މިއުޒިކް އިންޑަސްޓަރީ ވެސް ކޮންޓްރޯލްކުރަނީ ދެތިން މާފިއާއަކުން: ސޯނޫ ނިގަން

ބޮލީވުޑްގެ މިއުޒިކް އިންޑަސްޓްރީ ކޮންޓްރޯލްކުރަނީ ދެތިން "މާފިއާ" އަކުން ކަމަށް ބުނެ، މަޝްހޫރު ލަވަކިޔުންތެރިޔާ ބަހުގެ ހަމަލާތަކެއް ފޮނުވާލައިފި އެވެ.

އެކްޓަރު ސުޝާންތު ސިންގް ރާޖްޕޫތު އަމިއްލަ އަށް މަރުވި ހާދިސާއާ ގުޅިގެން ބޮލީވުޑަކީ "ނެޕޮޓިޒަމްގެ ހާއްޔެއް" ކަމަށް ގިނަ ބަޔަކު ސިފަކުރަމުންދާ މި ދަނޑިވަޅުގައި ސޯނޫ ބުނީ މިއުޒިކް އިންޑަސްޓްރީ ވެސް އެ އޮތީ ހާލަތުގައި ކަމަށެވެ. އަދި މީގެ ސަބަބުން ބޮޑު މަންޒަރު ފެންނަނީ ވަރަށް ބަނަކޮށް ކަމަށް ބުންޏެވެ.

މިއުޒިކް އިންޑަސްޓްރީ ކޮންޓްރޯލްކުރަނީ ދެތިން "މާފިއާ" އަކުން ކަމަށް ބުނި ނަމަވެސް އެއީ ކޮން ކުންފުނިތަކެއް ކަމެއް އޭނާގެ ވީޑިއޯ ބްލޮގްގައި ބުނެފައެއް ނުވެ އެވެ. ނަމަވެސް ބައެއް މީޑިއާތަކުން ވަނީ އެ ކުންފުނިތަކަކީ ފިލްމު އުފެއްދުމުގައި ވެސް ނަގާ ޕްރޮޑަކްޝަން ހައުސްތަކުގެ ތެރޭގައި ހިމެނޭ ބުޝަން ކުމާރުގެ ޓީ ސީރީޒާއި އަދިތިޔާ ޗޯޕްޅާގެ ޔާޝްރާޖް (ވައިއާރްއެފް) އާއި ޒީ މިއުޒިކް ކަމަށް ބުނެފަ އެވެ.

ސޯނޫ ވަނީ އެ ކުންފުނިތަކާ އެކު ގިނަ މަސައްކަތްތަކެއްކޮށްފަ އެވެ.

ވައިއާރްއެފަކީ ކުރިން ވެސް ފަންނާނުންގެ ހައްގުތަކަށް އަރައިގެންފައިވާކަމުގެ ތުހުމަތު އެޅިފައިވާ ކުންފުންޏެކެވެ.

ސޯނޫގެ ވީޑިއޯގައި ވަނީ ސުޝާންތަށް ދިމާވި ކަހަލަ ހާދިސާތަކެއް މިއުޒިކް އިންޑަސްޓްރީން ވެސް ފެނުމުގެ ފުރުސަތު ވަރަށް ބޮޑު ކަމަށާއި މިއުޒިކް ފަންނާނަކު އަމިއްލަ ފުރާނަ ދުއްވައިލި ވާހަކަ އަކީ އިވުން ވަރަށް ގާތް ކަމަށް ބުނެފަ އެވެ.

"މިއަދު މި އަޑު އިވުނީ އެކްޓަރަކު މަރުވި ވާހަކަ. މާދަމާ އިވޭނީ ލަކިޔުންތެރިއެއް ކޮމްޕޯޒަރެއް، ނުވަތަ ޅެންވެރިއެއްގެ މަރުގެ ވާހަކަކަންނޭނގޭ،" ރީތި އެތައް ލަވައެއް މިހާތަނަށް ކިޔާފައިވާ ލަވަކިޔުންތެރިޔާ ބުންޏެވެ. "އެކަމަކު މިއީ އަހަރެމެން އެކަކު ވެސް ދެކެން ބޭނުންވާ މަންޒަރެއް ނޫން."

ސޯނޫ ބުނިގޮތުގައި ނަސީބު ދިމާކުރި ގޮތުން އޭނާ އަށް މިއުޒިކް އިންޑަސްޓްރީގައި ވަރަށް ގިނަ ކާމިޔާބީތަކެއް ހޯދިއްޖެ އެވެ. އަދި އެކަމަށް މަގުފަހިވީ ވަރަށް ޅަ އުމުރުގައި އެ ދާއިރާ އަށް ނުކުމެވުނީތީ ކަމަށް ވެދާނެ އެވެ. އެކަމަކު މިއުޒިކް އިންޑަސްޓްރީގެ ކަންކަން މިހާރު އޮތް ގޮތަށް ބަލާ އިރު، ކިތަންމެ ހުނަރުވެރި މީހަކަށް ވިޔަސް ކޮންމެ ކޮންމެ މީހަކީ މިހާރު ފުރުސަތެއް ފަސޭހަ އިން ލިބޭނެ މީހެއް ނޫނެވެ. ސަބަބަކީ މިއުޒިކް އިންޑަސްޓްރީ ތެރޭގައި ވަކި ބަޔަކު ވަކިހިއްޕާލާފައި އޮތުމެވެ.

"އެފަދަ މީހުންގެ އަތްމަތީގައި އޮތް ކަމެއް މިހާރު ފަންނާނުންގެ ހުނަރުތައް ދައްކައިލަން ފުރުސަތެއް ދިނުމަކީ،" ސޯނޫ ބުންޏެވެ.

އޭނާ ބުނި ގޮތުގައި މިއުޒިކް އިންޑަސްޓްރީ ބޮޑު ވިޔަފާރިއަކަށް ހަދައިގެން މަދު ބަޔަކު އޭގެ ނާޖާއީޒު ފައިދާ ނަގަމުންދާ އިރު، އެކަމާ ދެކޮޅަށް މަސައްކަތްކުރެވެން ޖެހޭނެ އެވެ. އަދިި އެކަންކަމާ ބެހޭ ގޮތުން އެ މީހުންނާ ސުވާލު ވެސް ކުރެވެން ޖެހޭނެ ކަމަށް ވެސް ބުންޏެވެ.

"އެހެން އެކަން ނުވާ ކަމަށް ވަންޏާ މި އިންޑަސްޓްރީ އަބަދު ވެސް އޮންނާނީ ނުފޫޒު ގަދަ ދެތިން ބައެއްގެ މުށުތެރޭގައި. އަދި މިކަމަކާ ހުރެ ހުނަރުވެރި އެތައް ބަޔަކަށް ފުރުސަތު ނުލިބި، އެ މީހުންގެ ދިރިއުޅުން ބޮޑު ހަލާކެއްގެ ތެރެއަށް ހިނގައިދާނެ،" ސޯނޫ ބުންޏެވެ. "ހުނަރުވެރި ކޮންމެ މީހަކަށް ފުރުސަތު ދޭން ޖެހޭ. އެއީ ވަކި ބަޔަކަށް ލިބެންވާ ހައްގެއް ނޫން."

ސޯނޫ ބުނިގޮތުގައި ބައެއް ފިލްމީ ތަރިން ވެސް މިއުޒިކް ފަންނާނުންގެ ކެރިއަރު ހަލާކުކޮށްލުމުގައި ހިއްސާވެފައިވެ އެވެ. އެގޮތުން ބޮލީވުޑްގެ މިހާރު އެންމެ ކާމިޔާބު ފިރިހެން ލަވަކިޔުންތެރިން ތެރޭގައި ހިމެނޭ އަރިޖިތު ސިންގްއާ ދެކޮޅަށް ސަލްމާން ޚާން ވަރަށް ގޯސް ފިޔަވަޅުތަކެއް އަޅާފައި ހުރި ކަމަށް ބުންޏެވެ. ސަލްމާން ވަނީ އޭނާގެ 2015 ގެ ފިލްމު "ސުލްތާން" އަށް އަރިޖިތު ކިޔައިދިން ލަވަތަކެއް އުނިކޮށް، ފަހުން އޭނާގެ ފިލްމުތަކަށް ލަވަކިޔަން އަރިޖިތަށް ފުރުސަތު ނުދޭން ވެސް ބާރު އަޅައިފަ އެވެ.

"އަހަރެންގެ ސުވާލަކީ މިސާލަކަށް އަހަރެން ކަހަލަ ލަވަކިޔުންތެރިއަކާ ދޭތެރޭ މިފަދަ ގޮތަކަށް ކަންކުރާ ނަމަ ކޮބައިހޭ ދެން އަލަށް މި ދާއިރާ އަށް ނުކުންނަ ފަންނާނުންދާ ދޭތެރޭ ކަންތައްތައް ކުރާނެ ގޮތަކީ؟" ސޯނޫ ބުންޏެވެ. "މިއީ އަހަރެމެން ވަރަށް ކަންބޮޑުވާ ކަމެއް."