ސަފާރީތަކުން މޫދަށް ކުނި އެޅުން އާންމު ކަމަކަށް ވެފައިވާތީ އެކަން ހައްލުކޮށްދިނުމަށް އެންވަޔަރަމަންޓް މިނިސްޓަރު ތޯރިގް އިބްރާހިމް ލިވަބޯޑު އެސޯސިއޭޝަން އޮފް މޯލްޑިވްސް އަށް މިއަދު ގޮވާލައްވައިފި އެވެ.
"މޯލްޑިވްސް މެރިން އެކްސްޕޯ 2016" ހުޅުވުމަށް ހުޅުމާލޭގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ރާއްޖޭގެ އިގްތިސާދާއި ޓޫރިޒަމް ކުރިއަރުވާ ނަމަ، ތިމާވެށި ހިމާޔަތް ކުރަން ޖެހޭ ކަމަށެވެ.
ކުނީގެ މައްސަލައަކީ ރާއްޖެ އަށް ދިމާވެފައި އޮތް ބޮޑު މައްސަލައަކަށްވުމުން ސަފާރީތަކުން ރައްކާތެރި ގޮތުގައި ކުނި އުކާލުމަކީ މުހިންމު ކަމެއް ކަމަށް އޭނާ ވިދާޅުވި އެވެ.
"ލިވަބޯޑުން އިސް ނަގައިގެން ރައްކާތެރި ގޮތުގައި ކުނި މެނޭޖް ކުރުމުގެ ކަންތައްތައް ކުރިއަށް ގެންދަވާ، ސަރުކާރުން މިތިބީ ތިޔަބޭފުޅުންނާ އެކު މިކަމުގައި މަސައްކަތް ކުރަން،" ތޯރިގް ވިދާޅުވި އެވެ.
ގިނަ ބަޔަކު ބައިވެރިވެގެން ނޫނީ ރައްކާތެރި ގޮތުގައި ކުނި މެނޭޖް ނުކުރެވޭނެކަން ފާހަގަ ކުރައްވާ މިނިސްޓަރު ވިދާޅުވީ އިގްތިސާދު ފުޅާކޮށް، ތިމާވެށި ސާފުތާހިރު ކަމާއެކު ބޭއްވުމަށް ސަފާރީތައް އޮޕަރޭޓް ކުރާ ފަރާތްތަކާ ގުޅިގެން ލިވަބޯޑުން ވެސް އިސް ދައުރެއް އަދާ ކުރެވޭނެ ކަމަށެވެ.
މިނިސްޓަރު ވަނީ ހުޅުމާލެ ފަޅު ތެރެއިން ގިނަ އަދަދެއްގެ ކުނި ފެނިފައިވާތީ އެކަމުގެ ޝަކުވާ ކުރައްވައިފަ އެވެ. ނަމަވެސް އެއީ ކޮން ބަޔަކު އެޅި ކުންޏެއް ކަން މިނިސްޓަރު ފާހަގަ ނުކުރެއްވިޔަސް، އެ ކުންޏަކީ ހުޅުމާލޭގައި އުޅޭ މީހުން އެޅި ކުނި ނޫން ކަމަށް ތޯރިގް ވިދާޅުވި އެވެ.
ހުޅުމާލެ އާއި ބައެއް ރަށްރަށުގެ ފަޅު ތެރޭގައި ގިނަ އަދަދެއްގެ ކުނި ހުންނާތީ ރަށް ރަށުގައި ދިރިއުޅޭ ގިނަ ބަޔަކު ހިތްހަމަނުޖެހުން ފާޅުކުރެ އެވެ. ބައެއް މީހުން ގަބޫލު ކުރާ ގޮތުގައި އެއީ ސަފާރީތަކުން އުކާލާ ކުންޏެވެ.