ބޭންކް އޮފް މޯލްޑިވްސް ހެޑް އޮފީސް.
15 އެޕްރީލް 2019 - 15:31
51 comments
ލިންޗްޕިންގެ ހުޅުމާލޭ ފިހާރައިން މާ ކުރިން ކުރި ވިޔަފާރިތަކަކަށް ބައެއް މީހުންގެ އެކައުންޓުން މިހާރު ކެނޑެމުންދާ ފައިސާ އަކީ އެތަނަށް ލިބެންވާ އެއްޗެއް ކަމަށް ބޭންކް އޮފް މޯލްޑިވްސް އިން މިއަދު ބުނެފި އެވެ.
ލިންޗްޕިންގެ ހުޅުމާލޭގެ ފިހާރައަކަށް ފައިސާ ކެނޑިކަމުގެ މެސެޖްތަކެއް ބައެއް ކަސްޓަމަރުންނަށް ލިބެމުން ދާތީ، ސޯޝަލް މީޑިއާގައި ބައެއް މީހުން ގެންދަނީ އެ ފިހާރަ އާއި ބީއެމްއެލް އަށް ތުހުމަތުތަކެއް ކުރަމުންނެވެ. މި މައްސަލާގައި ސުވާލުކުރުމުން ރާއްޖޭގެ އެންމެ ބޮޑު ބޭންކުން، ވަކި ތަނެއްގެ ސީދާ ނަން ނުގެނެސް، ބުނީ އެއީ އެ ތަނުން ކުރި ވިޔަފާރިއަށް ކަސްޓަމަރުން ދައްކަން ޖެހޭ ފައިސާ ކަމަށެވެ.
ބައެއް މީހުން ޓްވިޓާގައި ބުނެފައިވަނީ ފައިސާ ކެނޑުނު ކަމަށް ކުރިން ވެސް މެސެޖް ލިބުނު ކަމަށެވެ. އެގޮތަށް މެސެޖް ކުރިން ލިބުނު ނަމަވެސް ބީއެމްއެލުން ބުނީ އެއް ފަހަރަށް ވުރެ ގިނައިން އެއްވެސް ކަސްޓަމަރެއްގެ އަތުން ފައިސާ ކެނޑިފައި ނުވާނެ ކަމަށެވެ.
މިދިއަ އަހަރުގެ ސެޕްޓެމްބަރު މަހުން ފެށިގެން ލިންޗްޕިންގެ އެ ފިހާރައިން ކުރި ވިޔަފާރިތަކަށް ކަސްޓަމަރުންގެ އަތުން ފައިސާ ކެނޑިފައި ނުވާ ކަމަށް، މި މަހުގެ ކުރީކޮޅު، ބޭންކްގެ ސަމާލުކަމަށް ގެނެސްފައިވެ އެވެ. އަދި ސެޓްލްމެންޓްގައި ދިމާވި މައްސަލަ ހައްލުކުރުމުން، ސެޕްޓެމްބަރު މަހުން ފެށިގެން ކުރި ވިޔަފާރިތަކުން ކަސްޓަމަރުންގެ އަތުން މިހާރު ފައިސާ ކެނޑިފައިވާ ކަމަށް، ބީއެމްއެލުން ބުންޏެވެ.
"އެކައުންޓުން ފައިސާ ކެނޑުން ލަސްވި ސަބަބު ބޭންކުން މި އަންނަނީ ކަސްޓަމަރުންނަށް އަންގަމުން،" ބީއެމްއެލްގެ އޮފިޝަލަކު ވިދާޅުވި އެވެ.
އޭނާ ވިދާޅުވީ އެއީ މައްސަލަ ޖެހުނު މުއްދަތުގައި ކަސްޓަމަރުން އެތަނުން ކޮށްފައިވާ ވިޔަފާރިތަކަށް އެ ފިހާރައަށް ދައްކަން ޖެހޭ ފައިސާ ކަމަށެވެ.
"އެއީ ކަސްޓަމަރުންގެ އެކައުންޓުން ކުރިން ކެނޑިފައިވާ ފައިސާއެއް ވެސް ނޫން،" އޮފިޝަލް ވިދާޅުވި އެވެ.
އެތަނެއްގެ އެކައުންޓަށް ފައިސާ ޖަމާވާނީ ސެޓްލްމެންޓް ހެދުމުން ކަމަށާއި އާންމުކޮށް ކޮންމެ ދުވަހެއްގެ ވިޔަފާރި ނިމުމުން ސެޓްލްމަންޓް ހަދާ ކަމަށް ވެސް ބީއެމްއެލުން ބުންޏެވެ.
"އެދުވަހު ޕީއޯއެސް މެދުވެރިކޮށް ކުރާ ވިޔަފާރި އަށް ލިބެންވާ ފައިސާ އެކައުންޓަށް ހަމައަށް ޖަމާކުރެވިފައިވޭތޯ ބެލުމަކީ މާޗަންޓުން ކުރަން ޖެހޭ ކަމެއް. އަދި އާންމުކޮށް އެކަން ކުރަމުން އާދޭ،" އޮފިޝަލް ވިދާޅުވި އެވެ.
ބީއެމްއެލުން ބުނީ ސެޓްލްމަންޓް ހެދުމުގައި ދައްޗެއް ދިމާވެ، ނުވަތަ ވިޔަފާރީގެ އެއްވެސް މުއާމަލާތަކުން ލިބެންވާ ފައިސާ މާޗަންޓްގެ އެކައުންޓަށް ޖަމާނުވާ ނަމަ، އެކަން އެންގުމުން ބޭންކުން ވަގުތުން އެހީތެރިކަން ފޯރުކޮށްދޭ ކަމަށެވެ.
ކަސްޓަމަރަކު ނުކުރާ މުއާމަލާތެއްގެ ފައިސާ އެކައުންޓުން ކެނޑިއްޖެ ނަމަ ބޭންކުން އެކަން ހައްލުކޮށްދީ، ކަސްޓަމަރުންގެ ހައްގު އަބަދުވެސް ހޯދައިދޭނެ ކަމަށް ވެސް ބީއެމްއެލުން ބުންޏެވެ.
މިދިއަ އަހަރު ބީއެމްއެލްގެ ކަސްޓަމަރުން 39 މިލިޔަން މުއާމަލާތްކުރި އިރު އޭގެ ތެރެއިން 98 ޕަސެންޓް މުއާމަލާތް ހިންގީ ބޭންކްގެ ޑިޖިޓަލް ހިދުމަތްތައް މެދުވެރިކޮށެވެ.
ކަސްޓަމަރުންނަށް ވަރަށް މަދު ފަހަރަކު ދިމާވާ ދަތިތައް ހައްލުކުރުމަށާއި ކަސްޓަމަރުންނަށް އެންމެ ރަނގަޅު ހިދުމަތް ފޯރުކޮށްދޭން އަބަދުވެސް މަސައްކަތްކުރަމުން އަންނަ ކަމަށް ވެސް ބީއެމްއެލުން ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޛަލް
17 April 2019
އެއްފަހަރާ ކަނޑާލީމަ ދަތިވޭ ވަރަށް!!
ބޯހަލާމލ
16 April 2019
އެހެންވިއްޔާ ކިރީބައިގަ އެގޮތަށް އެކަން ވެފަ އޮތްވާހަކަ އެންގި ނަމަ. އޭރަށްނު މީހުން ހާސްފަށަށް ނާރާނީ.
ޝަފްރަތު
16 April 2019
ކޮބާ ބޭންކުން ބޮޑު ވައްކަމެއްގަ ކަނޑާލި ދެމަފިރިންގެ ވެސް މައްސަލައެއް ނެއްކަމަށް ނިމުނީ.. ލާރިގަނޑު ކާލައިގެން އެއުޅެލަނީ މިނިވަން ކަމާ އެކު....
ރާއްޖެ
16 April 2019
މިވަރުން ކިހިނެއް ކޭޝްލެސް ގައުމަކަށް ހަދަނީ؟
މާސްޓަރ
16 April 2019
އެއް އަހަރުފަހުން އެކައުންޓުގެ ވެރިފަރާތުގެ ހުއްދަ ނެތި ފައިސާ ނެގުން ޤަބޫލެއްނުކުރެވޭ. ބޭންކުން ނުވަތަ ފިހާރައިން ވެވިފައިވާ އިހްމާލަކަށް، އެކައުންޓުގެ ވެރިފަރާތް ޒިންމާގަދަކަމުން ކުރުވުމަކީ ފޭރުން، ނުވަތަ ވައްކަންކުރުން. މިނޫންގޮތަކަށް މިކަން މާނައެއްނުކުރެވޭ.
ޅަބޭ
16 April 2019
ބޭންކް އޮފް މޯލްޑިވްސް އިން ބޭނުން ކޮރަޕްޝަނެއް ބޭނުންއިރަކު އެހިންގާލަނީ އެމީހުނާ ސަރުކާރާ ގުޅިފަ އޮންނާތީ. ވަރައް ކޮރަޕްޓް ބޭންކެއް ތީ.
ހަކީމު
16 April 2019
ބ.މ.ލ ރަނގަޅަށް މޭނެޖެއް ނުކުރެވޭ ... ބޭކާރު ސްޓާފުން ވަރަށް ގިނަ. ލިންޗްޕިންގެ އެކަންޓުވެސް ރަނގަޅަށް ރިކޮންސައިލް ނުކުރެވޭތީތާ މަސްތަކެއް ވެގެން ދާއިރުވެސް ރޭކާ ނުލަނީ ... ކުއްލިޔަކަށް ކެނޑުމުގެ ބަދަލުގައި ކަސްޓަމަރުންނަށް މިކަން ކުރިޔާލާ އެނގިގެން ކުރިނަމަ ރަނގަޅުވީސް.
ކޮރަލް
16 April 2019
ބޭންކް އަށް ގޯސްކޮށް ކަމެއް ކުރެވިފަ ވާނަމަ މައާފައް އެދެން ވީއެވެ.
ނަޖްވާ
16 April 2019
ބައެއް ފަހަރު ޕޯސް މެސިންތަކުން ރަސީދު ޗާޕު ނުވެ، އެކަމަކު ފޯނަށް މެސެޖް އާދޭ ފައިސާ ކެނޑިއްޖެ ކަމަށް! ފިހާރައިގެ މީހާ ބުނަނީ، ރަސީދު ޗާޕު ނުވާހާ ހިނދަކު އެފިހާރަޔަކަށް ފައިސާ އެއް ނުލިބޭނެޔޯ ކިޔާފަ، ކިތަންމެ ފަހަރަކު އެބަހުރޭ ޕިން ޖައްސުވާފަ އަލުން ބަލުން! ހަމަ ޕިންޖަހާ ކޮންމެ ފަހަރަކު މެސެޖް އާދޭ، އެކައުންޓުން ފައިސާ ކެނޑުނު ކަމުގެ! މީ މައްސަލަ އެއްނު! މި މައްސަލަ ހައްލު ކޮށްދިނުމަށް އެދި ބޭންކުގައި ވަރަށް އަދަބު ވެރިކަމާ އެކު އެދެން!
ތިމާވެށި
16 April 2019
ކާޑް ބޭނުން ކޮށްގެން ފިހާރައިން ކުރާ ވިޔަފާރި 24 ގަޑިއިރު ތެރޭ އޮންނަން ވާނީ ނިމިފައެވެ. ބޭންކް ގެ އިހްމާލެވެ. ޒިންމާނަގަން ޖެހެއެވެ. އިންޓޯލް އަށް ޕެކެޓް ގަންނަން ފިހާރަ އަށް ދިޔައިރު ފައިސާ ކޮޅު ނަގައިފިއެވެ .