހާރުވެސް ފީކަޅާ އެއްޗަކަށްވިއްޔާ ތިދެން ރަނގަޅަަށް ބޭނުންކުރެވެން ފެށޭއިރު ހުންނާނީ ފުދޭވަރަކަށް އައުޓްޑޭޓެޑްވެފަ. އަނެއްކާވެސް ބަޔަކަށް ލާރިގަނޑެއް ދީގެން އެކަން ކުރަން ޖެހިފަ.
ައޭދަފުށި
08 April 2019
އޭދަފުށި ކުދިންނައް ބޭކާރު
އަލްޖިބްރާ
08 April 2019
އެންމެ ފުރަތަމަ ތިޔައެއްޗެއް ބަހާނަމޭ ބުނިއިރުވެސް ތިޔައީ ބޭކާރު އެއްޗަކަށް ވާނެކަން އެގޭ ! އެކަމަކު ވޯޓުހޯދާނަމޭ ހިތާ ކުރާ މިޒާތުގެ ހުރިހާކަމަކުން ރާއްޖެއަށް ވާނީ ގެއްލުން !
އާނާ
08 April 2019
އެ ހުރީ ޕާސްވޯޑު ލާފަ .ގޭގަ އޮތަސް ނުހުޅުވޭ.
ންންންން
08 April 2019
ކަމެއްރަނގަޅު ކުރެވޭނީ އިންޓަނެޓްގެ ސްޕީޑް ރަނގަޅު ކޮށްގެން ދޯ...
ރުޅި
08 April 2019
ތިޔައީ ވަރަށް ވަރަށް ދޯދިޔާ ކޮށް ކޮށްފައިވާކަމެއް. މަގޭ އެއްދަރިފުޅަށް ޓެބްލެޓްދިން ހަފްތާގައި އެވެއްޓިވަނީ ސްކްރީން ތެޅިފަ. އެހެންވީމާ އަނެއްކާ އަތުން ލާރިދީގެން ހެދީ. ހެދިފަހުން އަދި ބޭނުމެއްނުކުރޭ. އަނެއްދެދަރިން އެ ބޭނުންކުރަނީ ގޭމް އަޅައިގެން ގޭމްކުޅެން. މަހިތައްއަރާ އެ އަތުލާފަ ފޮތްތައް ބަހައްޓާނެ ލޮކަރެއް ކޮންމެ ކުއްޖަކަށް ދޭނެނަމައޭ. އޭރުން މޮނީޓަރ ފޮތްކޮޅު އެކަނި ގެންދެވޭނެ.
ންންންން
08 April 2019
ކަންތައް ކުރަންވާގޮތައް ނުކުރީމަވާނީ ތިހެން.
ގޮއްބަބުރު
08 April 2019
މިޒަމާނުގަ ނޫސް ޕުރިންޓުކޮށްގެން އެވިއްކަން ބަޔަކު އުޅޭތޯ.... މީ ޑިޖިޓަލް ޒަމާން ތިޔަ ޓެބަށް ހުރިހާ ޓެކްސްޓްފޮތެއް އެޅީމާ ކޮންމެ އަހަރަކު އާ ފޮތްބައެއް ޕުރިންޓު ކުރަންޖެހޭތޯ ... ހަރަދު ކުޑަވޭތޯ ... ލުއިފަސޭހަވޭތޯ... މިއަދު ތިއަށް ފާޑުކިޔާ ބޭރުކުރިއަސް ތިކަން ރާއްޖޭގައިކުރާނެ އެދުވަހަކުން އަނގަފުޅާކޮށް ހޭން ނޫނީ ރޯންހުންނާނީ
ހޭހަން
08 April 2019
އަސްލުވެސް ގޮއްބަބުރު ތިބުނީ ހަމަ ވަރަށް ބޮޑު ތެދެއް. ގައުމުގަ މިތިބީ ތަންދޮރު ދަންނަ ޖާހިލުން.... ބައި ތިއްބާ ރީތި ބޮނޑި އެއް ބޮވޭނެ މިވެރިން ނަށް.