ނާހިލަށް ބޮޑު އުފަލެއް! އަށް މާއްދާ އިން ވެސް އޭ ސްޓާ!

އޯ ލެވެލްގައި އަށް މާއްދާއިން އޭ ސްޓާ ހޯދައި، ރާއްޖެއިން ފަހުރުވެރި އެއް ވަނަ ހޯދި މަދު ދަރިވަރުންގެ ތެރޭގައި ހިމެނޭނެ ކަމަށް މުހައްމަދު ނާހިލް އަހުމަދު އެއްގޮތަކަށް ވެސް ހިއެއް ނުކުރެ އެވެ. ނަމަވެސް ތައުލީމީ ގޮތުން އަބަދުވެސް ވިދަވިދާ ހުރި އެ ދަރިވަރު ވަނީ، މުޅި ރަށާއި އަތޮޅު ފަހުރުވެރިކޮށް ރަން ވަނަ ހާސިލްކޮށްފަ އެވެ.

ގަލޮޅު މަދަރުސާ އިން ނާސަރީ ނިންމުމަށް ފަހު، އުފަން ރަށް، ބ. އޭދަފުއްޓަށް ބަދަލުވެ، ގްރޭޑު 10އާ ހަމައަށް ކިޔެވުން ނިންމާލީ އެ ރަށުގައި ހުންނަ އަތޮޅު ތައުލީމީ މަރުކަޒުގެ، މިިދިޔަ އަހަރުގެ އެންމެ މޮޅު ދަރިވަރުގެ މަގާމާ އެކުގަ އެވެ.

ނާހިލް (ކ)، ސްކައުޓު ހަރަކާތެއްގެ ތެރެއިން.

ނާހިލް ބުނީ ކޮންމެ ރެއަކު ކަހަލަ ގޮތަކަށް 9:00-9:30 އާ ދެމެދު ނިދަން އޮށޯތުމަށް ފަހު ދަންވަރު ތެދުވެ، ފިލާވަޅު ދަސްކުރަން ފަށާ ކަމަށެވެ.

"ގްރޭޑު 8ގައި މި ފާހަގަވީ ދަންވަރު ހޭލައިގެން ފޮތްކީމަ މާ ފަސޭހައިން ދަސްވާކަން. ދަންވަރު ހޭލައިގެން ހަތަރެއް ޖަހަންދެން ފޮތް ކިޔާފައި ބްރޭކެއް ނަގާފައި، އަނެއްކާވެސް ފަތިސް ނަމާދު ކޮށްލައިގެން ކިޔަވަން ފަށަނީ. އެގޮތަށް ކިޔެވީމަ ވަރަށް ފަސޭހަވި،" ނާހިލް ބުންޏެވެ.

ސްކޫލުގެ ހެލްތު ކްލަބުގެ ރައީސަކަށް ވެސް މިދިޔަ އަހަރު ހުރި ދަރިވަރު ބުނި ގޮތުގައި އޭނާއަށް އެންމެ އުނދަގޫވީ އިސްލާމާއި ދިވެހި މާއްދާ އެވެ. އެ ދެ މާއްދާގެ ނަތީޖާ ރަނގަޅުކުރަން، ގްރޭޑު އަށަކުން ފަށައިގެން ދިވެހިން ޓިއުޝަން ނެގިއިރު ގްރޭޑު 10 ގައި އިސްލާމް މާއްދާއިން ޓިއުޝަން ނެގި އެވެ. އޭގެ އިތުރުން ސީނިއަ ދަރިވަރުން ކައިރި އަހައިގެން ވެސް މާއްދާތަކުގެ މައުލޫމާތު އޮޅުންފިލުވި އެވެ.

ނާހިލް، އޭނާގެ މަންމަ އާއި ބައްޕަ އަދި ކޮއްކޮއާ އެކު

ޕައިލެޓަކަށް ވުމުގެ ހުވަފެންތައް ދެކެމުން އަންނަ ނާހިލް ބޭނުންވަނީ އޭ ލެވެލް ވެސް ރަށުގައި ހުރެގެން ކިޔަވާށެވެ.

އޭނާ ބުނީ ކިތައްމެ ފެންވަރު ރަނގަޅު ސްކޫލަކަށް ދިޔަސް އެކަމެއްގައި އޮންނާނީ ކުއްޖާގެ ޝައުގުވެރިކަން ކަމަށެވެ. އެހެންވެ އެކަމުގައި މުހިއްމީ ދަރިވަރުން ކިޔަވާ ސްކޫލެއް ނޫން ކަމަށް އޭނާ ބުންޏެވެ.