ޝަމްއާނަށް ކޮރަޕްޝަންގެ ތުހުމަތުކޮށް، އޭސީސީގެ ބައިވެރިވުމެއް ނެތި ފުލުހުން ކޯޓަށް ދިއުމުން ސުވާލު އުފައްދައިފި

ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދުގެ މައްޗަށް ކޮރަޕްޝަންގެ ތުހުމަތުކޮށް، އޭނާ ބަންދު ކުރަން ކްރިމިނަލް ކޯޓުގައި އެދުނުއިރު އެންޓި ކޮރަޕްޝަން ކޮމިޝަން (އޭސީސީ) އިން ބައިވެރިނުވާތީ މިއަދުގެ ޝަރީއަތުގައި ސުވާލު އުފައްދައިފި އެވެ.

އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށް ފަހު، އެ އިދާރާގެ މުވައްޒަފުންތަކަކާ ގުޅިގެން އެ މީހާގެ އަތުން 500،000 އަށް ވުރެ ގިނަ ރުފިޔާ ހޯދައިގެން އެ ފައިސާ ޝަމްއާންގެ ގެއަށް ގެންދިޔަ ކަމަށް ތުހުމަތުކުރާ މައްސަލައިގައި ހައްޔަރުކޮށް އޭނާ ޝަރީއަތް ނިމެންދެން ވަނީ ބަންދުކޮށްފަ އެވެ.

ޝަރީއަތް ނިމެންދެން ބަންދުކުރުމަށާއި އަދި އޭގެ ކުރިން 15 ދުވަހަށް ބަންދު ކުރަން ކްރިމިނަލް ކޯޓުން އަމުރު ނެރެފައިވަނީ ގާނޫނީ އުސޫލުތަކާ ހިލާފަށް ކަމަށް ބުނެ އެ އަމުރުތައް ބާތިލްކޮށް ދޭން ޝައްމާންގެ ފަރާތުން ވަނީ ހައި ކޯޓަށް ހުށަހަޅައިފަ އެވެ.

އެ މައްސަލައިގެ ފުރަތަމަ އަޑުއެހުމުގައި ޝައްމާންގެ ފަރާތުން އަމުރު ބާތިލް ކުރަން އެދޭ މައިގަނޑު ސަބަބަކީ އޭނާއާ ދެކޮޅަށް ގާނޫނާ ހިލާފަށް ތަހުގީގު ހިންގައި، ބަންދުކުރަން ފުލުހުން އެދިފައިވާތީ އެވެ. ޝައްމާންގެ ވަކީލް ނޫރުއްސަލާމް މިއަދުގެ ޝަރީއަތުގައި ފާހަގަ ކުރެއްވި ގޮތުގައި ޝައްމާން 15 ދުވަހަށް ބަންދު ކުރަން އެދުނުއިރު، އޭނާގެ މައްޗަށް ކޮށްފައި އޮތީ ކޮރަޕްޝަންގެ ތުހުމަތެވެ.

ކޮރަޕްޝަންގެ ކުށްތައް ބެލުމުގެ އިހްތިސާސް އޮންނަނީ އޭސީސީއަށެވެ. މިފަދަ ތުހުމަތެއް މައްސަލައެއްގައި އޮތް ނަމަ އެ މައްސަލައެއްގެ އެ ބައި ކުރިއަށް ގެންދަނީ ޖޮއިންޓް އިންވެސްޓިގޭޝަނެއްގެ ގޮތުގަ އެވެ. ކޮރަޕްޝަންގެ ތުހުމަތެއް އެކަނި އޮތް ނަމަ އެ މައްސަލައެއް ބެލޭނީ ހަމައެކަނި އޭސީސީއަށެވެ.

ނަމަވެސް، ނޫރުއްސަލާމް ވިދާޅުވި ގޮތުގައި މި މައްސަލާގައި އަމަލުކޮށްފައި ވަނީ އެގޮތަކަށް ނޫނެވެ. ޝަމްއާން ބަންދުކުރަން ފުލުހުން ކޯޓަށް ދިޔައިރު ތަހުގީގުގައި އޭސީސީން ބައިވެރިއެއް ނުވެ އެވެ.

ވަކީލް ވިދާޅުވީ މި މައްސަލައިގައި އޮތް ތުހުމަތުގައި ޝަމްއާންގެ މައްޗަށް ކޮށް އޭނާ ބަންދު ކުރަން ފުލުހުންނަށް އެކަނި ކޯޓަށް ނުދެވޭނެ ކަމަށެވެ. މިފަދަ އިޖުރާއަތްތަކަކީ އެ އަށް އަމަލު ކުރަން ޖެހޭނެ ކަންކަން ކަމަށާއި ކުދިކުދި ކަންކަން ކަމުގައި ދެކިގެން ދޫކޮށްލެވޭނެ ކަމެއް ނޫން ކަމަށް އޭނާ ވިދާޅުވި އެވެ.

"މިއީ ކޮރަޕްޝަންގެ ތުހުމަތުގައި ދުވަހަކު އަމަލުކުރި ގޮތެއް ނޫން،" ވަކީލް ވިދާޅުވި އެވެ.

ޝަމްއާންގެ މައްޗަށް ބަންދުގެ އަމުރު ފުރަތަމަ ނެރުނުއިރު، އޭނާގެ މައްޗަށް ކޮރަޕްޝަންގެ ތުހުމަތު ކޮށްފައި އޮތް ނަމަވެސް އޭގެ ފަހުން އެހެން މީހެއްގެ މުދަލަކަށް ނަހަމަ ގޮތުގައި ބާރު ހިންގުމުގެ ތުހުމަތާއި މަނީ ލޯންޑްރިންގެ ތުހުމަތު ކޮށްފައިވެ އެވެ. މިހާރު ފުލުހުން ތަހުގީގު ކުރިއަށް ގެންދަނީ އެ ތުހުމަތުތަކާ ގުޅިގެންނެވެ.

މައްސަލައިގައި ޖަވާބުދާރީވަމުން ދައުލަތުގެ ވަކީލް ވިދާޅުވީ، މަނީ ލޯންޑްރިންގެ ތުހުމަތާއި ކޮރަޕްޝަންގެ ތުހުމަތު ކުރާއިރު، ހަމައެކަނި މަނީ ލޯންޑްރިންގެ ކުށުގެ ތަހުގީގު ފުލުހުންނަށް ހިންގިދާނެ ކަމަށް މަތީ ކޯޓުތަކުން ކަނޑައަޅާފައިވާ ކަމަށެވެ.

އޭނާ ވިދާޅުވީ ހައްޔަރުކުރާއިރު ކުރެވޭ ތުހުމަތުތައް ބަޔާން ކުރުމަކީ އެންމެ ރަނގަޅު ގޮތް ކަމަށާއި ނަމަވެސް އޭގެ މާނައަކީ ހައްޔަރުކުރަން އެދޭ އިރު ބަޔާންކުރާ ތުހުމަތަށް ދައުވާ ކުރަން ފުލުހުން ފޮނުވުން ނޫން ކަމަށެވެ. ކޮރަޕްޝަންގެ ތުހުމަތެއް އުޅޭ ނަމަ އެކަމެއް ފުލުހުން އޭސީސީ އަށް އަންގާނެ ކަމަށާއި މައްސަލާގައި ޖޮއިންޓް އިންވެސްޓިގޭޝަނެއް ނުވަތަ ވަކި ތަހުގީގެއް ހިންގަން ބޭނުން ނަމަ އެކަމެއް ނިންމާނީ ކޮމިޝަނުން ކަމަށް އޭނާ ވިދާޅުވި އެވެ.

ވަކީލް ވިދާޅުވީ، ޝަމްއާންގެ ބަންދު ކުރަން ފުލުހުން އެދުނީ ކޮރަޕްޝަންގެ ކުށް ތަހުގީގު ކުރުމަށް ނޫން ކަމަށާއި ނަމަވެސް އެ ތުހުމަތު ވެސް ކުރެވޭ ކަން ބަޔާންކޮށް ބަންދުކޮށްދޭން އެދުނީ މަނީ ލޯންޑްރިންގެ ކުށް ބަޔާންކޮށްދިނުމުގެ ގޮތުން ކަމަށެވެ.

"ބަންދު ކުރަން ގެންދިޔައިރު ބަޔާންކޮށްފައި މި އޮތީ މަނީ ލޯންޑްރިންގެ ތުހުމަތު ވެސް ކޮރަޕްޝަންގެ ތުހުމަތު ވެސް އެބަ ކުރެވޭ ކަމަށް. ނަމަވެސް ތަހުގީގު މި ކުރަނީ މަނީ ލޯންޑްރިންގެ ތުހުމަތޭ، އެހެން ނަމަވެސް އެ ހިނދަށް ވެސް ކޮރަޕްޝަންގެ ތުހުމަތު އޮތް ނަމަ ބަންދު ކުރާއިރު، އެ ތުހުމަތު އޮތް ކަން ބަޔާންކޮށްފައޭ ހައްޔަރު ކުރަން ނޫނީ ބަންދު ކުރަން މި އެދެނީ،" ވަކީލް ވިދާޅުވި އެވެ.

އޭނާ ވިދާޅުވި ގޮތުގައި ކޮރަޕްޝަންގެ ކުށް ތަހުގީގު ކުރުމުގެ ބާރު ފުލުހުންނަށް ނެތަސް މަނީ ލޯންޑްރިންގެ ތުހުމަތު ތަހުގީގު ކުރާއިރު އެއާ ގުޅިފައިވާ ކުށެއްގެ ގޮތުގައި ކޮރަޕްޝަންގެ ކުށުގެ އަމަލު ވެސް ބެލުމުގެ ފުރުސަތު ފުލުހުންނަށް ލިބިދެ އެވެ.

ދައުލަތުން ވަނީ ޝަމްއާން ބަންދު ކުރަން ނެރެފައިވާ އަމުރަކީ ގާނޫނީ ހަމަތަކުގެ ތެރެއިން ނެރެފައިވާ އަމުރެއް ކަމަށް ކަނޑައަޅައިދޭން ކޯޓުގައި މިއަދު އެދިފަ އެވެ.

ޝަމްއާންގެ މައްޗަށް ފުލުހުން ތުހުމަތު ކުރަނީ މިދިޔަ މާޗު 20 ގައި އޭނާ މަގާމުން ވަކިކޮށް، އޭނާ ފަހުން ހައްޔަރުކުރީ އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށް ފަހު، އިމިގްރޭޝަންގެ މުވައްޒަފުންތަކަކާ ގުޅިގެން އެ މީހާގެ އަތުން 500،000 އަށް ވުރެ ގިނަ ރުފިޔާ ހޯދައިގެން އެ ފައިސާ ޝަމްއާންގެ ގެއަށް ގެންދިޔަ ކަމަށެވެ.

ފުލުހުން ކުރިން ބުނެފައިވާ ގޮތުގައި ފައިސާ އަތުލުމަށް ފަހު، ދޫކޮށްލާފައިވަނީ އިމިގްރޭޝަނުން ހިންގި އޮޕަރޭޝަނެއްގައި ގެސްޓް ހައުސްއަކުން އަތުލައިގަތް ބިދޭސީއެކެވެ. ފައިސާ ހޯދާފައިވަނީ އެ ބިދޭސީމީހާ ދޫކޮށްލުމަށް ފަހު، އިމިގްރޭޝަންގެ ތިން މުވައްޒަފަކު އެ މީހާއާ މަގުމަތިން ބައްދަލުކޮށް ކަމަށާއި އެ ފައިސާ ހިފައިގެން ގޮސްފައިވަނީ ޝަމްއާންގެ ގެއަށް ކަމަށް ތަހުގީގަށް އެނގިފައިވާ ކަމަށް ވެސް ފުލުހުން ބުނެފައިވެ އެވެ. އެ އޮޕަރޭޝަން ހިންގީ ވެސް ވެސް ބިދޭސީންނާއި އެ މީހުންނާ ގުޅޭ ތަންތަން ފާސްކުރުމަށް އިމިގްރޭޝަންގައި ކަނޑައަޅާފައިވާ ޓާސްކްފޯސް މީހުން ނޫން ކަމަށް ފުލުހުން ބުންޏެވެ.