އެމެރިކާގައި ސިނގިރެޓް ވިއްކާ އުމުރު 21 އަށް މަތިކޮށްފި

އަހުމަދު އަދްޝަން، މިހާރު

22 ޑިސެމްބަރ 2019 - 07:13

އެމެރިކާގައި ސިނގިރެޓާއި ދުންފަތުގެ އިސްތިއުމާލުކުރަން ބޭނުންކުރާ އާލާތްތައް ވިއްކާ އުމުރު 21 އަށް މަތިކޮށްފި އެވެ.

ދުންފަތް ބޭނުންކުރުމާއި ވިއްކުމާ ބެހޭ ގާނޫނަށް ގެނައި އިސްލާހު ރައީސް ޑޮނަލްޓް ޓްރަމްޕް ތަސްދީގުކުރައްވާފައި ވަނީ ހުކުރު ދުވަހު އެވެ. ޓްރަމްޕް ވިދާޅުވި ގޮތުގައި ދުންފަތާ ގުޅުން ހުރި ބާވަތްތައް ވިއްކާ އުމުރު 18 އިން 21 އަށް ބަދަލުކުރުމަކީ ވަރަށް ހެޔޮ ބަދަލަކަށްވާނެ އެވެ. އަދި މީގެ ސަބަބުން އެ ވަބާއިން ކުރިމަތިވާ މައްސަލަތަކާ ދެކޮޅަށް އެމެރިކާ އިން ކުރާ މަސައްކަތްތަކަށް ކުރިއެރުންތަކެއް ލިބޭނެ ކަމަށް ވިދާޅުވި އެވެ.

އީ-ސިނގިރެޓާ އެކު މި ފަހުން ބޮޑުވެފައިވާ ވޭޕިންއާ ގުޅުން ހުރި ސިއްހީ މައްސަލަތަކާއި މި ވަބާގައި ޖެހޭ ކުދިންގެ އަދަދު ވެސް އިތުރުވަމުންދާތީ އެމެރިކާގެ 19 ސްޓޭޓެއްގައި ކުރިން ވެސް ވަނީ އުމުރުން 21 އަހަރުގެ ދަށުގެ މީހުންނަށް ދުންފަތް ވިއްކުން މަނާކޮށްފަ އެވެ.

I will be signing our 738 Billion Dollar Defense Spending Bill today. It will include 12 weeks Paid Parental Leave, gives our troops a raise, importantly creates the SPACE FORCE, SOUTHERN BORDER WALL FUNDING, repeals “Cadillac Tax” on Health Plans, raises smoking age to 21! BIG!
— Donald J. Trump (@realDonaldTrump) December 20, 2019

ދުންފަތާ ދެކޮޅަށް މަސައްކަތްކުރާ ޖަމިއްޔާ ކެމްޕޭން ފޮ ޓޮބޭކޯ-ފްރީ ކިޑްސް އިން ބުނެފައިވާ ގޮތުގައި 21 އަހަރުން ދަށުގެ މީހުންނަށް ދުންފަތާ ގުޅުން ހުރި އެއްޗެހި ވިއްކުން މަނާކޮށްފައިވާ ސްޓޭޓްތަކަކީ އާކަންސަސް، ކެލިފޯނިއާ، ކަނެކްޓިކަޓް، ޑެލަވެއާ، ހަވާއީ، އިލިނޮއިސް، މެއިން، މޭރީލޭންޑް، މެސެޗޫސެސް، ނިއު ޖާޒީ، ނިއު ޔޯކް، އޮހައިއޯ، އޮރެގަން، ޕެންސިލްވޭނިއާ، ޓެކްސަސް، އަޓާ، ވާމަންޓް، ވާޖިނިއާ އަދި ވޮޝިންޓަނެވެ.

This is a major step in protecting the next generation of children from becoming addicted to tobacco products. Tobacco products, including e-cigarettes, should never be marketed to, sold to, or used by kids.
— Dr. Stephen M. Hahn (@SteveFDA) December 21, 2019

އެމެރިކާގައި ވޭޕިންގެ މައްސަލަ ބޮޑުވެ، ފުއްޕާމޭ ހަލާކުވެ މަރުވާ މީހުންގެ އަދަދު އިތުރުވަމުންދާތީ މިދިޔަ ސެޕްޓެމްބަރު މަހުގެ ތެރޭގައި ޓްރަމްޕް ވަނީ އެކި ރަހަތަކުގެ ދިޔާ އެއްޗެހި އަޅައިގެން ބޭނުންކުރާ އީ-ސިނގިރެޓް މަނާކުރައްވާނެ ކަމުގެ އިޝާރާތްތަކެއް ވެސް ދެއްވައިފަ އެވެ.

We appreciate Congress and @POTUS’ dedication to reducing the disease and death caused by tobacco use and preventing young people from ever becoming addicted to nicotine. More details will be forthcoming as we update our regulations to carry out this provision of law.
— Dr. Stephen M. Hahn (@SteveFDA) December 21, 2019

އެހެންވެ މިކަމާ ގުޅުން ހުރި މަސައްކަތްތައް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން މިހާރު އަންނަނީ ކުރަމުންނެވެ.

އުމުރުން 21 އަހަރުގެ ދަށުގެ މީހުންނަށް ސިނގިރެޓް ވިއްކުން މަނާކުރުމާ ގުޅިގެން އެފްޑީއޭގެ ކޮމިޝަނަރު ޑރ. ސްޓެފެން އެމް ހާން ވެސް ވަނީ އެކަމަށް މަރުހަބާ ވިދާޅުވެފަ އެވެ. އޭނާ ވިދާޅުވި ގޮތުގައި މިއީ ކުރިމަގުގެ ޖީލުތަކުގެ ރައްކާތެރިކަމަށްޓަކައި އެޅުނު މުހިއްމު ފިޔަވަޅެކެވެ.