އަލް އަސަދު ވައިގެ މަރުކަޒަށް އީރާނުން ދިން މިސައިލް ހަމަލާގައި، ޑްރޯން ޕައިލެޓުންނާއި އޮޕަރޭޓަރުން ތިބޭ އިމާރާތަށް ގެއްލުން ލިބިފައި. --ފޮޓޯ:ސީއެންއެން
17 ޖެނުއަރީ 2020 - 11:55
5 comments
ވޮޝިންޓަން (ޖެނުއަރީ 17) - އިރާގުގައި އެމެރިކާ ސިފައިން ތިބޭ ވައިގެ މަރުކަޒުތަކަށް އީރާނުން މިދިޔަ ހަފުތާގައި ދިން މިސައިލް ހަމަލާތަކުގައި އެމެރިކާ ސިފައިންގެ 11 މީހުން ޒަޚަމްވެފައިވާ ކަމަށް ޔޫއެސް ސެންޓްރަލް ކޮމާންޑުގެ ތަރުޖަމާން ކެޕްޓަން ބިލް އާބަން ވިދާޅުވެއްޖެ އެވެ.
އެމެރިކާ އިން ކުރިން ބުނަމުން ދިޔައީ މިސައިލް ހަމަލާތަކުގައި އެއްވެސް މީހަކަށް ގެއްލުމެއް ނުލިބޭ ކަމަށެވެ.
"ޖެނުއަރީ 8 ވަނަ ދުވަހު އިރާގުގެ އަލް އަސަދު ވައިގެ މަރުކަޒަށް އީރާނުން ދިން ހަމަލާގައި އެމެރިކާ ސިފައިންގެ އެއްވެސް މީހަކު މަރު ނުވި ނަމަވެސް، ހަމަލާގައި ޒަޚަމްވި ބައެއް މީހުންނަށް ވަނީ ފަރުވާ ދޭންޖެހިފައި،" ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވެ އެވެ.
ހަމަލާ ދިން އިރު އަލް އަސަދު ވައިގެ މަރުކަޒުގައި ތިބި އެމެރިކާ ސިފައިންގެ 1،500 މީހުންގެ ތެރޭން ގިނަ މީހުން ތިބީ ބިންގަރާހަށް ވަދެ ހިމާޔަތް ހޯދައިގެންނެވެ. ބޭރުގައި ތިބީ ޑްރޯން އޮޕަރޭޓަރުންނާއި ޓަވާ ގާޑުން ފަދަ މަދު ބައެކެވެ.
އެމެރިކާގެ އަސްކަރިއްޔާ އިން ކުރިން ބުނެފައި ވަނީ ހަމަލާގައި ވައިގެ މަރުކަޒަށް ބޮޑެތި ގެއްލުންތައް ލިބުނު ނަމަވެސް އެއްވެސް މީހަކު ޒަޚަމް ނުވާ ކަމަށެވެ. ހަމަލާ ދިން ދުވަހު ރައީސް ޑޮނަލްޑް ޓްރަމްޕް ވެސް ވިދާޅުވެފައި ވަނީ އެމެރިކާގެ އެއްވެސް ހަނގުރާމަވެރިއަކަށް އަނިޔާ ނުވާ ކަމަށެވެ.
ނަމަވެސް އާބަން ވިދާޅުވީ ހަމަލާ އަށް ފަހު އެސެސްމަންޓް ހެދުމުން، ބައެއް ސިފައިން ޒަޚަމްވެފައިވާ ކަމަށާއި އެ މީހުންނަށް ފަރުވާ ދިނުމަށް އިރާގުން ބޭރަށް ގެންގޮސްފައިވާ ކަމަށެވެ. މި ގޮތުން 8 ސިފައިން ވަނީ ފަރުވާ އަށް ޖަރުމަނުގެ ލޭންޑްސްޓުލް ރީޖަނަލް މެޑިކަލް ސެންޓަރަށް ބަދަލުކޮށްފަ އެވެ. އަދި އިތުރު ތިން ސިފައިން ވަނީ ކުވޭތުގެ ކޭމްޕް އަރިފްޖާން އަށް ބަދަލުކޮށްފަ އެވެ.
"ފަރުވާ ދޭ ސިފައިންގެ ސްކްރީނިން ހެދުމަށް ފަހު އެ މީހުން ފިޓް ނަމަ އިރާގަށް އަލުން ފޮނުވާނެ،" އާބަން ވިދާޅުވި އެވެ.
އިރާގުގެ ހުޅަނގުގެ އަލް އަސަދު މަރުކަޒަށް ދިން ހަމަލާތަކުގެ އިތުރުން އަރްބީލްގެ މަރުކަޒަށް ވެސް ވަނީ މިސައިލް ހަމަލާދީފަ އެވެ. އެމެރިކާ ސިފައިންގެ އިތުރުން ކޯލިޝަންގެ ލަޝްކަރުގައި ހިމެނޭ އެހެން ގައުމުތަކުގެ ސިފައިން ވެސް އަރްބީލްގައި ތިބެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދަރަނި ދަންތުރަ
18 January 2020
ހުސްނޫ ކަލޭތީ ކާފަރުންގެ ސަޕޯޓަރެއްދޯ
ކާލާ މަންނަ
17 January 2020
ކަލޭމެން ދައްކާ ވާހަކަ ދުވަހަކުވެސް ގަބޫލެއް ނުކުރާނަން. އެއްދުވަހު ބުނާނެ ހާލު ފޮޅިއޭ. ޢަނެއްދުވަހު ބުނާނެ ވެލާ ފޮޅިއޭ . އަސްލު މަރުވިވަރު އީރާނުން އެދުވަހު ބުނީ. އެއީ 80 މީހުން. އެހެންވެ ބިރުން ރައްދު ހަމަލާވެސް ދޭން ނުކެރުނީ. އެއީ އަދި ބާވެ މުސްކުޅިވެފަހުރި 10 ވަރަކަށް މިސައިލުން ވީވަރު. އަދި ޒަމާނީ ފަހުގެ އެއްޗެއް ވައްޓާލިނަމަ ނެޕީ ޖަހަން ޖެހުނިސް.
ޔ
17 January 2020
ތިއީ އީރާނުގެ އެންމެ އާދައިގެ މިސައިލް ފާތިހް 313 އަދި ގިއާމް ބެލެސްޓިކް މިސައިލްގެ ބާރުހުރި މިންވަރު.. އީރާން އަތުގައި ނުރައްކަލުން ފުރިގެންވާ އެތެއް ވައްތަރެއް ގެ މިސައަލްތައް ހުރޭ...އީރާނަކީ ގޮތް ނޭގޭ ބައެކޭ ދުނިޔެ އަބަދުވެސްބުނޭ..ނިއުކްލިއާ ހުރި ތޯ ނެއްތޯ ވެސް އެގެނީކީނޫން...އީރާނުން ދުނިޔެއަށް ނުދައްކާ އެތެއްބާވަތެއް ގެ މިސައިލް ހުރޭ...ކާކަށް އެގެނީ އެމަރިކާ ގެ ފަސްގަނޑައް ފޮނުވާލެވޭ ވަރުގެ މިސައިލް އީރާން އަތުގަ ނުހުން ނާނެކަން.. ???
ހުސްނޫ
17 January 2020
ތިޔަ މިސައިލް ކޮންޓްރޯލްނެތިގެން ގޮސް ފްލައިޓަކަށް އަރާ އެތައް ބައެއްގެ ފުރާނަ ދުއަވާލީ.
ރޫހާނީ.
18 January 2020
ހުސްނޫ! ފަސިންޖަރުން އުފުލާ ބޯޓަށް މިސައިލް އެރީ ކޮންޓުރޯލުން ނެއްޓިގެނެއް ނޫން. ރޭގަނޑުވީމަ ރާޑަރުން މިސައިލެއްކަމަށް ދެއްކީމަ މިސައިލެއްކަމަށް ގޮއްވާލީ. ތިއަބުނާ އެމެރިކާއިން އޮޅިގެން ރޯމާ ދުވާލު ކިތައް ބޯޓަށް ހަމަލާދިންތޯ ބަލާބަލަ. މުޅިދުނިޔެ ފަނާކޮށްލާފަދަ ނުރައްކާތެރި ހަތިއާރު ހުއްޓޭ ކިޔާފަ އިރާގަށް އެރީ. ލޮނުމެދު ފަޓާހެއްވެސް އެތާކުން ނުފެނުން. ދެން ކޮބާ އިރާނުގެ ޓެކްނޮލޮޖީއަށްވުރެ އެމެރިކާގެ ޓެކްނޮލޮޖީ މޮޅުވެފަ.