ސީރިއާގެ ހަލަބު ސިޓީ އަށް ސަރުކާރު ސިފައިން ދިން ހަމަލާތަކުގައި އިމާރާތަކަށް ލިބިފައިވާ ގެއްލުންތައް އާއްމުންގެ ބަޔަކު ބަލަނީ. --ފޮޓޯ:އޭއެފްޕީ
25 ސެޕްޓެމްބަރ 2016 - 13:48
4 comments
ދިމިޝްގު (ސެޕްޓެމްބަރު 25) - ސީރިއާގެ އުތުރުގެ ހަލަބު ސިޓީގައި ރަޝިޔާ އާއި ސީރިޔާ އިން ބޮޑެތި ޖަރީމާތައް ހިންގަމުންދާ އިރު ބައިނަލްއަގުވާމީ މުޖްތަމައު އޮތީ ހިމޭނުން ކަމަށް ބުނެ ސީރިއާގެ އެންމެ ބޮޑު އިދިކޮޅު ކޯލީޝަނުން ފާޑު ކިޔައިފި އެވެ.
ހަލަބުގެ އިރުމަތީގެ ހިސާބުތަކަށް އިއްޔެ ދިން ވަރުގަދަ ވައިގެ ހަމަލާތަކުގައި 32 މީހުން މަރުވެފައިވާ ކަމަށް އިނގިރޭސި ވިލާތުގައި ހިންގާ ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުންޏެވެ. ހަލަބުގައި ވައިގެ ހަމަލާތައް ވަރުގަދަކޮށްފައިވާ އިރު ސަރުކާރު ސިފައިން ދަނީ އިދިކޮޅު ފަރާތްތަކުގެ ބާރުގެ ދަށުން މުޅި ހަލަބު ސިޓީ އެކުގައި ހިފުމަށް މަސައްކަތް ކުރަމުންނެވެ.
"ސީރިއާ ސަރުކާރާއި ރަޝިޔާ އިން ދަނީ ހަލަބުގައި ބޮޑެތި ވެގެންވާހާ ޖަރީމާތައް ހިންގަމުން،" ސީރިއަން ނޭޝަނަލް ކޯލީޝަނުގެ ނައިބް ރައީސް މުވައްފަގު ނިރަބިޔާ އިސްތަންބޫލްގައި ނޫސްވެރިންނާ ވާހަކަ ދައްކަވަމުން ވިދާޅުވި އެވެ.
ހަލަބު ސިޓީ އަށް ދިން ހަމަލާތަކުގައި ގެއްލުން ލިބުނު ބަޔަކަށް ހޮސްޕިޓަލުގައި ފަރުވާ ދެނީ. --ފޮޓޯ:އޭއެފްޕީ
ގައުމުން ބޭރުގައި އިދިކޮޅު ކޯލީޝަން ހިންގަވާ ޖަވާބު އަބޫ ހަތާބު ވަނީ ހަލަބަށް ދޭ ހަމަލާތައް ހުއްޓާލުމަށް ގޮވާލައްވައިފަ އެވެ. އަދި ހަމަލާތައް ދެމުންދާ އިރު ދުނިޔެ ހިމޭނުން އޮންނާތީ އޭނާ ވަނީ ފާޑު ވިދާޅުވެފަ އެވެ. އަދި އެއީ ބަލައި ގަނެވޭނެ ކަމެއް ނޫން ކަމަށް ވެސް ވަނީ ވިދާޅުވެފަ އެވެ.
ހަތާބު ވިދާޅުވީ ސީރިއާ ސިފައިންނާއި ރަޝިޔާ ސިފައިން ދަނީ އެހީގެ ތަކެތި ހިފައިގެންދާ ވެހިކަލްތަކަށް ހަމަލާދީ ކެމިކަލް ހަތިޔާރު ބޭނުންކޮށް، މީހުން ގިނަ ހިސާބުތަކަށް ބެރެލް ބޮން އަޅަމުން ކަމަށެވެ. މިއީ ބައިނަލްއަގުވާމީ ގޮތުން ވެސް މަނާ ކަމެއް ކަމަށް އޭނާ ވިދާޅުވި އެވެ. ހަލަބުގައި އެހީ ހިފައިގެން ދިޔަ ވެހިކަލްތަކަށް ހޯމަ ދުވަހު ދިން ހަމަލާގައި ވަނީ 20 މީހުން މަރުވެ 18 ވެހިކަލް ހަލާކުވެފަ އެވެ.
ހަލަބު ސިޓީ އަށް ދެމުންދާ ވައިގެ ހަމަލާތަކުގެ ސަބަބުން އެ ސިޓީގައި ދެ މިލިއަނަށް ވުރެ ގިނަ މީހުން ބޯފެނަން ޖެހިފައިވާ ކަމަށް އދ. އިން ވަނީ ބުނެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ތަމް
26 September 2016
ވެރިކަންލިބި ގައުމު ފަނާކުރަމުންދާއިރުވެސް ދުނިޔެ ހިމޭނުން. އެގައުމުގެ ރައްޔިތުންވެސް ތިބީ ހިމޭނުން ވިއްޔަ.
އިބްރަހީމް
25 September 2016
ޝާމްކަރަ. ސީރިޔާ 85 % މީހުންނަކީ ސުންނީ މުސްލިމުން. އެކަމަކު ގައުމުގެ ވެރިކަމާ ބާރު އޮތީ 15% ޙިއްޞާ ކުރާ ޝިޔައީންނަށް. ގައުމުގެ މެޖޯރިޓީ މީހުންތިބީ ނިކަމެތިވެފައި މިއީ އެބުނާ ޑިމޮކްރަސީގެ އދިކޮޅު. އެހެންވެ ސީރިޔާގެ ސުންނީ މުސްލިމުން ތެދުވަން ޖެހުނީ. ޔޫރަޕާ އެމެރިއިން ސުންނީ މުސްލިމުންނަށް ސީރިޔާގެ ވެރިކަމަށް އައުމަކަށް ބޭނުމެއް ނުވާނެ.
ބޮކުބާޑު
25 September 2016
އިރާގާއި، ލީބިޔާގެ ވެރިން ހުޅަގުން ނެތިކޮށްލިގޮތް ދަންނަން އެބަޖެހޭ. މިދެގައުމުގެ ރަށްޔިތުންނަށް ހަމަޖެހޭ ނޭވާއެއް އެބަލެވޭބާ. ނޫނީ މިދެގައުމުއޮތީ ހުޅަނގުގެ ގައުމުތަކާ އެއްފެންވަރަށް އާރާސްތުވެ ތަހުޒީބުވެފަބާ؟ ގައުމަށް ގައްދާރު މީހުންގެ ސަބަބުން އެގައުމެއް ހަލާކުވަނީ. ދުރުތިބެ ތިބާގެ އަޚުން ތިބާމެން ހަލާކުކުރާ ފަގީރުކުރާ އެތައްގައުމެއް މިދުނިޔެމަތީ އެބަވޭ.
ތެދުބަސް
25 September 2016
ހުސް ދޮގު..ޤައުމުން ބޭރުގައި ތިބެ ޤައުމު ހަލާކު ކުރަން ރާވާ މީހުން ޤައުމު ދެކެ ވާނީ ކޮން ލޯތްބެއް ތޯއެވެ؟ ތި ހުރިހާ ކަމެެއްގެ ޒިންމާ އުފުލަން ޖެހޭނީ ތި މީހުން ނެވެ.ތި މީހުނަށް އާމާން ދޭކަށް ބައްޝާރަކަށް ނުޖެހޭނެވެ. މަށް ބައްޝާރު ގޯހެއް ނޫނެވެ.ބަޔަކު ބުނާ އިރަށް ވެރިކަމުން ފައިބާގެން ދިޔަސް ރައްޔިތުނަށް ވާނެ މޮޅެއް ނޯންނާނެ އެވެ. މޮޅު ލިބޭނީ ވެރިކަމަށް ދެން އަރާ މަދު ބަޔަކަށެވެ.