ކުޑަކުދިންނަށް ޖިންސީ ގޯނާކުރުން ފަސޭހައިން ސާބިތުކުރެވޭ ގޮތަށް ސުޕްރީމް ކޯޓުން ކަނޑައަޅައިފި

ކުޑަކުދިންނަށް ޖިިންސީ ގޯނާކުރުމުގެ މައްސަލަތަކުގައި ކުށް ސާބިތުވާން ބޭނުންވާ ހެކީގެ މިންގަނޑު ކުރިން ކޯޓުތަކުން ބަލަމުން އައީ ރަނގަޅަށް ނޫން ކަމަށާއި އެފަދަ މައްސަލަތަކުގައި ހެކީގެ މައިގަނޑު އަސާސަކީ ކުއްޖާގެ ހެކިބަސް ކަމަށް ސުޕްރީމް ކޯޓުން އިއްޔެ ކަނޑައަޅައިފި އެވެ.

ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްސަ އުސޫލުތަކަށް އަމަލު ކުރުމުގެ ގާނޫނުގައި 12 ބާވަތެއްގެ ހެކި ބަޔާން ކުރުމަށް ފަހު، އޭގެ ތެރެއިން ފަސް ހެއްކެއް ލިބުމުން ކުށް ސާބިތުވީ ކަމަށް ބަލަންޖެހޭ ކަމަށް ބުނެފައިވެ އެވެ. އެކަމަކު ހައި ކޯޓުން 2016 ގައި ކަނޑައަޅާފައިވަނީ އޭގެ ތެރެއިން އަނިޔާލިބޭ ކުއްޖާ އެކި ފަރާތްތަކަށް ދޭ ބަޔާނަކީ ވަކި ހެކިތަކުގެ ގޮތުގައި ނުގުނޭނެ ކަމަށެވެ.

އެގޮތުން މައިންބަފައިންނަށް ނުވަތަ ގާތްތިމާގެ މީހަކަށް ނުވަތަ ރަހުމަތްތެރިއަކަށް ނުވަތަ ސިއްހީ ޚިދުމަތްތެރިއަކަށް ނުވަތަ ފުލުހަކަށް ދޭ ބަޔާނާއި ކަން ހިނގައިދިޔަ ގޮތް ބަޔާންކޮށް އެ ކުއްޖާ ދެ ބަޔާނާއި މައްސަލަ ބަލާ ފަރާތުން އިންޓަވިއުކުރުމުން އެ ކުއްޖާ ކިޔައިދޭ ވާހަކަތައް އެއީ ކުށް ސާބިތުކުރަން ބޭނުންވާ ފަސް ހެކި ހަމަކުރުމަށްޓަކައި ވަކިވަކި ހެކިތަކުގެ ގޮތުގައި ނުގުނޭނެ ހެކިތަކެއް ކަމަށެވެ.

ކުއްޖާ އެކި ފަރާތްތަކަށް ކިޔައިދޭ ކިޔައި ދިިނުން އެއީ ވަކި ހެކިތަކެއްގެ ގޮތުގައި ބެލޭނެ ކަމަށް ސުޕްރީމް ކޯޓުން ކަނޑައެޅީ ދޮންދަރިއަކާ ބެހުނު މީހަކު ޖަލަށްލާން އެ ކޯޓުން އިއްޔެ ކުރި ހުކުމުގަ އެވެ.

ހައި ކޯޓުގެ ނިންމުމަކާ އެކު، ގާނޫނުގައި ބުނާ ނިޒާމު ރޫޅިގެންދިޔަ

ތިން ފަނޑިޔާރުންގެ އިއްތިފާގުން ކުރެއްވި އެ ހުކުމުގައިވާ ގޮތުން އަނިޔާލިބޭ ކުއްޖާ އެކި ފަރާތްތަކަށް އެ ވާހަކަަ ކިޔައިދޭ ކިޔައިދިނުމަކީ ވަކިވަކި ހެކިތަކެއްގެ ގޮތުގައި ނުބެލެވޭނެ ކަމަށް ހައި ކޯޓުން ކުރިން ކަނޑައެޅުމާ އެކު، ކުށް ސާބިތު ކުރުމުގެ މިންގަނޑު ލުއިކުރަން އެ ގާނޫނުގައި ކަނޑައެޅި އުސޫލު ރޫޅިގެން ދިޔަ އެވެ. އަދި އޭގެ ފަހުން އަނެއްކާވެސް ކުޑަކުދިންނަށް ޖިންސީ ގޯނާކުރުމުގެ ކުށްތައް ސާބިތުކުރަން އުނދަގޫ ވެގެން ދިޔަ ކަމަށް ވެސް އެ ހުކުމުގައިވެ އެވެ.

"ކުއްޖާ ކިޔައިދޭ ކިޔައިދިނުން މައިގަނޑު އަސާސަކަށް ބަލައިގެން މަައްސަލަ ސާބިތުވޭތޯ ނުވަތަ ނުވޭތޯ ވަޒަން ކުރުމަށް ކަނޑައެޅިފައިވާ މި ނިޒާމު ރޫޅިގެން ދިއުމުގެ ނަތީޖާއެއްގެ ގޮތުން، އެ ގާނޫނު ހެދުމުގެ ކުރިން ދިމާވެފައި އޮތް މައްސަލަަ ކަމުގައިވާ ކުޑަކުދިންނަށް ޖިންސީ ގޯނާކުރާ މީހުންގެ މައްޗަށް ކުށް ސާބިތުކުރަން އަނެއްކާވެސް އުނދަގޫވެގެން ގޮސްފައިވާ ކަން އެ ފަހުން ކޯޓުތަކުން ނިންމި ގަޒިއްޔާތަކުން އެނގެ އެވެ." އެ ހުކުމުގައިވެ އެވެ.

ކުށް ސާބިތު ކުރުމަކީ "އެއް ނަމްބަރު އަނެއް ނަމްބަރާ އެއްކޮށްގެން ނެރެވޭ ހިސާބު ނަމްބަރެއްގެ ގޮތުގަައި ކުރެވޭ ކަމެއް ނޫން" ކަން ފާހަގަކޮށް، އެ ހުކުމުގައިވަނީ ވަކި އަދަދަކަށް ހެކި ހަމަކުރުމުގެ ބަދަލުގައި ކުޑަކުއްޖާގެ ހެކިބަހަކީ އާދަޔާ ޚިލާފަށް ތެދު ކަމަށް ގަބޫލު ކުރެވޭ ނަމަ، އެ ހެކިބަހުގެ މައްޗަށް ދައުވާ ސާބިތުކުރެވިދާނެ ކަމަށެވެ. ކުރިއަރާފައިވާ ގައުމުތަކުގައި ވެސް އެގޮތަށް އަމަލުކުރަމުން އަންނަ ކަމަށް ބޭރުގެ ބައެއް ކޯޓުތަކުގެ ނިންމުންތަކާ ހަވާލާދީ އެ ހުކުމުގައިވެ އެވެ.

ހެކިތައް މުޅިން ވަކިވާކަށް ނުޖެހޭ، މައިގަނޑު އަސާސަކީ ކުއްޖާގެ ބަސް

އެ ހުުކުމުގައިވަނީ ކުޑަކުދިންނަށް ޖިންސީ ގޯނާކުރުމަކީ ސިއްރުން ހިނގާ ކަމަކަށް ވާތީ ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްސަ އުސޫލުތަކަށް އަމަލު ކުރުމުގެ ގާނޫނުގެ މަގްސަދަކީ ވެސް އަނިޔާލިބޭ ކުއްޖާގެ ހެކިބަސް މައިގަނޑު އަސާސަކަށް ބަލައިގެން ކުށް ސާބިތުވޭތޯ ނުވަތަ ނޫންތޯ ބެލުން ކަމަށެވެ. އެ ގާނޫނުގައި 12 ބާވަތެއްގެ ހެކި ވަކިވަކިން ބަޔާންކޮށްފައިވަނީ އެ ކުއްޖާގެ ހެކިބަހަކީ އާދަޔާ ޚިލާފަށް ތެދު ކަމަށް ގަބޫލު ކުރެވޭ ހެކިބަހެއްކަން ނުވަތަ ނޫންކަން ކަށަވަރުކުރާ ވަސީލަތެއްގެ ގޮތުގަައި ކަމަށް އެ ހުކުމުގައިވެ އެވެ.

އެހެންވެ، ކުއްޖާ ކިޔައިދޭ ކިޔައި ދިނުން މައިގަނޑު އަސާސަކަށް ބަލައިގެން އަދި ދެން ހުރި ހެކިތަކުން އެ ކުއްޖާގެ ބަހަށް ބާރު ލިބޭ ނަމަ އެ ބާވަތުގެ ކުށްތައް ސާބިތު ކުރެވިދާނެ ކަމަށް އެ ހުކުމުގައިވެ އެވެ. އެކަމަކު ހަމައެކަނި އެ ކުއްޖާގެ ބަހަށް ބިނާކޮށް ކުށް ސާބިތު ކުރެވޭނީ އެއީ އާދަޔާ ޚިލާފަށް ތެދު ކަމަށް ގަބޫލުކުރެވޭ ހިނދެއްގައި ކަމަށް އެ ހުކުމުގައިވެ އެވެ.

"ހެކި ވަކިވަކިން ލިސްޓް ކޮށްފައި އެ ވަނީ ކުއްޖާގެ ހެކިބަހަކީ އާދަޔާ ޚިލާފަށް ތެދު ކަމަށް ގަބޫލު ކުރެވޭ ހެކިބަހެއްތޯ ނުވަތަ ނޫންތޯ ކަށަވަރު ކުރުމުގެ ގޮތުން ފަނޑިޔާރުންނަށް ބޭނުން ކުރެވިދާނެ ވަސީލަތެއްގެ ގޮތުގަ އެވެ. ނުވަތަ ކުޑަކުއްޖާ ދީފައިވާ ހެކިބަަސް ކޮރޮބޮރޭޓް ކުރުމުގެ ވަސީލަތްތަކެއްގެ ގޮތުގަ އެވެ. އެ 12 ބާވަތުގެ ހެއްކަކީ އެކަތި އަނެކައްޗާ މުޅިން ވަކިވެފައިވާ މުސްތަގިއްލު ހެކީގެ ގޮތަކު ނޫނެވެ." ފަހުގެ ތާރީޚެއްގައި ސުޕްރީމް ކޯޓުން ނިންމި، ކުޑަކުދިންނަށް ޖިންސީ ގޯނާކުރުމުގެ ފުރަތަމަ މައްސަލައިގެ އެ ހުކުމުގައިވެ އެވެ.

އެ ހުކުމުގައިވާ ގޮތުން ކުޑަކުއްޖާގެ ހެކިބަހަކީ އާދަޔާ ޚިލާފް ތެދެއް ކަމަށް ގަބޫލު ކުރެވޭތޯ ކަށަވަރު ކުރުމުގައި ހެކިބަސް އެތެރެ ފުށުންނާއި ބޭރު ފުށުން އެއްގޮތްވޭތޯ އާއި އެ ކުއްޖާގެ އަޚުލާގާއި އުޅުން ހުންނަ ގޮތާއި އެފަދަ ތުހުމަތެއް މީހެއްގެ މައްޗަށް ކުރުމުގައި ނުބައި ނިޔަތެއް އޮތްތޯ ބެލިދާނެ އެވެ.

ފަނޑިޔާރު ހުސްނުއްސުއޫދު ލިޔުއްވި އެ ހުކުމަށް، އެ މައްސަލަ ބެއްލެވި ބެންޗުގައި ހިމެނިވަޑައިގަތް ފަނޑިޔާރު އައިޝާ ޝުޖޫން އާއި ފަނޑިޔާރު މަހާޒް އަލީ ޒާހިރު ވެސް ތާއީދު ކުރައްވާފައިވެ އެވެ. އެކަމަކު ފަނޑިޔާރު ޝުޖޫންގެ ރައުޔުގައި އިތުރަށް ފާހަގަ ކުރައްވާފައިވަނީ ކުއްޖާގެ ބަހަކީ ތެދެއްތޯ ކަށަވަރު ކުރުމުގައި އެ ކުއްޖާގެ އަޚްލާގަށް ބެލިގެން ނުވާނެ ކަމަށާއި ވަކި ގޮތަކަށް ކުއްޖެއްގެ އުޅުން ހުރުމަކީ އެފަދަ އަމަލެއް އެ ކުއްޖާއާ މެދު ހިންގަންޖެހޭނެ ސަބަބެއް ނޫން ކަމަށެވެ.

ފަނޑިޔާރު މަހާޒްގެ ރައުޔުގައި އިތުރަށް ފާހަގަކުރައްވާފައިވަނީ އެފަދަ މައްސަލަތަކުގައި ތުހުމަތު ކުރެވޭ މީހާގެ ހައްގުތަކަށް ރައްކާތެރިވުމާ އެކު ބައެއް ކަންކަން ފަނޑިޔާރުން ކަށަވަރުކުރަން ޖެހޭނެ ކަމަށެވެ. އެގޮތުން އެއީ ގާނޫނާ އެއްގޮތަށް ހޯދި ހެކިތަކެއްތޯ އާއި ހެކިތަކާއި މައްސަލައާ ހުރި ގުޅުމާއި ހެކިތަކަށް ބާރު ލިބޭ މިންވަރާއި ހެކި ހޯދި ގޮތުން ނުވަތަ އެ ނޫން ވެސް ސަބަބަކާ ހެދި ހެކީގެ ބާރު ދަށްވާ ސަބަބެއް އޮތް ކަން ނުވަތަ ނޫންކަން ކަށަވަރުކުރަން ޖެހޭނެ ކަމަށް ފަނޑިޔާރު މަހާޒް ފާހަގަކުރައްވާފައިވެ އެވެ.