މެދުފަންތީގެ ޓޫރިޒަމް ކުރިއަރުވަން އުފެއްދި ކުންފުންޏަށް މެމްބަރުން އައްޔަންކޮށްފި

ޓޫރިޒަމް ދާއިރާ އިން ރާއްޖެ އަށް ކުރާ މަންފާ އިތުރުކުރުމުގެ މަގުސަދުގައި ރައީސް އަބްދުﷲ ޔާމީން މި މަހު އުފެއްދެވި މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) ގެ ބޯޑަށް އަށްމިއަދު މެމްބަރުން އައްޔަންކޮށްފި އެވެ.

ޕްރައިވަޓައިޒޭޝަން ބޯޑުގެ ރައީސް މުހައްމަދު ނިޒާރު ކުރެއްވި ޓުވީޓެއްގައި ވިދާޅުވީ އެމްއައިޓީޑީސީގެ ޗެއާޕާސަންގެ މަގާމަށް ހ. ހެޒުލް، ފާތިމަތު ރިޝްފާ އަދި މެނޭޖިން ޑިރެކްޓަރަކަށް މ. ކަނަމަނަ މުހައްމަދު ޝާހިދު އައްޔަންކުރައްވާފައިވާ ކަމަށެވެ. މީގެ އިތުރުން ބޯޑުގެ މެމްބަރުންގެ ގޮތުގައި ގދ. ތިނަދޫ، ލުކިން ގްލާސް، ޝަކީބާ ހުސެއިނާއި ސ. ހިތަދޫ، ކޮތަންމާގޭ މަންސޫރު ޒުބެއިރުގެ އިތުރުން ލ. ފޮނަދޫ، އަރާއިރު ފާތިމަތު ސޮބާހާ އައްޔަންކުރައްވާފައިވާ ކަމަށް ނިޒާރުގެ ޓްވީޓުގައިވެ އެވެ.

މި ބޭފުޅުންގެ ތެރެއިން ޝާހިދު މިހާތަނަށް މަސައްކަތް ކުރެއްވީ އެޗްޑީސީގަ އެވެ. ޝަކީބާ މަސައްކަތްކުރައްވަނީ އަމިއްލަ ޓްރެވަލް އެޖެންސީއެއްގަ އެވެ. ޒުބެއިރު މަސައްކަތް ކުރައްވަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގަ އެވެ. މި ބޯޑަށް އައްޔަންކުރެއްވި މެމްބަރުންގެ ތެރެއިން ސޮބާހާ އަކީ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲގެ އަންހެން ދަރިކަނބަލެކެވެ.