ހަމަދު ސްކޫލަށް މިދިޔަ އަހަރު ޒިޔާރަތްކުރި އައްޑޫ ހައި ސްކޫލުގެ ދަރިވަރުންނަށް މަރުހަބާ ކިޔަނީ.-- ފޮޓޯ: ހަމަދު ސްކޫލު
18 ޖޫން 2020 - 13:39
6 comments
ދެކުނުގެ ތިން ސްކޫލެއް ގުޅިގެން އޭ ލެވެލް ދަރިވަރުންނަށް ކިޔަވައިދޭން ފަށައިފި އެވެ.
އައްޑޫ ހައި ސްކޫލާއި ގދ. އަތޮޅު ތައުލީމީ މަރުކަޒު އަދި ލ. ގަމުގައި ހުންނަ ހަމަދު ސްކޫލު ގުޅިގެން އެ ތިން ސްކޫލުގެ 388 ދަރިވަރަކަށް އޮންލައިންކޮށް ކިޔަވައިދެމުން އަންނަނީ މިދިޔަ އާދިއްތަ ދުވަހުން ފެށިގެންނެވެ.
ފައުންޑޭޝަނުން ފެށިގެން ގްރޭޑު 12އާ ހަމައަށް ކިޔަވައިދޭ ހަމަދު ސްކޫލުގެ ޕްރިންސިޕަލް މުހައްމަދު ޝައުކަތު ވިދާޅުވީ ހަފުތާއަކު ކޮންމެ ދުވަހަކު ހަތަރު ގަޑިއިރަށް ކިޔަވައިދެމުން އަންނަ ކަމަށެވެ. ކަނޑައަޅާފައިވާ ޝެޑިއުލާ އެއްގޮތަށް ބިޒްނަސް އަދި ސައިންސް ސްޓްރީމްގެ ދަރިވަރުންނަށް ކުރިއަށް އޮތް ތަނުގައި ވެސް އެ ފިލާވަޅުތައް ނެގުން ކުރިއަށް ގެންދާނެ ކަމަށް އޭނާ ވިދާޅުވި އެވެ.
ގުޅިގެން ކިޔަވައިދިނުމުގެ މި ޕްރޮގްރާމުގައި ކިޔަވައިދިނުމުގެ ކަންކަން ރޭވުމުގައި އިސް ރޯލެއް އަދާކުރަނީ، މަތީ ސާނަވީގައި ދުނިޔޭގެ ފެންވަރުން ވެސް ފާހަގަކޮށްލެވޭ ކާމިޔާބީތަކެއް ހޯދާފައިވާ އައްޑޫ ހައި ސްކޫލުންނެވެ.
"ސްކޫލުތަކުގައި ތިބި ފެންވަރު ރަނގަޅު ޓީޗަރުން ސެޝަންތައް ނަގައިދޭނީ. އެ ސްކޫލަކުން ކިޔަވައިދޭނެ ޓީޗަރުން ކަނޑައަޅާނީ އެ ސްކޫލަކުން. ސްކޫލުތައް ހުޅުވިއަސް މިގޮތަށް ކިޔަވައިދިނުން ދެމިގެންދާނެ. މިކަމުގައި އެޑިއުކޭޝަން މިނިސްޓްރީން ދެއްވި ހިތްވަރު ފާހަގަކޮށްލަން،" ޝައުކަތު ވިދާޅުވި އެވެ.
އެ ދަރިވަރުންނަށް ކިޔަވައިދޭން ބޭނުންކުރަނީ ގޫގުލް މީޓެވެ. ގޫގުލް ކްލާސްރޫމުގައި މަސައްކަތް ހަވާލުކުރެ އެވެ.
ދެކުނުގައި ފާހަގަކޮށްލެވޭ މި ތިން ސްކޫލުން މީގެ ކުރިން ވެސް ވަނީ ކިޔެވުމާ ގުޅޭ ކަންކަމުގައި ގުޅިގެން ހަރަކާތްތަކެއް ހިންގައިފަ އެވެ. އެގޮތުން ތަޖުރިބާ ހޯދަން ބޭއްވި ދަތުރުތައް ފާހަގަކޮށްލެވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދާރިޘް
18 June 2020
މިތިން ސުކޫލަށް އެކިކަންކަމުގަ އެކިފަހަރުމަތިންދެވުނު މީހަކަށްވާތީ ބުނެލަން. އައްޑޫ ހައިސުކޫލްއަކީ ބޮޑެތިކުދިން ކިޔަވާތަނަކަށްވާތީ މެނޭޖުކުރަން ފަސޭހަ ރަނގަޅު ނަތީޖާ ހޯދާތަނެއް.މީގެ މަދުއަހަރުތަކެއް ކުރިއަށްޖެހިލާއިރު ހަމަދު ސުކޫލުގެ ނަން އިވުނަސް މީހުން ހޭނެތޭވަރުވޭ ބިރުން.މިހާރު އެސުކޫލުކަންކަން ރަނގަޅަށް މިފެންނަނީ. ގދ.މަރުކަޒު ވަރަށް ވިދުންގަދަކޮށް ކުރިންފެނުނީ.އެސުކޫލް އެބަޖެހޭ އެފަޚުރުވެރި މާޒީ އަނބުރާ ހޯދަން އިތުރަށް މަސައްކަތްކުރަން.
9091
18 June 2020
ޕަބްލިސިޓީ ހޯދަންވިޔަސް ފޮޓޯލާންވިޔަސް ފައިދާހުރި މިކަހަލަ ކަމެއް ކުރީމަ އެވާނީ މޮޅުކަމަކަށް އަދި ރަނގަޅު ކަމަކަށް. މިވީ ދުވަސްތަކު ސުކޫލުތަކުންވެސް އެންމެގިނައިން ފެންނަމުންދިޔައީ ކޮންމެވެސް މީޓިންއެއްބާއްވާލާފަ ނޫނީ މާސްކެއްފަހާލާފަ އެކަހަލަ ކޮންމެވެސް ކަމެއްގެ ފޮޓޯތައް ވިއްޔަ. ކަމެއްކުރާނަމަ ކުރަންވާނީ ދެކޮޅުވެރިންވެސް އެކަމަކަށް ތައުރީފުކުރާކަހަލަ ކަންކަންދޯ. މިއީ އެހެންސުކޫލުތަކަށްވެސް ނަމޫނާ ޕްރޮގުރާމަކަށްވާނެކަމަށް ދެކެން.ކާމިޔާބަށްއެދެން
އަދުން01
18 June 2020
މީ ރަނގަޅު ގުޅުންތަކެއްގެ ނަތީޖާ ނޫން ދެވަނަ އެހެން އެއްޗެއްނޫން...މަރުހަބާ ދެކުނު ޕްރިންސިޕަލްސް އެންޑް ސުކޫލްސް
ނީރާ
18 June 2020
މީ އަސުލުވެސް ވަރަށްސަޅިކަމެއް. ތިންވެރިންނަށް ވަރަށް ބޮޑަށް މަރުހަބާ. ވަކިފަރާތަކުން ނޭންގިޔަސް މިކަހަލަ ކްރިއޭޓިވް ކަންކަން ކުރަން އެބަޖެހޭ ހުރިހާ ސުކޫލުތަކުންވެސް. ކިޔަވައިދިނުމަކީ ޒަމާނާ އެއްގޮތަށް ބަދަލުވާންޖެހޭ ކަންކަން އަދި ރަނގަޅަށް މެދުނުކެނޑި ގެންދެވިއްޖެނަމަ މީގެ ފައިދާ ދަރިވަރުންނާ ޓީޗަރުންނަށް ކުރާނެ. އުފާކުރަން މާލެ ނޫންތަނަކުން ޚާއްސަކޮށް ދެކުނުން މިކަހަލަ އުންމީދީ ކަންކަން ފެނުނީމަ.
މުޑަހަންޖާ
18 June 2020
މާލޭގެ ގަބީލާތަކާއިނުލައިވެސް ކަންކަންކުރެވޭނެ ކުރަން އުޅުނީމަ. މިކޮޅުން ހޮވާފަ މާލެއަށް ފޮނުވި މެންބަރުވެސް މިހަފްތާ އެއްކޮށް އުޅުނީ މާލޭ ކޮންމެވެސް މީހަކު ކަސްރަތުކުރަން ނިކުމެ އުޅެނިކޮށް ސޮރަކު ކޮންމެވެސް ނަމަކުން ގޮވައިފިއޭ ކިޔައިގެން އެކަންތައްގަނޑުގަ ބިޒީވެގެން.
ރަދީފްއޮފިޝިއަލް
18 June 2020
ސާބަހޭ އައްޑޫ ހައި ސްކޫލާއި ގދ. އަތޮޅު ތައުލީމީ މަރުކަޒު އަދި ލ. ގަމު ހަމަދު ސްކޫލު.(މިކަހަލަ ޕޮޒިޓިވް ކަމެއްގަ އައްޑޫގެ ހަބަރެއް އޮތަސް އެއްޗެއް ލިޔާނެ މީހަކު ނެތް.ނަމަވެސް އެކްސިޑެންޓެއް / ވައްކަމެއް ނުވަތަ މިފަދަ ނޭއްގާނީ އަމަލެއްގެ ވާހަކަ ލިޔެފިނަމަ ކޮމެންޓް ސެކްޝަން ވަރަށް ބާރުބޮޑުކޮށް ފެންނާނެ.ދެރަކަމެއް.)ވ.ވެދުން