ޚަބަރު / ރައީސް އިބްރާހިމް މުހައްމަދު ސޯލިހް

ގައުމީ ގުރުއާން މުބާރާތުގެ ކިޔެވުން ކުރިއަށްދާ ގޮތް ރައީސް ބައްލަވާލައްވައިފި

ކީރިތި ގުރްއާން ކިޔެވުމުގެ 33 ވަނަ ގައުމީ މުބާރާތުގެ ކިޔެވުން ކުރިއަށްދާ ގޮތް ރައީސް އިބްރާހިމް މުހައްމަދު ސޯލިހް މިއަދު ބައްލަވާލައްވަނީ. --- ފޮޓޯ: ރައީސް އޮފީސް

މުހައްމަދު ޔާމީން، މިހާރު

04 ސެޕްޓެމްބަރ 2019 - 18:44

1 comments

ކީރިތި ގުރްއާން ކިޔެވުމުގެ 33 ވަނަ ގައުމީ މުބާރާތުގެ ކިޔެވުން ކުރިއަށްދާ ގޮތް ރައީސް އިބްރާހިމް މުހައްމަދު ސޯލިހް މިއަދު ބައްލަވާލައްވައިފި އެވެ.

ރައީސް އޮފީހުން ބުނީ އިސްލާމީ މަރުކަޒަށް ރައީސް ކުރެއްވި ޒިޔާރަތުގައި މުބާރާތުގެ އިންތިޒާމުތައް ހަމަޖެހިފައިވާގޮތް އޮޅުންފިލުއްވައި އެ ވަގުތު މުބާރާތުގައި ކިޔަވަމުންދިޔަ ކުދިންގެ ކިޔެވުން އަޑު އައްސަވާލައްވައި އެ ކުދިންނަށް ހިތްވަރު ދެއްވާފައިވާ ކަމަށެވެ.

ރައީސްގެ އިތުރުން ނައިބު ރައީސް ފައިސަލް ނަސީމް ވެސް ވަނީ މި މުބާރާތް ހިނގަމުންދާ ގޮތް ބައްލަވާލައްވަން އިސްލާމީ މަރުކަޒަށް ޒިޔާރަތް ކުރައްވައިފަ އެވެ.

ގައުމީ ގުރުއާން މުބާރާތުގައި 1200 އަށް ވުރެ ގިނަ ބައިވެރިން ވާދަކުރެ އެވެ.

މިފަހަރުގެ މުބާރާތް ވަނީ ތިން ކެޓަގަރީއަކަށް ބަހާލައިފަ އެވެ. އެއީ އާންމު ކެޓަގަރީ އާއި ސްކޫލް ދަރިވަރުންނަށް ހާއްސަ ކެޓަގަރީގެ އިތުރުން ހާފިޒުންނަށް ހާއްސަ ކެޓަގަރީ އެވެ. ހާފިޒުންގެ ކެޓަގަރީ ފިޔަވައި ދެން ހުރި ކެޓަގަރީތައް ވަނީ ބަލައިގެން ކިޔަވާ ކެޓަގަރީ އާއި ހިތުން ކިޔަވާ ކެޓަގަރީއަކަށް ބަހާލައިފަ އެވެ. އަދި ސްކޫލު ކުދިންގެ ކެޓަގަރީ ފަސް ކީ ސްޓޭޖަކަށް ބަހާލާފައި ވެ އެވެ.

އާންމުކޮށް ހުޅުވާލާފައިވާ ކެޓަގަރީގައި ކުންފުނިތަކާއި މުއާސަސާތަކަށް ވެސް ބައިވެރިވެވެ އެވެ.