1 މިލިއަން ޑޮލަރުގެ ރިޝްވަތުގެ މައްސަލަ އޮތީ ކޮރަޕްޝަނެއް ނެތް ކަމަށް ނިންމާފައި!

ސީ ލައިފްއާ ހަވާލުކުރި ހައުސިން މަޝްރޫއު ކެންސަލްކޮށް، ކުރީގެ ސަރުކާރުގައި އެޗްޑީސީގެ އިސްވެރިންތަކެއް އެއް މިލިއަން ޑޮލަރުގެ ރިޝްވަތަށް އެދުނު މައްސަލަ އަކީ ކޮރަޕްޝަންގެ ކުށެއް އެކުލެވިގެން ނުވާ މައްސަލައެއް ކަމަށް ކުރީގެ ކޮމިޝަނުން ނިންމާފައި އޮތް ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.

އޭސީސީން މިގޮތަށް ބުނީ، އެޗްޑީސީގެ އިސްވެރިންތަކެއް ރިޝްވަތަށް އެދުނު މައްސަލަ ލަސްވާ ސަބަބު އޮޅުންފިލުވައިދޭން ސީ ލައިފްގެ މެނޭޖިން ޑިރެކްޓަރު އަހްމަދު މޫސާ (އައްމަޓީ) އެދިފައި ވަނިކޮށެވެ.

އޭނާ އެސީސީއަށް ހުށަހެޅުއްވި ސިޓީގައި ވިދާޅުވެފައި ވަނީ ރިޝްވަތުގެ ގޮތުގައި ހޯދަން އުޅުނު 1 މިލިއަން ޑޮލަރު ނުދިނުމުން ޕްރޮޖެކްޓް ކުރިއަށް ގެންދިއުމަށް އެޗްޑީސީގެ އޭރުގެ އިސްވެރިން ހުރަސްއަޅައި ޕްރޮޖެކްޓް ހުއްޓުވާފައިވާ ކަމަށެވެ. މިކަމުގެ ސަބަބުން ފްލެޓްތަކުގެ މަސައްކަތް ނުނިމި ޕްރޮޖެކްޓަށް ފައިސާ ދެއްކި އެތައް ފަރާތްތަކަކަށް ފައިސާ ރައްދުކުރަން ޖެހި އެ މީހުންނަށް އިއާދަނުކުރެވޭ ވަރުގެ ގެއްލުންވީ އޭސީސީން އެ މައްސަލަ ބަލައި އަޅަންޖެހޭ ފިޔަވަޅުތައް އަޅާފައި ނުވުމުގެ ސަބަބުން ކަމަށް ގަބޫލުކުރެވޭ ނަމަ އެކަން އަންގައި ދެއްވުމަށެވެ.

Sea Life mashroo ah 1 million dollar ge rishwath ah edhunu massala alun ACC ah

The most trusted news source in the Maldives

Mihaaru

އައްމަޓީ ތުހުމަތު ކުރައްވާ ގޮތުގައި ރިޝްވަތަށް އެދުނީ އެޗްޑީސީގެ އޭރުގެ މެނޭޖިން ޑައިރެކްޓަރެވެ. އައްމަޓީ އެ ވިދާޅުވާ މުއްދަތުގައި އެ މަގާމު ފުރުއްވީ މުހައްމަދު ސައިމަން އެވެ.

އޭސީސީގެ މީޑިއާ އޮފިޝަލް ވިދާޅުވީ އެ މައްސަލައަކީ ތަހުގީގު ނިންމައި ރިޕޯޓް އާއްމުކޮށްފައިވާ މައްސަލައެއް ކަމަށެވެ. ކޮމިޝަނުން މިހާރު ބަލަމުން އަންނަނީ ސީ ލައިފްއާ ގުޅޭ އެހެން ދެ މައްސަލައެއް ކަމަށް އޭނާ ވިދާޅުވި އެވެ.

އައްމަޓީ ހުށަހެޅުއްވި މައްސަލަ ނިންމައި އޭސީސީގެ ވެބްސައިޓުގައި އާއްމުކޮށްފައިވާ ރިޕޯޓުގައި ބުނެފައި ވަނީ އެ މައްސަލައިގައި ކުރި ތުހުމަތާ ގުޅޭ އެއްވެސް ލިޔުމެއް ތަހުގީގަށް ފެނިފައި ނުވާ ކަމަށެވެ. އަދި ތަހުގީގަށް ގެންދިޔަ ލެޕްޓޮޕާއި އެޗްޑީސީގެ އެއްވެސް މުވައްޒަފެއްގެ އީމެއިލް އިން ވެސް ރިޝްވަތާ ގުޅޭ ލިއުމެއް ފެނިފައި ނުވާ ކަމަށެވެ. މީގެ އިތުރުން ރިޝްވަތުގެ ސިޓީ ފޮނުވި ކަމަށް ބުނާ ތާރީޚްގެ ބެކްއަޕް ތަހުގީގަށް ލިބިފައި ނުވާތީ ރިޝްވަތު ކަމަށް ތުހުމަތުކުރާ ލިއުން ފޮނުވި ކަމެއް ނުވަތަ ނޫން ކަމެއް ތަހުގީގަށް ޔަގީންކުރެވިފައި ނުވާ ކަމަށް އޭސީސީން މައްސަލަ ނިންމި ގޮތުގެ ރިޕޯޓުގައިވެ އެވެ.

އޭސީސީން ބުނެފައި ވަނީ ފުލުހުންގެ ފޮރެންސިކް ރިޕޯޓުން ވެސް މައްސަލައާ ގުޅުން ހުރި އެއްވެސް ފައިލެއް ވެސް ފެނިފައި ނުވާ ކަމަށެވެ. މައްސަލައިގައި ކޮރަޕްޝަނެއް ނެތް ކަމަށް ނިންމީ އެހެންވެ ކަމަށް މައްސަލަ ނިންމި ގޮތުގެ ރިޕޯޓުގައިވެ އެވެ.

އެކަމަކު އައްމަޓީ ވިދާޅުވެފައި ވަނީ، މައްސަލަ ތަހުގީގުކޮށްދޭން ފުލުހުންނާއި އޭސީސީ އަށް ހުށަހެޅީ ހެއްކާ އެކުގައި ކަމަށެވެ. އޭގެތެރޭގައި ވީޑިއޯ ވެސް ހިމެނޭނެ ކަމަށް އޭނާ ވިދާޅުވި އެވެ.

އައްމަޓީ ވިދާޅުވާ ގޮތުގައި އެއްބަސްވުމާ އެއްގޮތަށް މަސައްކަތް ކުރިއަށް ގެންދަން އެ ކުންފުންޏަށް އެޗްޑީސީން ދޭންޖެހޭ ހުއްދަތައް ނުދީ ގަސްތުގައި ލަސްކުރުމަށް ފަހު އެއް މިލިއަން ޑޮލަރުގެ ރިޝްވަތަށް އެދި އެ ފައިސާ ބަލައި އެޗްޑީސީގެ މެދުވެރިޔާ ދިޔައީ ސްރީ ލަންކާ އަށެވެ.

ޕްރޮޖެކްޓް އަލުން ފެށުމުގެ ހުއްދައިގެ ލިޔުން އެޗްޑީސީގެ އީ މެއިލްއަކުން ހޯދައި އެ މެދުވެރިޔާ ގެނެސްދިން ކަމަށް އައްމަޓީ ވިދާޅުވި އެވެ. އެޗްޑީސީން ފޮނުވި މެދުވެރިޔާއާ ބައްދަލުކުރީ ސީ ލައިފުން ހިންގި "ކޮންޓްރޯލްޑް އޮޕަރޭޝަނެއްގައި" ލަންކާގައި އެ ވަގުތު ޗުއްޓީގައި ހުރި ދިވެހި ފުލުހަކާއެކުގައި ކަމަށް އައްމަޓީ ވިދާޅުވެފައިވެ އެވެ.

ހުޅުމާލޭގައި 3،000 ފްލެޓް އަޅަން ބުކިން ފީގެ ގޮތުގައި ސީ ލައިފުން ފައިސާ ނެގުމަށް ފަހު މަސައްކަތް ކުރިއަށް ނުގެންދިއުމުން ގެއްލުންވި މީހުންނަށް 45 މިލިއަން ރުފިޔާ ދޫކުރީ އެޗްޑީސީއަށް އެ ކުންފުނިން ދައްކާފައިވާ ފައިސާ އިންނެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި އެޗްޑީސީން އިއުލާންކުރި މަޝްރޫއަކުން ހުޅުމާލޭގައި، 3،000 ހައުސިން ޔުނިޓް އަޅަން 2014 ގައި ސީ ލައިފުން ހުޅުވާލުމުން ފްލެޓް ގަންނަން ގިނަ ބަޔަކު ފައިސާ ދެއްކި އެވެ.